റഫറണ്ടം നടത്തിപ്പിനായി മറ്റ് പ്രവിശ്യകളുടെ സഹായം തേടി ഇലക്ഷൻസ് ആൽബെർട്ട

 

 

ഈ വർഷം ഒക്ടോബറിൽ നടക്കുന്ന നിർണായകമായ റഫറണ്ടം നടത്തിപ്പിനായി കാനഡയിലെ മറ്റ് പ്രവിശ്യകളിലെ തിരഞ്ഞെടുപ്പ് ഏജൻസികളിൽ നിന്ന് അനുഭവസമ്പന്നരായ ഉദ്യോഗസ്ഥരുടെ സേവനം തേടി ഇലക്ഷൻസ് ആൽബെർട്ട .  വോട്ടെടുപ്പ് കാര്യക്ഷമമായി പൂർത്തിയാക്കുന്നതിനാണ് വിദഗ്ധരായ തിരഞ്ഞെടുപ്പ് ഉദ്യോഗസ്ഥരെ ക്ഷണിച്ചിരിക്കുന്നത്. വോട്ടെടുപ്പിന് ശേഷമുള്ള ആദ്യ 48 മണിക്കൂറിൽ തുടർച്ചയായി നടത്തുന്ന വോട്ടെണ്ണൽ പ്രക്രിയ കൃത്യതയോടെ പൂർത്തിയാക്കാൻ ഇത്തരത്തിലുള്ള വിദഗ്ധ സേവനം അത്യാവശ്യമാണെന്ന് ഇലക്ഷൻസ് ആൽബെർട്ട വക്താവ് മെയ ഹൻറഹാൻ വ്യക്തമാക്കി.

സസ്‌കാച്ചെവൻ പ്രവിശ്യ ഇതിനോടകം സഹായം വാഗ്ദാനം ചെയ്തിട്ടുണ്ട്. സ്വന്തം ആവശ്യങ്ങൾ വിലയിരുത്തിയ ശേഷമേ ആൽബർട്ടയ്ക്ക് സഹായം നൽകുന്നതിൽ തീരുമാനമെടുക്കൂ എന്ന് ബ്രിട്ടീഷ് കൊളംബിയ അറിയിച്ചിട്ടുണ്ട്. താത്കാലിക ജീവനക്കാരെ കണ്ടെത്താനുള്ള റിക്രൂട്ട്‌മെൻ്റ് നടപടികൾ പുരോഗമിക്കുകയാണ്. പ്രചാരണം ആരംഭിച്ച് ചുരുങ്ങിയ ദിവസങ്ങൾക്കുള്ളിൽ തന്നെ പതിനായിരക്കണക്കിന് അപേക്ഷകൾ ലഭിച്ചത് ശുഭസൂചനയാണെന്ന് അധികൃതർ ചൂണ്ടിക്കാട്ടുന്നു. വോട്ടെണ്ണലും മറ്റ് സങ്കീർണ്ണമായ സാങ്കേതിക ചുമതലകളും സുഗമമായി കൈകാര്യം ചെയ്യുന്നതിന് പ്രൊഫഷണൽ പരിചയസമ്പന്നരായ ഉദ്യോഗസ്ഥരുടെ മേൽനോട്ടം അനിവാര്യമാണെന്നാണ് അഡ്മിനിസ്ട്രേഷൻ വിലയിരുത്തുന്നത്.

അതേസമയം, മറ്റ് പ്രവിശ്യകളിൽ നിന്നുള്ള ജീവനക്കാരെ പങ്കാളികളാക്കുന്നതിൽ പ്രായോഗികവും നിയമപരവുമായ ചില പരിമിതികളുണ്ടെന്ന് ആൽബെർട്ടയിലെ മുൻ ചീഫ് ഇലക്ടറൽ ഓഫീസർ ലോൺ ഗിബ്‌സൺ അഭിപ്രായപ്പെട്ടു. പുറത്തുനിന്നുള്ള ഉദ്യോഗസ്ഥരുടെ യാത്രാ, താമസ ചെലവുകൾ സാമ്പത്തിക ബാധ്യത വർദ്ധിപ്പിക്കുമെന്നതും പോളിംഗ് കേന്ദ്രങ്ങളിൽ പ്രവർത്തിക്കുന്നവർ പ്രാദേശികമായി യോഗ്യതയുള്ളവരായിരിക്കണം എന്നും അദ്ദേഹം പറഞ്ഞു.  മറ്റ് ഉപതിരഞ്ഞെടുപ്പുകളുടെ ചുമതലകൾ കൂടി വരുന്നതോടെ റെഫറണ്ടം കൂടുതൽ വെല്ലുവിളി നിറഞ്ഞതാകാൻ സാധ്യതയുണ്ട്.