യു.എസ് സൈനികരെ വധിക്കുന്നവർക്ക് ഇനാം പ്രഖ്യാപിച്ച് ഇറാൻ; സ്ത്രീകൾക്ക് ഇരട്ടി പ്രതിഫലം

 

 

അമേരിക്കൻ സൈനികരെ വധിക്കുകയോ ജീവനോടെ പിടികൂടുകയോ ചെയ്യുന്നവർക്ക് 30,000 യു.എസ് ഡോളർ  പ്രതിഫലം നൽകുമെന്ന് ഇറാൻ സൈന്യം പ്രഖ്യാപിച്ചു. ഈ ദൗത്യം വിജയകരമായി പൂർത്തിയാക്കുന്ന ധീരരായ ഇറാനിയൻ സ്ത്രീകൾക്ക് പ്രതിഫലം ഇരട്ടിയായി നൽകുമെന്നും ഇറാൻ സൈനിക മേധാവി അമീർ ഹാതമി വ്യക്തമാക്കിയതായി ഔദ്യോഗിക വാർത്താ ഏജൻസിയായ ഐ.ആർ.എൻ.എ റിപ്പോർട്ട് ചെയ്തു. ഈ പദ്ധതി നടപ്പിലാക്കാൻ ആഗ്രഹിക്കുന്ന ധാരാളം ആളുകളിൽ നിന്ന് അഭ്യർത്ഥനകൾ ലഭിച്ചതിനെത്തുടർന്നാണ് ഇത്തരമൊരു തീരുമാനം കൈക്കൊണ്ടതെന്നും അദ്ദേഹം കൂട്ടിച്ചേർത്തു.

യു.എസ് സൈന്യം പേർഷ്യൻ ഗൾഫ്, ഒമാൻ ഉൾക്കടൽ, ഹോർമുസ് കടലിടുക്ക് എന്നിവിടങ്ങളിൽ പ്രവേശിക്കുന്നത് വിലക്കിയതായും ഇറാൻ ആവർത്തിച്ച് വ്യക്തമാക്കി. ഫെബ്രുവരി 28-ന് അമേരിക്കയും ഇസ്രായേലും ചേർന്ന് ഇറാന് നേരെ നടത്തിയ ആക്രമണത്തോടെയാണ് ഇരുരാജ്യങ്ങളും തമ്മിലുള്ള യുദ്ധം ആരംഭിച്ചത്. തുടർന്ന് ഏപ്രിലിൽ താൽക്കാലിക വെടിനിർത്തൽ നിലവിൽ വന്നുവെങ്കിലും ജൂണിൽ നടന്ന സമാധാന ചർച്ചകൾ പരാജയപ്പെടുകയായിരുന്നു. യുദ്ധത്തിൽ ഇതുവരെ 17 യു.എസ് സൈനികർ കൊല്ലപ്പെട്ടിട്ടുണ്ടെങ്കിലും, ഇവരെല്ലാം ഇറാന് പുറത്തുള്ള ജോർദാൻ, ഇറാഖ് തുടങ്ങിയ രാജ്യങ്ങളിലാണ് വധിക്കപ്പെട്ടത്.

നിലവിൽ ഇറാൻ്റെ മണ്ണിൽ യു.എസ് സൈന്യത്തിൻ്റെ സാന്നിധ്യമൊന്നുമില്ലെങ്കിലും, ഹോർമുസ് കടലിടുക്കിലും ദക്ഷിണ ഇറാനിലും ഇരുവിഭാഗങ്ങളും തമ്മിൽ ഇടവിട്ടുള്ള ഏറ്റുമുട്ടലുകൾ തുടരുകയാണ്. ഏപ്രിലിൽ വെടിവെച്ചിട്ട എഫ്-15 യുദ്ധവിമാനത്തിലെ ഉദ്യോഗസ്ഥനെ രക്ഷപ്പെടുത്താൻ 200-ഓളം അമേരിക്കൻ സൈനികരും വിമാനങ്ങളും പങ്കെടുത്ത വലിയൊരു രക്ഷാദൗത്യം ഇറാന്റെ അതിർത്തിക്കുള്ളിൽ നടന്നിരുന്നു. അമേരിക്കൻ സൈനിക സാന്നിധ്യത്തെ പ്രതിരോധിക്കാനുള്ള തന്ത്രത്തിന്റെ ഭാഗമായാണ് ഇറാന്റെ ഈ പുതിയ പ്രതിഫല പ്രഖ്യാപനത്തെ നിരീക്ഷകർ വിലയിരുത്തുന്നത്.