യുഎസിൽ കുട്ടികൾക്കുള്ള കോവിഡ് വാക്സിന് എഫ്ഡിഎയുടെ അംഗീകാരം 

അഞ്ച് മുതൽ 11 വയസ്സുവരെയുള്ള കുട്ടികൾക്കുള്ള ഫൈസർ-ബയോൺടെക്കിന്റെ കോവിഡ്  വാക്സിൻ യുഎസ് ഫുഡ് ആൻഡ് ഡ്രഗ് അഡ്മിനിസ്ട്രേഷൻ അംഗീകരിച്ചു. കുട്ടികളിൽ കോവിഡ് തടയുന്നതിൽ വാക്സിൻ 90 ശതമാനത്തിലധികം ഫലപ്രദമാണെന്നും ഗുരുതരമായ പാർശ്വഫലങ്ങളൊന്നും കണ്ടെത്തിയില്ലെന്നും എഫ് ഡിഎ സ്ഥിരീകരിച്ചു. മുതിർന്നവർക്ക് നൽകുന്ന ഡോസിന്റെ മൂന്നിലൊന്ന് ശതമാനം ശക്തി ഉള്ളതാണ്   ഫൈസറിന്റെ പീഡിയാട്രിക് വാക്സിൻ. രണ്ടു ഡോസായി മൂന്ന് ആഴ്ച ഇടവേളയിൽ ആയിരിക്കും കുട്ടികൾക്ക് നൽകുക. എഫ്ഡിഎ അംഗീകരിച്ചുവെങ്കിലും യുഎസ് സെന്റർസ് ഫോർ ഡിസീസ് കൺട്രോൾ ആൻഡ് പ്രിവൻഷൻ (സിഡിസി) അംഗീകാരത്തിന് ശേഷം മാത്രമേ  കുട്ടികൾക്ക് വാക്സിനുകൾ നൽകിത്തുടങ്ങുകയുള്ളു.

കുട്ടികൾക്കായുള്ള  പീഡിയാട്രിക് വാക്‌സിന്റെ ഫൈസറിന്റെ അപേക്ഷ ഹെൽത്ത് കാനഡ ഇപ്പോഴും പരിശോധിച്ചുവരികയാണെന്നും അധികം വൈകാതെ തീരുമാനം ഉണ്ടാവുമെന്നും ഹെൽത്ത് കാനഡ  ചീഫ് മെഡിക്കൽ അഡൈ്വസർ ഡോ.സുപ്രിയ ശർമ്മ വെള്ളിയാഴ്ച  പത്രസമ്മേളനത്തിൽ അറിയിച്ചു.