ഇമിഗ്രേഷൻ അധികാരം പ്രവിശ്യകൾക്ക് നൽകണമോ? ചർച്ചയായി ആൽബെർട്ടയിലെ 'റൂറൽ റിന്യൂവൽ' മാതൃക

 

കാനഡയിൽ ഇമിഗ്രേഷൻ നയങ്ങളുടെ പൂർണ്ണ നിയന്ത്രണം കേന്ദ്ര സർക്കാരിനാണെങ്കിലും, പ്രാദേശികമായി ആൽബെർട്ട പ്രവിശ്യ നടപ്പിലാക്കിയ ഒരു പദ്ധതി ഇപ്പോൾ വലിയ ചർച്ചയാകുകയാണ്. പ്രവിശ്യയിലെ പ്രാദേശിക ഭരണകൂടങ്ങൾക്ക്   കുടിയേറ്റക്കാരുടെ സ്ഥിരതാമസത്തിനുള്ള ശുപാർശ നൽകാൻ അധികാരം നൽകുന്ന 'റൂറൽ റിന്യൂവൽ സ്ട്രീം' (Rural Renewal Stream) എന്ന പദ്ധതിയാണ് ഇതിന് കാരണം.  വരുന്ന ഒക്ടോബറിൽ നടക്കാനിരിക്കുന്ന റഫറണ്ടത്തിൽ, ഇമിഗ്രേഷനിൽ പ്രവിശ്യയ്ക്ക് കൂടുതൽ നിയന്ത്രണം വേണമോ എന്ന കാര്യത്തിൽ ആൽബെർട്ടയിലെ ജനങ്ങൾ വോട്ട് ചെയ്യാനിരിക്കുകയാണ്. ഈ സാഹചര്യത്തിലാണ് പ്രാദേശികമായി നടപ്പിലാക്കിയ ഈ പദ്ധതിയുടെ ഗുണദോഷങ്ങൾ പുറത്തുവരുന്നത്.  

കൊവിഡ് കാലത്തിന് ശേഷം ആൽബെർട്ടയിലെ പ്രമുഖ നഗരങ്ങളല്ലാത്ത ചെറിയ പട്ടണങ്ങളിൽ കടുത്ത ജീവനക്കാരുടെ ക്ഷാമം അനുഭവപ്പെട്ടിരുന്നു. ഇതിന് പരിഹാരമായാണ് 2022-ൽ 'ബ്രൂക്സ്' പോലുള്ള കൊച്ചുനഗരങ്ങളിൽ പ്രാദേശികമായി റിക്രൂട്ട് ചെയ്യാനും സ്ഥിരതാമസത്തിനുള്ള ശുപാർശ കത്തുകൾ നൽകാനും അധികാരം നൽകിയത്.  പ്രാദേശിക സ്ഥാപനങ്ങളിലെ ഒഴിവുകൾ നികത്താൻ ഇത് വലിയ രീതിയിൽ സഹായിച്ചു. ഉദാഹരണത്തിന്, ബ്രൂക്സിലെ ഒരു ഫാർമസിക്ക് വിദേശത്തുനിന്ന് എട്ട് ഫാർമസിസ്റ്റുകളെ വരെ റിക്രൂട്ട് ചെയ്യാനും അവരുടെ സ്ഥിരതാമസം ഉറപ്പാക്കാനും ഈ പദ്ധതിയിലൂടെ സാധിച്ചു.  എന്നാൽ പദ്ധതിക്ക് ചില വലിയ വെല്ലുവിളികളും നേരിടേണ്ടി വന്നു. പദ്ധതി പ്രഖ്യാപിച്ചതോടെ ചെറിയ നഗരങ്ങളിലെ ഭരണകൂടങ്ങൾക്ക് കൈകാര്യം ചെയ്യാൻ കഴിയാത്തത്ര അപേക്ഷകളും ഫോൺ കോളുകളും ഇമെയിലുകളും വന്നു നിറഞ്ഞു.  വ്യാജ സ്ഥാപനങ്ങളുടെ പേരിൽ അപേക്ഷകൾ വരുന്നത് തടയാൻ അധികൃതർക്ക് കടുത്ത നിയന്ത്രണങ്ങൾ ഏർപ്പെടുത്തേണ്ടി വന്നു. 

ചെറുനഗരങ്ങളിലെ ഓഫീസുകൾക്ക് ഇത്രയും വലിയ നടപടിക്രമങ്ങൾ ഒറ്റയ്ക്ക് കൈകാര്യം ചെയ്യാനാകാതെ വന്നതോടെ 'സിൽവൻ ലേക്ക്' പോലുള്ള ചില നഗരങ്ങൾ ഈ പദ്ധതി താൽക്കാലികമായി നിർത്തിവെക്കുകയോ വേണ്ടെന്നു വയ്ക്കുകയോ ചെയ്തു.  ഹ്രസ്വകാല ദർശനവും രാഷ്ട്രീയവും ഇമിഗ്രേഷൻ നിയന്ത്രണം കൂടുതൽ പ്രാദേശിക തലത്തിലേക്ക് കൊണ്ടുവരുന്നത് അന്നന്നത്തെ തൊഴിൽ ക്ഷാമം പരിഹരിക്കാൻ സഹായിക്കുമെങ്കിലും, രാജ്യത്തിന്റെ ദീർഘകാല വളർച്ചയ്ക്ക് ഇത് പൂർണ്ണമായും അനുയോജ്യമല്ലെന്നാണ് യൂണിവേഴ്സിറ്റി ഓഫ് കാൽഗറിയിലെ ഗവേഷകനായ ഒമിദ് അസയേഷ് ചൂണ്ടിക്കാണിക്കുന്നത്. കുടിയേറ്റക്കാരുടെ കൃത്യമായ യോഗ്യതകളും കഴിവുകളും മുൻനിർത്തി നൽകുന്ന പോയിൻ്റ് അധിഷ്ഠിത  രീതിയാണ് ദീർഘകാലത്തേക്ക് കൂടുതൽ സുസ്ഥിരമെന്ന് അദ്ദേഹം വ്യക്തമാക്കുന്നു. 

 കൂടാതെ, വരാനിരിക്കുന്ന റഫറണ്ടത്തിലെ ചോദ്യം കേവലം ഇമിഗ്രേഷൻ വിഷയം മാത്രമല്ലെന്നും, ഫെഡറൽ സർക്കാരുമായുള്ള രാഷ്ട്രീയ വിയോജിപ്പുകളുടെ ഭാഗം കൂടിയാണെന്നും വിദഗ്ധർ അഭിപ്രായപ്പെട്ടു. ഒക്ടോബർ 19-നാണ് ഈ വിഷയത്തിൽ ആൽബെർട്ടയിൽ ജനഹിത പരിശോധന നടക്കുന്നത്.