വാൻകൂവറിൽ ആളെ രക്ഷിക്കാൻ ആർട്ട് ഗാലറിയിൽ പോലീസ് ബ്രേക്ക്-ഇൻ; രക്ഷിച്ചത് ശില്പത്തെ, നഷ്ടം $1,000!

 

 

അപകടനിലയിലായ ആളെ രക്ഷിക്കാനിറങ്ങി ഒടുവിൽ ശില്പത്തിന് മുന്നിൽ അമ്പരന്നുനിൽക്കേണ്ടി വന്ന പോലീസിന്റെ കഥയാണ് ഇപ്പോൾ വാൻകൂവറിൽ നിന്നുള്ള വാർത്ത. കാനഡയിലെ വാൻകൂവറിലുള്ള 'ആക്‌സസ് ആർട്ട് ഗാലറി'യിലാണ്  കൗതുകകരവും സാമ്പത്തിക നഷ്ടമുണ്ടാക്കിയതുമായ ഈ സംഭവം നടന്നത്.

വെള്ളിയാഴ്ച രാത്രിയാണ് സംഭവം നടന്നത്. ഗാലറിക്കുള്ളിൽ മേശയ്ക്ക് പിന്നിൽ ഒരാളുടെ കാലുകൾ മാത്രമായി കാണുന്നുണ്ടെന്നും അടിയന്തര വൈദ്യസഹായം ആവശ്യമായിരിക്കുമെന്നും കാണിച്ച് പോലീസിന് ലഭിച്ച 911 കോളാണ് സംഭവങ്ങളുടെ തുടക്കം. വിവരമറിഞ്ഞയുടൻ ഗാലറിയിലെത്തിയ പോലീസും ഫയർഫോഴ്സും ചേർന്ന് വാതിലും ഗേറ്റും തകർത്ത് അകത്തുകയറുകയായിരുന്നു.

എന്നാൽ അകത്തുകടന്ന ഉദ്യോഗസ്ഥർ കണ്ടത് മനുഷ്യനെയല്ല, മറിച്ച് അലിസ്സ പിയറി എന്ന കലാകാരി നിർമ്മിച്ച 'ദി പ്രിപ്പറേറ്റർ'  എന്ന ശില്പത്തെയാണ്. ഒരു കലാകാരൻ പെട്ടിയിലേക്ക് കുനിഞ്ഞുനിന്ന് ജോലി ചെയ്യുന്ന രീതിയിലുള്ള ഈ ശില്പത്തിന്റെ കാലുകൾ മാത്രമാണ് പുറത്തുനിന്ന് നോക്കുന്നവർക്ക് കാണാൻ സാധിക്കുക. ഇതൊരു ശില്പമാണെന്ന് പ്രദേശത്തുണ്ടായിരുന്ന ഒരാൾ പോലീസിനോട് പറഞ്ഞെങ്കിലും അവർ വിശ്വസിക്കാൻ തയ്യാറായില്ല. ഗാലറിയുടെ വെബ്‌സൈറ്റ് ഒന്ന് പരിശോധിച്ചിരുന്നെങ്കിൽ പോലും ഒഴിവാക്കാമായിരുന്ന അബദ്ധമാണിതെന്ന് ഗാലറി ഡയറക്ടർ സാഗി ഇഹ്തേശാംസാദെ വ്യക്തമാക്കി.

പോലീസിന്റെ ഈ സാഹസിക രക്ഷാപ്രവർത്തനം കാരണം ഗാലറിയുടെ പൂട്ടിനും ഗേറ്റിനും വൻ കേടുപാടുകൾ സംഭവിക്കുകയും, ഏകദേശം 1,000 ഡോളറിൻ്റെ നഷ്ടം ഉണ്ടാകുകയും ചെയ്തു. തങ്ങളുടെ 35-ാം വാർഷിക ആഘോഷങ്ങൾക്ക് തയ്യാറെടുക്കുന്ന സമയത്തുണ്ടായ ഈ അനാവശ്യ ചിലവ് വാൻകൂവർ സിറ്റിയിൽ നിന്ന് ഈടാക്കാനുള്ള ശ്രമത്തിലാണ് ഗാലറി അധികൃതർ. ഇനി ആളുകൾ തെറ്റിദ്ധരിക്കാതിരിക്കാൻ രാത്രികാലങ്ങളിൽ ശില്പം തുണികൊണ്ട് മൂടിയിടാനാണ് ഗാലറിയുടെ തീരുമാനം.