ടൊറൻ്റോയിൽ ലിഥിയം-അയോൺ ബാറ്ററി അഗ്നിബാധകൾ വർധിക്കുന്നു; പ്രധാന കാരണം ഇ-ബൈക്കുകളും സ്കൂട്ടറുകളും

 

 

കാനഡയിലെ ടൊറൻ്റോ നഗരത്തിൽ ലിഥിയം-അയോൺ ബാറ്ററികൾ മൂലം ഉണ്ടാകുന്ന തീപിടിത്ത സംഭവങ്ങൾ ആശങ്കാജനകമായി വർധിക്കുന്നതായി ടൊറൻ്റോ ഫയർ സർവീസസിൻ്റെ പുതിയ കണക്കുകൾ. ഇ-ബൈക്കുകൾ, ഇ-സ്കൂട്ടറുകൾ തുടങ്ങിയ മൈക്രോമൊബിലിറ്റി  ഉപകരണങ്ങളിലാണ് ഇത്തരം അപകടങ്ങൾ കൂടുതൽ റിപ്പോർട്ട് ചെയ്യപ്പെടുന്നത്. മുൻവർഷങ്ങളെ അപേക്ഷിച്ച് ഇത്തരം സംഭവങ്ങളിൽ വലിയ വർധനവ് രേഖപ്പെടുത്തിയിട്ടുണ്ടെന്നും, ഇത് പൊതുസുരക്ഷയ്ക്ക് കടുത്ത ഭീഷണിയുയർത്തുന്നുവെന്നും ടൊറോന്റോ ഫയർ ചീഫ്  വ്യക്തമാക്കി.

ഓൺലൈൻ വിപണികൾ വഴി വിറ്റഴിക്കപ്പെടുന്ന ഗുണനിലവാരമില്ലാത്തതും അംഗീകൃത സുരക്ഷാ മാനദണ്ഡങ്ങൾ പാലിക്കാത്തതുമായ ചാർജിംഗ് ഉപകരണങ്ങളും ബാറ്ററികളുമാണ് പ്രധാനമായും ദുരന്തങ്ങൾക്ക് വഴിവെക്കുന്നത്. ഇവ ചാർജ് ചെയ്യുന്ന സമയത്തോ അല്ലെങ്കിൽ രാസതകരാറുകൾ  സംഭവിക്കുമ്പോഴോ അതിവേഗം സ്ഫോടനത്തോടെ തീപടരുകയും വിഷവാതകങ്ങൾ വമിക്കുകയും ചെയ്യുന്നു. അപ്പാർട്ട്‌മെന്റുകളിലും അടച്ചിട്ട മുറികളിലും ഇത്തരം ഉപകരണങ്ങൾ ചാർജ് ചെയ്യുന്നത് വലിയ ആളപായത്തിനും സ്വത്തുനാശത്തിനും കാരണമാകുന്നുണ്ടെന്ന് ഫയർ ഫോഴ്സ് ചൂണ്ടിക്കാണിക്കുന്നു.

സാഹചര്യം കണക്കിലെടുത്ത്, രാജ്യത്തേക്ക് ഇറക്കുമതി ചെയ്യുന്ന ഇത്തരം സാങ്കേതിക ഉപകരണങ്ങൾക്ക് കർശനമായ നിയന്ത്രണങ്ങളും സുരക്ഷാ നിർദ്ദേശങ്ങളും ഏർപ്പെടുത്തണമെന്ന് സിറ്റി അധികൃതരും അഗ്നിശമന സേനയും ഫെഡറൽ സർക്കാരിനോട് ആവശ്യപ്പെട്ടിട്ടുണ്ട്. സാക്ഷ്യപ്പെടുത്തിയ  ഉപകരണങ്ങൾ മാത്രം ഉപയോഗിക്കുക, കേടുപാടുകൾ സംഭവിച്ച ബാറ്ററികൾ ഉടനടി മാറ്റുക, രാത്രികാലങ്ങളിൽ ശ്രദ്ധയില്ലാതെ ചാർജിംഗിന് ഇടാതിരിക്കുക എന്നീ മുൻകരുതലുകൾ പാലിക്കണമെന്ന് പൊതുജനങ്ങൾക്ക് അധികൃതർ നിർദ്ദേശം നൽകി.