കതായ്‌ബ് ഹിസ്ബുള്ളയെ ഭീകരസംഘടനയായി പ്രഖ്യാപിക്കണം: സർക്കാരിനോട് കനേഡിയൻ പ്രതിപക്ഷ നേതാവ്

 

ഇറാൻ്റെ പിന്തുണയോടെ പ്രവർത്തിക്കുന്ന ഇറാഖി സായുധ ഗ്രൂപ്പായ 'കതായ്‌ബ് ഹിസ്ബുള്ള'യെ കാനഡയുടെ ഔദ്യോഗിക ഭീകരസംഘടനകളുടെ പട്ടികയിൽ ഉൾപ്പെടുത്തണമെന്ന് കനേഡിയൻ പ്രതിപക്ഷ നേതാവും കൺസർവേറ്റീവ് പാർട്ടി അധ്യക്ഷനുമായ പിയറെ പൊയ്ലീവ്രെ ആവശ്യപ്പെട്ടു. ടൊറൻ്റോയിലെ ജൂത ആരാധനാലയത്തിനും  യു.എസ് കോൺസുലേറ്റിനും നേരെ നടന്ന ആക്രമണങ്ങൾക്ക് പിന്നിൽ കതായ്‌ബ് ഹിസ്ബുള്ളയ്ക്ക് പങ്കുണ്ടെന്ന വിദേശ അന്വേഷണ ഏജൻസികളുടെ വെളിപ്പെടുത്തലിന് പിന്നാലെയാണ് പ്രതിപക്ഷം നിലപാട് കടുപ്പിച്ചത്. വിഷയത്തിൽ അടിയന്തര ഇടപെടൽ ആവശ്യപ്പെട്ട് അദ്ദേഹം രാജ്യത്തെ പൊതുസുരക്ഷാ മന്ത്രി ഗാരി ആനന്ദസംഗരിക്ക് കത്തയച്ചു.

കാനഡ ഉൾപ്പെടെയുള്ള പാശ്ചാത്യ രാജ്യങ്ങളിൽ ആക്രമണങ്ങൾക്ക് പദ്ധതിയിട്ട കതായ്‌ബ് ഹിസ്ബുള്ളയുടെ മുതിർന്ന കമാൻഡർ മുഹമ്മദ് ബഖർ സാദ് ദാവൂദ് അൽ സാദിയെ യു.എസ് ജസ്റ്റിസ് ഡിപ്പാർട്ട്മെൻ്റ് നിയമനടപടികൾക്ക് വിധേയനാക്കിയതോടെയാണ് സുരക്ഷാ ഭീഷണിയുടെ വ്യാപ്തി വ്യക്തമായത്. ടൊറൻ്റോയിലെ തന്ത്രപ്രധാന കേന്ദ്രങ്ങൾ ലക്ഷ്യമിട്ട് നടന്ന ഭീകരപ്രവർത്തനങ്ങളിൽ ഇറാൻ്റെ സായുധ ഗ്രൂപ്പുകളുടെ നേരിട്ടുള്ള പങ്കാളിത്തമാണ് ഇതിലൂടെ പുറത്തുവന്നിരിക്കുന്നത്. രാജ്യത്തിൻ്റെ പരമാധികാരത്തിനും പൊതുജനസുരക്ഷയ്ക്കും ഭീഷണിയാകുന്ന ഇത്തരം ശക്തികൾക്കെതിരെ കാനഡ കർശന നടപടി സ്വീകരിക്കേണ്ട സമയം അതിക്രമിച്ചതായി പൊയ്ലീവ്രെ നിരീക്ഷിച്ചു.

കതായ്‌ബ് ഹിസ്ബുള്ളയെ നിരോധിത സംഘടനകളുടെ പട്ടികയിൽ ഉൾപ്പെടുത്തുന്നതിലൂടെ ഇവരുടെ സാമ്പത്തിക സ്രോതസ്സുകൾ മരവിപ്പിക്കാനും നിയമവിരുദ്ധ പ്രവർത്തനങ്ങൾ തടയാനും സുരക്ഷാ ഏജൻസികൾക്ക് പൂർണ്ണ നിയമസാധുത ലഭിക്കും. യുണൈറ്റഡ് സ്റ്റേറ്റ്സ് ഇതിനോടകം തന്നെ കതായ്‌ബ് ഹിസ്ബുള്ളയെ ഭീകരസംഘടനയായി പ്രഖ്യാപിച്ചിട്ടുണ്ട്. ഭീകരവാദ വിരുദ്ധ നയങ്ങൾ കൂടുതൽ ശക്തമാക്കണമെന്നും കാനഡയുടെ മണ്ണ് വിദേശ തീവ്രവാദ ശക്തികളുടെ താവളമാകാൻ അനുവദിക്കരുതെന്നും ആവശ്യപ്പെട്ട് രാജ്യത്തെ പ്രമുഖ ജൂത കൂട്ടായ്മകളും കനേഡിയൻ ഭരണകൂടത്തിന്മേൽ സമ്മർദ്ദം ശക്തമാക്കിയിട്ടുണ്ട്.