ഡോണൾഡ് ട്രംപിൻ്റെ അക്കൗണ്ടുകൾ റദ്ദാക്കിയത് പണമിടപാടുകളിലെ സംശയത്തെത്തുടർന്ന്: രാഷ്ട്രീയ ലക്ഷ്യങ്ങളില്ലെന്ന് ക്യാപിറ്റൽ വൺ

 

യു.എസ് പ്രസിഡൻ്റ് ഡോണൾഡ് ട്രംപിൻ്റെ ബാങ്ക് അക്കൗണ്ടുകൾ 2021-ൽ റദ്ദാക്കിയത് കള്ളപ്പണം വെളുപ്പിക്കൽ തടയുന്നതിനുള്ള  സുരക്ഷാ മാനദണ്ഡങ്ങൾ മുൻനിർത്തിയാണെന്നും ഇതിൽ രാഷ്ട്രീയ ലക്ഷ്യങ്ങളില്ലെന്നും രാജ്യാന്തര ബാങ്കിംഗ് സ്ഥാപനമായ ക്യാപിറ്റൽ വൺ  കോടതിയെ അറിയിച്ചു. 2021 ജനുവരി ആറിലെ കാപ്പിറ്റോൾ ആക്രമണത്തിന് ശേഷം രാഷ്ട്രീയ വിരോധം മുൻനിർത്തി തങ്ങളുടെ അക്കൗണ്ടുകൾ റദ്ദാക്കി  എന്ന് ആരോപിച്ച് ട്രംപിൻ്റെ കമ്പനി സമർപ്പിച്ച ഹർജി തള്ളണമെന്ന് ആവശ്യപ്പെട്ട് സമർപ്പിച്ച സത്യവാങ്മൂലത്തിലാണ് ബാങ്ക് ഇക്കാര്യം വ്യക്തമാക്കിയത്. മാസങ്ങൾ നീണ്ട ആഭ്യന്തര അന്വേഷണങ്ങൾക്കും വിപുലമായ പരിശോധനകൾക്കും ശേഷമാണ് നിർദ്ദിഷ്ട മാനദണ്ഡങ്ങൾ പാലിച്ചുകൊണ്ട് അക്കൗണ്ടുകൾ അടച്ചുപൂട്ടാൻ തീരുമാനിച്ചതെന്ന് ബാങ്ക് ചൂണ്ടിക്കാട്ടി.

രാഷ്ട്രീയ കാരണങ്ങളാൽ ഉപഭോക്താക്കൾക്കുള്ള സേവനങ്ങൾ റദ്ദാക്കുന്നുവെന്ന് ആരോപിച്ച് ക്യാപിറ്റൽ വണ്ണിന് പുറമെ ജെ.പി മോർഗൻ ചേസിനെതിരെയും  ട്രംപ് നിയമനടപടി സ്വീകരിച്ചിട്ടുണ്ട്. എന്നാൽ തങ്ങളുടെ ബിസിനസ് സ്ഥാപനത്തിൻ്റെ പ്രതിച്ഛായയ്ക്കോ സാമ്പത്തിക-നിയമ വ്യവസ്ഥകൾക്കോ അപകടമുണ്ടാക്കുന്ന സാഹചര്യങ്ങളിലാണ് അക്കൗണ്ടുകൾ റദ്ദാക്കാറുള്ളതെന്നും, ഇത്തരം തീരുമാനങ്ങൾക്ക് പിന്നിൽ രാഷ്ട്രീയ താത്പര്യങ്ങളില്ലെന്നും ഇരു ബാങ്കുകളും വ്യക്തമാക്കി. അതേസമയം, വൻകിട ബാങ്കുകൾ ട്രംപിനും കുടുംബത്തിനും സ്ഥാപനങ്ങൾക്കുമെതിരെ ബോധപൂർവം വിവേചനം കാണിക്കുകയാണെന്ന് ട്രംപിൻ്റെ ലീഗൽ ടീം ആരോപിച്ചു. ഇത്തരം വിവേചനങ്ങൾ തടയുന്നതിനായി സാമ്പത്തിക സ്ഥാപനങ്ങൾക്കെതിരെ 2025 ഓഗസ്റ്റിൽ ട്രംപ് എക്സിക്യൂട്ടീവ് ഉത്തരവ് പുറപ്പെടുവിക്കുകയും ചെയ്തിരുന്നു.

ഗോൾഫ് കോഴ്‌സുകളും വൈനറിയും അടക്കം ട്രംപിൻ്റെ വൈവിധ്യമാർന്ന ബിസിനസ് സംരംഭങ്ങളുമായി ബന്ധപ്പെട്ട മുന്നൂറിലധികം ബാങ്ക് അക്കൗണ്ടുകളാണ് ക്യാപിറ്റൽ വൺ അടച്ചുപൂട്ടിയത്. ഒരു പതിറ്റാണ്ടിലേറെയായി തുടരുന്ന പങ്കാളിത്തം അവസാനിപ്പിക്കുമ്പോൾ, പുതിയ ബാങ്കിംഗ് സൗകര്യങ്ങൾ കണ്ടെത്തുന്നതിനായി ട്രംപിൻ്റെ സ്ഥാപനങ്ങൾക്ക് ആവശ്യത്തിന് സാവകാശം അനുവദിച്ചിരുന്നുവെന്നും ബാങ്ക് വ്യക്തമാക്കി. ഈ നടപടികളൊന്നും പരസ്യപ്പെടുത്താതെ തികച്ചും നിയമാനുസൃതമായ രഹസ്യസ്വഭാവത്തോടെയാണ് പൂർത്തിയാക്കിയതെന്നും, രാഷ്ട്രീയ പ്രേരിതമായി പ്രവർത്തിച്ചിട്ടില്ലെന്നും ക്യാപിറ്റൽ വൺ കോടതിയിൽ ആവർത്തിച്ചു.