എൻക്രിപ്റ്റഡ് മെസേജിങ് ആപ്പുകൾ ഉപയോഗിച്ച് കൗമാരക്കാരെ ക്രിമിനൽ പ്രവർത്തനങ്ങൾക്കായി റിക്രൂട്ട് ചെയ്യുന്ന സംഘങ്ങൾ പോലീസിന് തലവേദനയാകുന്നു

എൻക്രിപ്റ്റഡ് മെസേജിങ് ആപ്പുകൾ ഉപയോഗിച്ച് കൗമാരക്കാരെ ക്രിമിനൽ പ്രവർത്തനങ്ങൾക്കായി റിക്രൂട്ട് ചെയ്യുന്ന സംഘങ്ങൾ പോലീസിന് വലിയ തലവേദനയാകുന്നു. കാനഡയിലെ ടൊറൻ്റോയിൽ യു.എസ് എംബസിക്ക് നേരെയും, ജൂത വിദ്യാലയങ്ങൾക്ക് നേരെയും നടന്ന വെടിവെപ്പുകളടക്കമുള്ള സംഭവങ്ങളിൽ ഇത്തരത്തിൽ യുവാക്കളെ ഉപയോഗിച്ചതായാണ് പോലീസ് സംശയിക്കുന്നത്.

ക്രിമിനൽ സംഘങ്ങളുടെ സൂത്രധാരന്മാർ ആരെന്ന് പോലും അറിയാതെയാണ് ഇത്തരം ആപ്പുകൾ വഴി ബന്ധപ്പെടുന്ന കൗമാരക്കാർ കുറ്റകൃത്യങ്ങൾക്ക് ഇറങ്ങിത്തിരിക്കുന്നത്. അതിനാൽ തന്നെ പിടിയിലാകുന്ന കൗമാരക്കാരിൽ നിന്ന് പ്രധാന പ്രതികളിലേക്ക് എത്താൻ പോലീസിന് കഴിയുന്നില്ലെന്ന് വിദഗ്ധർ ചൂണ്ടിക്കാണിക്കുന്നു. കൂടാതെ, പ്രായപൂർത്തിയാകാത്തവർക്ക് കടുത്ത ശിക്ഷ ലഭിക്കില്ലെന്നതും കുറ്റവാളികൾ മുതലെടുക്കുന്നുണ്ട്.

യു.എസ് എംബസിക്ക് നേരെ വെടിവെച്ച സംഭവത്തിൽ 19-ഉം 15-ഉം വയസ്സുള്ള രണ്ട് കൗമാരക്കാരെ ടൊറൻ്റോ പോലീസ് അടുത്തിടെ അറസ്റ്റ് ചെയ്തിരുന്നു. ഡിജിറ്റൽ യുഗത്തിലെ ഇത്തരം കുറ്റകൃത്യങ്ങൾ തടയാൻ പോലീസിന് കൂടുതൽ അധികാരങ്ങൾ നൽകുന്ന ഫെഡറൽ സർക്കാരിൻ്റെ  'ബിൽ സി-22' (പാസാക്കേണ്ടതിൻ്റെ ആവശ്യകത ടൊറൻ്റോ പോലീസ് ചീഫ് മൈറോൺ ഡെംകിവ് വ്യക്തമാക്കി. എൻക്രിപ്റ്റഡ് ആപ്പുകൾ നിരീക്ഷിക്കാനുള്ള അധികാരം പോലീസിന് ലഭിച്ചില്ലെങ്കിൽ അത് ജനങ്ങളുടെ സുരക്ഷയെ ബാധിക്കുമെന്നും അദ്ദേഹം കൂട്ടിച്ചേർത്തു.

എന്നാൽ, ബിൽ സി-22 നിലവിൽ വരുന്നതോടെ സാധാരണക്കാരായ പൗരന്മാരുടെ സ്വകാര്യത നഷ്ടപ്പെടുമെന്നും വിവരങ്ങൾ ചോരാൻ സാധ്യതയുണ്ടെന്നും സാങ്കേതികവിദ്യാ വിദഗ്ദ്ധർ മുന്നറിയിപ്പ് നൽകി. പോലീസ് അന്വേഷണങ്ങൾക്ക് ഇത്തരം സാങ്കേതികവിദ്യകൾ തടസ്സമാണെങ്കിലും പൗരന്മാരുടെ സ്വകാര്യത സംരക്ഷിക്കേണ്ടതും പ്രധാനമാണെന്ന് ഇവർ ചൂണ്ടിക്കാണിക്കുന്നു. നിയമപരമായ വഴികൾക്കൊപ്പം, കുട്ടികളെ ഇൻ്റർനെറ്റിലെ കെണികളിൽ നിന്ന് സംരക്ഷിക്കാൻ രക്ഷിതാക്കളുടെ ഇടപെടലും സ്കൂളുകൾ കേന്ദ്രീകരിച്ചുള്ള ബോധവൽക്കരണവും അത്യന്താപേക്ഷിതമാണെന്ന് സാമൂഹിക വിദഗ്ധർ അഭിപ്രായപ്പെട്ടു.