ആൽബർട്ടയിലെ മഞ്ഞുകാലം സൂപ്പറാകുമോ? സൂപ്പർ എൽനിനോ വരുന്നു

ശക്തമായ 'സൂപ്പർ എൽ നിനോ' പ്രതിഭാസത്തെ തുടർന്ന് വരാനിരിക്കുന്ന ശൈത്യകാലത്ത് ആൽബർട്ടയിൽ വലിയ കാലാവസ്ഥാ വ്യതിയാനങ്ങൾക്ക് സാധ്യതയെന്ന് എൻവയോൺമെൻ്റ് ആൻഡ് ക്ലൈമറ്റ് ചേഞ്ച് കാനഡയിലെ ഗവേഷകർ മുന്നറിയിപ്പ് നൽകി. സാധാരണയായി സമുദ്രോപരിതലത്തിലെ താപനില രണ്ട് ഡിഗ്രി സെൽഷ്യസിലധികം ഉയരുമ്പോഴാണ് ഇതിനെ 'സൂപ്പർ എൽ നിനോ' എന്ന് വിളിക്കുന്നത്. എന്നാൽ ഇത്തവണ സമുദ്രത്തിലെ താപനില മൂന്ന് ഡിഗ്രി സെൽഷ്യസിനേക്കാൾ ഉയരാൻ സാധ്യതയുണ്ടെന്നും, കഴിഞ്ഞ 100 വർഷത്തിനിടയിലെ ഏറ്റവും ശക്തമായ എൽ നിനോ ആയിരിക്കും ഇതെന്നുമാണ് ശാസ്ത്രജ്ഞർ വ്യക്തമാക്കുന്നത്.

ആൽബർട്ടയിൽ ഇത്തവണത്തെ ശൈത്യകാലത്ത് സാധാരണയേക്കാൾ രണ്ട് ഡിഗ്രി സെൽഷ്യസ് വരെ താപനില ഉയരാൻ സാധ്യതയുണ്ട്. കഠിനമായ തണുപ്പിന് പകരം താരതമ്യേന ചൂടേറിയ കാലാവസ്ഥയായിരിക്കും ഇവിടെ അനുഭവപ്പെടുക. റോക്കി പർവ്വതനിരകൾക്ക് സമീപമുള്ള പ്രദേശങ്ങളിൽ ശൈത്യകാലത്ത് ലഭിക്കേണ്ട മഞ്ഞുവീഴ്ചയുടെ അളവ് ഗണ്യമായി കുറയാൻ ഇടയുണ്ട്. താപനില ഉയരുന്നത് കാരണം പർവ്വതനിരകളിലെ മഞ്ഞുപാളികൾ വസന്തകാലത്തിൻ്റെ തുടക്കത്തിൽ തന്നെ അതിവേഗം ഉരുകിത്തീരും.

മഞ്ഞുവീഴ്ച കുറയുന്നതും വസന്തകാലത്തെ ഉയർന്ന ചൂടും കർഷകർക്കും വരൾച്ച നേരിടുന്ന പ്രദേശങ്ങൾക്കും തിരിച്ചടിയാകും. മഴ ലഭിച്ചില്ലെങ്കിൽ വരും വർഷങ്ങളിൽ കടുത്ത വരൾച്ച നേരിടേണ്ടി വരും. ശാന്തസമുദ്രത്തിലെ ചൂട് ഡിസംബറോടെയായിരിക്കും പരമാവധി ഉയർന്ന നിലയിൽ എത്തുന്നത്. എങ്കിലും, ഇത്തവണത്തെ എൽ നിനോയുടെ തീവ്രത കാരണം ശരത്കാലത്തിൻ്റെ അവസാനത്തോടെ തന്നെ കാനഡയിൽ ഇതിൻ്റെ മാറ്റങ്ങൾ കണ്ടുതുടങ്ങും. കൂടാതെ, എൽ നിനോയുടെ ആഘാതവും ആഗോളതാപനവും ചേർന്ന് അടുത്ത വർഷങ്ങളിൽ ലോകത്താകമാനമുള്ള ശരാശരി താപനില മുൻ റെക്കോർഡുകളെല്ലാം ഭേദിക്കാൻ സാധ്യതയുണ്ടെന്നും ശാസ്ത്രജ്ഞർ മുന്നറിയിപ്പ് നൽകുന്നു.