ഇന്ധന എക്സൈസ് നികുതി ഇളവ് അവസാനിക്കുന്നു: കാനഡയിൽ അടുത്ത മാസത്തോടെ ഗ്യാസ് വില വർദ്ധിച്ചേക്കും

ഫെഡറൽ സർക്കാർ പ്രഖ്യാപിച്ച താത്കാലിക ഇന്ധന എക്സൈസ് നികുതി ഇളവിൻ്റെ കാലാവധി അവസാനിക്കുന്നതോടെ കാനഡയിൽ അടുത്ത മാസം മുതൽ പെട്രോൾ, ഡീസൽ വില വർദ്ധിക്കാൻ സാധ്യതയെന്ന് റിപ്പോർട്ട്. വർദ്ധിച്ചുവരുന്ന ജീവിതച്ചെലവിനും ഇന്ധനവിലക്കയറ്റത്തിനും ആശ്വാസമെന്നോണം നടപ്പിലാക്കിയ നികുതിയിളവിന്റെ ആനുകൂല്യമാണ് വരുന്ന സെപ്റ്റംബർ ഏഴോടെ പൂർത്തിയാകുന്നത്. കാലാവധി നീട്ടിനൽകിയില്ലെങ്കിൽ തൊട്ടടുത്ത ദിവസം മുതൽ ഉപഭോക്താക്കൾ ഇന്ധനത്തിന് കൂടുതൽ തുക നൽകേണ്ടി വരുമെന്ന് സാമ്പത്തിക വിദഗ്ധർ ചൂണ്ടിക്കാട്ടുന്നു.

പെട്രോളിന് ലിറ്ററിന് 10 സെൻ്റും ഡീസലിന് നാല് സെൻ്റും വീതം ഒഴിവാക്കി നൽകിയ എക്സൈസ് നികുതി ഇളവ് പുനഃസ്ഥാപിക്കപ്പെടുന്നതോടെ വിപണിയിൽ പെട്ടെന്നുള്ള വിലവർദ്ധനവ് പ്രതിഫലിക്കും. ഇതോടൊപ്പം ഇന്ധനത്തിന്മേലുള്ള ജി.എസ്.ടി  തുകയിലും വർദ്ധനവുണ്ടാകും. പ്രവിശ്യാതലത്തിൽ ഈടാക്കുന്ന മറ്റ് നികുതികൾക്കും അന്താരാഷ്ട്ര വിപണിയിലെ ക്രൂഡ് ഓയിൽ വിലയിലെ വ്യതിയാനങ്ങൾക്കും പുറമെയാണ് ഈ ഫെഡറൽ നികുതി വർദ്ധനവ് നടപ്പിലാകാൻ പോകുന്നത്. ഇത് ദൈനംദിന ഗതാഗതത്തെയും ചരക്കുനീക്കത്തെയും ഒരുപോലെ ബാധിക്കും.

ഇന്ധനവിലയിലുണ്ടാകുന്ന പെട്ടെന്നുള്ള വർദ്ധനവ് രാജ്യത്തെ വിതരണ ശൃംഖലയെയും  അവശ്യസാധനങ്ങളുടെ വില നിലവാരത്തെയും സ്വാധീനിക്കുമെന്ന ആശങ്കയിലാണ് പൊതുജനങ്ങളും വ്യാപാര മേഖലയും. ആഗോള വിപണി അസ്ഥിരമായി തുടരുന്ന സാഹചര്യത്തിൽ ജനങ്ങൾക്ക് ആശ്വാസം നൽകാൻ ഇളവുകളുടെ കാലാവധി നീട്ടുന്ന കാര്യത്തിൽ സർക്കാർ തലത്തിൽ അന്തിമ തീരുമാനമൊന്നും പുറത്തുവന്നിട്ടില്ല. നികുതി പുനഃസ്ഥാപിക്കപ്പെടുന്നതോടെ വരും ആഴ്ചകളിൽ ഇന്ധന സ്റ്റേഷനുകളിൽ കടുത്ത തിരക്ക് അനുഭവപ്പെടാനും സാധ്യതയുണ്ട്.