2027-ടെ പണപ്പെരുപ്പത്തിനും വായ്പാഭാരത്തിനും ആശ്വാസമാകുമെന്ന് സിഐബിസി റിപ്പോർട്ട്

നിലവിലെ ഉയർന്ന ജീവിതച്ചെലവും പണപ്പെരുപ്പവും കാരണം സാമ്പത്തിക പ്രതിസന്ധി നേരിടുന്ന കാനഡക്കാർക്ക് 2027 ഓടെ ആശ്വാസം ലഭിച്ചുതുടങ്ങുമെന്ന് സിഐബിസിയുടെ (CIBC) പുതിയ സാമ്പത്തിക റിപ്പോർട്ട്. 2026 ഒരു മാറ്റത്തിൻ്റെ വർഷമായിരിക്കുമെന്നും, 2027-ഓടെ ഉപഭോക്താക്കളെ തളർത്തുന്ന പല സാമ്പത്തിക നിയന്ത്രണങ്ങളും അവസാനിക്കുമെന്നും ബാങ്കിൻ്റെ മുതിർന്ന സാമ്പത്തിക വിദഗ്ധ കത്രീന ജഡ്ജ് അഭിപ്രായപ്പെട്ടു.

'അൺഷാക്കിൾഡ്? ഹൗ ദ കോൺസ്ട്രെയിൻ്റ്സ് ഓൺ കനേഡിയൻ കൺസ്യൂമേഴ്സ് ഷുഡ് ലൂസൺ ഇൻ 27' എന്ന തലക്കെട്ടിൽ പുറത്തിറക്കിയ റിപ്പോർട്ടിൽ സീനിയർ എക്കണോമിസ്റ്റുകളായ ആൻഡ്രൂ ഗ്രാൻ്റം, കത്രീന ജഡ്ജ് എന്നിവരാണ് വിശദാംശങ്ങൾ പങ്കുവെച്ചിരിക്കുന്നത്.  ഇന്ധനവിലയിലുണ്ടായ വർദ്ധനവ്, കോവിഡ് കാലത്തിനു ശേഷം ഉയർന്ന പലിശനിരക്കിൽ ഭവനവായ്പകൾ  പുതുക്കേണ്ടി വന്നത് തുടങ്ങിയ പ്രതിസന്ധികൾ 2027-ഓടെ ലഘൂകരിക്കപ്പെടുമെന്ന് റിപ്പോർട്ട് വ്യക്തമാക്കുന്നു.

ഉൽപ്പന്നങ്ങളുടെ വില പെട്ടെന്ന് കുറയില്ലെങ്കിലും, സാധനങ്ങളും സേവനങ്ങളും വാങ്ങാൻ ജനങ്ങൾക്ക് കൂടുതൽ സാമ്പത്തികശേഷി ലഭിക്കും.മിഡിൽ ഈസ്റ്റിലെ സംഘർഷങ്ങൾ കാരണം ഇന്ധനവില ഉയർന്നുനിൽക്കുന്നത് സാധാരണക്കാരെ കാര്യമായി ബാധിച്ചിട്ടുണ്ട്. എന്നാൽ കാനഡ സർക്കാരിൻ്റെ 'കാനഡ ഗ്രോസറീസ് ആൻഡ് എസൻഷ്യൽസ് ബെനിഫിറ്റ്' പോലുള്ള സാമ്പത്തിക സഹായങ്ങൾ ഉപഭോക്താക്കൾക്ക് താങ്ങാവുന്നുണ്ട്. വരും മാസങ്ങളിൽ ഇന്ധനവില കുറയുകയാണെങ്കിൽ 2027-ഓടെ ജനങ്ങളുടെ കയ്യിൽ കൂടുതൽ പണം ലഭ്യമാകും.

2026-ൽ ഉയർന്ന പലിശനിരക്കിൽ മോർട്ട്ഗേജ് പുതുക്കേണ്ടി വന്നത് പല വീടുകളുടെയും സാമ്പത്തിക നിലയെ ബാധിച്ചിരുന്നു. എന്നാൽ 2027-ഓടെ പലിശ നിരക്കുകൾ കൂടുതൽ സ്ഥിരതയുള്ളതാകുമെന്നും ബാങ്ക് ഓഫ് കാനഡയുടെ വായ്പാ നയങ്ങളിൽ വരുന്ന മാറ്റങ്ങൾ ഉപഭോക്താക്കളുടെ ഭാരം കുറയ്ക്കുമെന്നുമാണ് പ്രതീക്ഷ. യുഎസുമായുള്ള നിലവിലെ വ്യാപാര ചർച്ചകൾ വിജയകരമാവുകയും പുതിയ താരിഫുകൾ വരാതിരിക്കുകയും ചെയ്താൽ തൊഴിൽ വിപണി കൂടുതൽ ശക്തമാകും. കാനഡയിലെ തൊഴിലില്ലായ്മ നിരക്ക് 2027-ൻ്റെ രണ്ടാം പകുതിയോടെ ആറ് ശതമാനത്തിൽ താഴെയായി കുറയുമെന്നാണ് സിഐബിസി കണക്കാക്കുന്നത്. ഇത്തരം അനുകൂല സാഹചര്യങ്ങൾ ഉണ്ടാകുന്നതോടെ, അവശ്യസാധനങ്ങൾ വാങ്ങുന്നതിനൊപ്പം വിനോദത്തിനും മറ്റ് ആവശ്യങ്ങൾക്കുമായി പണം ചെലവഴിക്കാൻ ജനങ്ങൾക്ക് സാധിക്കുമെന്നും റിപ്പോർട്ടിലുണ്ട്.