ദക്ഷിണ ആൽബർട്ടയിൽ വ്യത്യസ്ത അപകടങ്ങളിലായി രണ്ട് യുവാക്കൾ മുങ്ങിമരിച്ചു

 

 

ദക്ഷിണ ആൽബർട്ടയിൽ ശനിയാഴ്ച ഉണ്ടായ വെവ്വേറെ അപകടങ്ങളിൽ രണ്ട് യുവാക്കൾ മുങ്ങിമരിച്ചതായി റോയൽ കനേഡിയൻ മൗണ്ടഡ് പോലീസ് അറിയിച്ചു. കാൽഗറിക്ക് തെക്കുകിഴക്കുള്ള നേച്ചേഴ്സ് ഹൈഡ്‌വേ ക്യാമ്പ് ഗ്രൗണ്ടിന് സമീപമായിരുന്നു ആദ്യ സംഭവം നടന്നത്. ഉച്ചയ്ക്ക് 12.23-ഓടെ ഹൈവുഡ് നദിയിലേക്ക് പാറക്കെട്ടിൽ നിന്ന് എടുത്തുചാടിയ 35-കാരനാണ് മുങ്ങിമരിച്ചത്. മെക്സിക്കോ സ്വദേശിയായ ഇയാൾ ബന്ധുക്കളെ സന്ദർശിക്കാൻ എത്തിയതായിരുന്നു. പോലീസും ഫയർഫോഴ്സും ഹെലികോപ്റ്റർ മാർഗ്ഗം തിരച്ചിൽ നടത്തി മൃതദേഹം കണ്ടെത്തുകയായിരുന്നു.

രണ്ടാമത്തെ അപകടം വൈകുന്നേരം 5.45-ഓടെ കാൻമോറിലെ ക്വാറി ലേക്കിലാണ് ഉണ്ടായത്. തടാകത്തിൽ നീന്തുന്നതിനിടെ അപകടത്തിൽപ്പെട്ട റോക്കി വ്യൂ കൗണ്ടി സ്വദേശിയായ 33-കാരനാണ് മരിച്ചത്. ഇയാൾ ലൈഫ് ജാക്കറ്റ് ധരിച്ചിരുന്നില്ലെന്ന് ദൃക്‌സാക്ഷികൾ പറഞ്ഞു. രക്ഷാപ്രവർത്തകർ വെള്ളത്തിനടിയിൽ നിന്ന് കണ്ടെത്തുമ്പോഴേക്കും ഇയാൾ മരണപ്പെട്ടിരുന്നു.
അപകടസാധ്യതകൾ ഏറെയായതിനാൽ പാറക്കെട്ടുകളിൽ നിന്ന് വെള്ളത്തിലേക്ക് ചാടരുതെന്നും വെള്ളത്തിലിറങ്ങുമ്പോൾ സുരക്ഷാ മുൻകരുതലുകൾ പാലിക്കണമെന്നും പോലീസ് മുന്നറിയിപ്പ് നൽകി.