ആൽബർട്ടയിൽ ഭാഗിക സൂര്യഗ്രഹണം ദൃശ്യമായി: അപൂർവ ആകാശക്കാഴ്ചയ്ക്ക് സാക്ഷ്യം വഹിച്ച് ജനങ്ങൾ

 

കാനഡയിലെ ആൽബർട്ടയിൽ ബുധനാഴ്ച രാവിലെ ഭാഗിക സൂര്യഗ്രഹണം ദൃശ്യമായി. കാൽഗറിയിലും പരിസര പ്രദേശങ്ങളിലുമുള്ള ആയിരക്കണക്കിന് ആളുകളാണ് സൂര്യനെ ചന്ദ്രൻ ഭാഗികമായി മറയ്ക്കുന്ന അപൂർവ ആകാശക്കാഴ്ചയ്ക്ക് സാക്ഷ്യം വഹിച്ചത്. തെളിഞ്ഞ കാലാവസ്ഥയായിരുന്നതിനാൽ സംരക്ഷണ ഗ്ലാസുകൾ ഉപയോഗിച്ച് ആൾക്കാർക്ക് ഗ്രഹണം വ്യക്തമായി കാണാൻ സാധിച്ചു.

രാവിലെ സൂര്യോദയത്തിന് തൊട്ടുപിന്നാലെയാണ് ഗ്രഹണം ആരംഭിച്ചത്. കാൽഗറിയിൽ രാവിലെ 7:45 ഓടെയായിരുന്നു ഗ്രഹണം ഏറ്റവും വ്യക്തമായി ദൃശ്യമാത്. ഒരു മണിക്കൂറിലധികം നീണ്ടുനിന്ന പ്രതിഭാസം കാണാൻ തുറസ്സായ സ്ഥലങ്ങളിൽ വൻ ജനക്കൂട്ടം തടിച്ചുകൂടി. കാൽഗറിക്ക് പുറമെ എഡ്മണ്ടൺ, റെഡ് ഡിയർ എന്നീ പ്രദേശങ്ങളിലും ഗ്രഹണം ദൃശ്യമായിരുന്നു.
തദ്ദേശീയ സ്കൂളുകളും സയൻസ് ക്ലബ്ബുകളും ചേർന്ന് പൊതുജനങ്ങൾക്കായി ഗ്രഹണം കാണാനുള്ള സൗകര്യങ്ങൾ ഒരുക്കിയിരുന്നു. ആൽബർട്ട അസ്ട്രോണമിക്കൽ സൊസൈറ്റി ഗ്രഹണ നിരീക്ഷണത്തിന് നേതൃത്വം നൽകി.

സൂര്യനെ നേരിട്ട് നോക്കുന്നത് കണ്ണിന് ആഘാതമുണ്ടാക്കുമെന്നതിനാൽ പ്രത്യേക എക്ലിപ്സ് ഗ്ലാസുകളും പിൻഹോൾ പ്രൊജക്ടറുകളും ഉപയോഗിച്ചാണ് ആളുകൾ ഗ്രഹണം വീക്ഷിച്ചത്.ആൽബർട്ടയിൽ ഇനി ഒരു പൂർണ്ണ സൂര്യഗ്രഹണം ദൃശ്യമാകാൻ 2044 വരെ കാത്തിരിക്കേണ്ടി വരുമെന്ന് അസ്ട്രോണമി വിദഗ്ദ്ധർ വ്യക്തമാക്കി. ഫോട്ടോഗ്രാഫർമാർ ചന്ദ്രക്കലയുടെ ആകൃതിയിലുള്ള സൂര്യൻ്റെ മനോഹരമായ ചിത്രങ്ങൾ പകർത്തി. നഗരത്തിൽ ഗതാഗത തടസ്സങ്ങൾ ഉണ്ടാകാതിരിക്കാൻ കാൽഗറി പോലീസും മുൻകരുതലുകൾ സ്വീകരിച്ചിരുന്നു. രാവിലെയോടെ അവസാനിച്ച ഗ്രഹണം, പ്രദേശവാസികൾക്കും കുട്ടികൾക്കും വേറിട്ടൊരു അനുഭവമായി മാറി.