പുതിയ ഫോണുകൾ വാങ്ങുമ്പോൾ സൂക്ഷിക്കുക.... പുതിയ തട്ടിപ്പ് രീതിയുമായി പണംതട്ടുന്ന സംഘം സജീവം

 

ടൊറൻ്റോയിൽ മൊബൈൽ കമ്പനികളുടെ പ്രതിനിധികളെന്ന വ്യാജേന ഉപഭോക്താക്കളെ വഞ്ചിച്ച് വിലകൂടിയ മൊബൈൽ ഫോണുകളും സ്മാർട്ട്‌വാച്ചുകളും ടാബ്‌ലെറ്റുകളും കൈക്കലാക്കുന്ന തട്ടിപ്പ് സംഘങ്ങൾക്കെതിരെ മുന്നറിയിപ്പുമായി പോലീസ്. ടൊറൻ്റോ പോലീസ് പുറത്തുവിട്ട വിവരമനുസരിച്ച്, സമാനമായ രീതിയിൽ സാമ്പത്തിക നഷ്ടം സംഭവിച്ച നിരവധി ആളുകളാണ് പരാതികളുമായി രംഗത്തെത്തിയിരിക്കുന്നത്. ഉപഭോക്താക്കളുടെ യഥാർത്ഥ അക്കൗണ്ട് വിവരങ്ങളും ബില്ലിംഗ് വിവരങ്ങളും തട്ടിപ്പുകാർ നേരത്തെ തന്നെ കൈവശപ്പെടുത്തുന്നതിനാൽ, വരുന്നത് ഔദ്യോഗിക കമ്പനിയിൽ നിന്നുള്ള വിളിയാണെന്ന് ഇരകൾ തെറ്റിദ്ധരിക്കപ്പെടുകയാണെന്ന് അന്വേഷണ ഉദ്യോഗസ്ഥർ വ്യക്തമാക്കുന്നു.

വലിയ ഡിസ്‌കൗണ്ടുകളോ സൗജന്യ ഫോണുകളോ വാഗ്ദാനം ചെയ്ത ശേഷം, കമ്പനിയുടെ ഔദ്യോഗിക വെബ്‌സൈറ്റോ ആപ്പോ വഴി ഉപഭോക്താക്കളെക്കൊണ്ട് നേരിട്ട് ഓർഡർ ചെയ്യിപ്പിക്കുന്നതാണ് ഇവരുടെ പ്രവർത്തന രീതി. ഓർഡർ ചെയ്ത ഫോൺ ഉപഭോക്താവിൻ്റെ വീട്ടിൽ എത്തിയ ഉടൻ തന്നെ തട്ടിപ്പുകാരൻ വീണ്ടും വിളിച്ച്, അയച്ച ഫോണിൻ്റെ മോഡൽ മാറിപ്പോയെന്നോ സാങ്കേതിക പിഴവ് സംഭവിച്ചെന്നോ അറിയിക്കും. തുടർന്ന് ഫോൺ തിരികെ അയക്കാനായി ഒരു പ്രീ-പെയ്ഡ് ഷിപ്പിംഗ് ലേബൽ ഇമെയിൽ വഴിയോ തപാൽ വഴിയോ നൽകും. എന്നാൽ ഈ ലേബലിലുള്ള വിലാസം കമ്പനിയുടേതാകില്ല, മറിച്ച് തട്ടിപ്പുകാർക്ക് ഫോൺ കൈക്കലാക്കാൻ സാധിക്കുന്ന ഏതെങ്കിലും മൂന്നാം കക്ഷിയുടെ വിലാസമായിരിക്കും.

പലപ്പോഴും വീട്ടുടമസ്ഥർ അറിയാതെ തന്നെ ഈ വിലാസങ്ങളിൽ എത്തുന്ന പാർസലുകൾ തട്ടിപ്പുകാർ കൈവശപ്പെടുത്താറാണ് പതിവ്. സാധനം തിരികെ അയച്ചതായി കരുതുന്ന ഉപഭോക്താവ്, വാസ്തവത്തിൽ തട്ടിപ്പുകാരന് പുതിയ ഫോൺ സ്വന്തം ചെലവിൽ വാങ്ങി നൽകിയ അവസ്ഥയിലാണ് എത്തിച്ചേരുന്നത്. ഇത്തരത്തിലുള്ള അപരിചിതമായ ഓഫർ വിളികൾ ലഭിച്ചാൽ ഉടൻ ഫോൺ കട്ട് ചെയ്യണമെന്നും, ബില്ലിൽ നൽകിയിട്ടുള്ള ഔദ്യോഗിക നമ്പറിൽ നേരിട്ട് ബന്ധപ്പെട്ട് അക്കൗണ്ട് സുരക്ഷിതമാണെന്ന് ഉറപ്പുവരുത്തണമെന്നും പോലീസ് പൊതുജനങ്ങളോട് അഭ്യർത്ഥിച്ചു.