ഇന്ധന നികുതി ഇളവ് നീട്ടണമെന്ന് പ്രധാനമന്ത്രി മാർക്ക് കാർണിയോട് ആവശ്യപ്പെട്ട് പിയറി പൊയിലീവ്‌റെ

 

 

കാനഡയിൽ പെട്രോളിനും ഡീസലിനും ഏർപ്പെടുത്തിയിരിക്കുന്ന ഫെഡറൽ എക്സൈസ് നികുതി ഇളവ് വരാനിരിക്കുന്ന ലേബർ ഡേയ്ക്കു ശേഷവും (സെപ്റ്റംബർ 7) തുടരണമെന്ന് കൺസർവേറ്റീവ് പാർട്ടി നേതാവ് പിയറി പൊയിലീവ്‌റ ആവശ്യപ്പെട്ടു. കുറഞ്ഞത് 2027-ലെ കാനഡ ഡേ വരെയെങ്കിലും നികുതി ഒഴിവാക്കണമെന്നാണ് പ്രധാനമന്ത്രി മാർക്ക് കാർണിക്ക് അയച്ച കത്തിൽ അദ്ദേഹം ഉന്നയിച്ചിരിക്കുന്നത്.

വർദ്ധിച്ചുവരുന്ന ജീവിതച്ചെലവും പണപ്പെരുപ്പവും കാരണം ജനങ്ങൾ കടുത്ത സാമ്പത്തിക പ്രതിസന്ധിയിലാണ്. ഈ സാഹചര്യത്തിൽ നികുതി വീണ്ടും ഏർപ്പെടുത്തുന്നത് പെട്രോൾ വില മാത്രമല്ല, നിത്യോപയോഗ സാധനങ്ങളുടെയും ഭക്ഷണസാധനങ്ങളുടെയും വില വർദ്ധിക്കാൻ ഇടയാക്കുമെന്നും പൊയിലീവ്‌റെ ചൂണ്ടിക്കാട്ടി. ഏപ്രിൽ മാസം മുതൽ നടപ്പിലാക്കിയ നികുതി ഇളവ് മൂലം ലിറ്ററിന് 10 സെൻ്റ് വരെ ഇന്ധനവിലയിൽ ആശ്വാസം ലഭിച്ചിരുന്നു. നിലവിൽ കാനഡയിലെ ശരാശരി പെട്രോൾ വില ലിറ്ററിന് 1.67 കനേഡിയൻ ഡോളറിലേക്ക് ഉയർന്ന സാഹചര്യമാണുള്ളത്. ഇറാൻ സംഘർഷവും ഹോർമുസ് കടലിടുക്കിലെ ഗതാഗത തടസ്സങ്ങളും കാരണമാണ് അന്താരാഷ്ട്ര വിപണിയിൽ അസംസ്കൃത എണ്ണവില വർദ്ധിക്കുന്നത്. 

പൊയിലീവ്‌റയ്ക്ക് പുറമേ ഒൻ്റാരിയോ പ്രീമിയർ ഡഗ് ഫോർഡും നികുതി ഇളവ് ദീർഘിപ്പിക്കണമെന്ന് ആവശ്യപ്പെട്ടിട്ടുണ്ട്. എന്നാൽ നികുതി ഇളവ് ദീർഘിപ്പിക്കുന്നതിനെക്കുറിച്ച് ധനമന്ത്രാലയം വ്യക്തമായ മറുപടി നൽകിയിട്ടില്ല. വിപണിയിലെ വിലക്കയറ്റം തടയാൻ മുൻ ബജറ്റുകളിലൂടെയും മറ്റ് പദ്ധതികളിലൂടെയും സർക്കാരുകൾ നടപടികൾ സ്വീകരിക്കുന്നുണ്ടെന്നാണ് ഔദ്യോഗിക വിശദീകരണം.