അജ്ഞാത പേടകത്തിൻ്റെ ഓർമ്മകൾ ബാക്കിയാക്കി ലോറി വിക്കൻസ് മടങ്ങി

കാനഡയിൽ ഏറ്റവും കൂടുതൽ ചർച്ച ചെയ്യപ്പെട്ട പറക്കുംതളിക (UFO) സംഭവത്തിന് സാക്ഷിയായ ലോറി വിക്കൻസ് (76) അന്തരിച്ചു. 1967 ഒക്ടോബറിൽ നോവാ സ്കോഷ്യയിലെ ഷാഗ് ഹാർബറിൽ അജ്ഞാത വസ്തു കടലിൽ വീണത് ആദ്യമായി കണ്ട് അധികൃതരെ അറിയിച്ചത് അന്നത്തെ പതിനേഴുകാരനായ ലോറിയായിരുന്നു.

1967 ഒക്ടോബർ നാലിന് രാത്രി സുഹൃത്തുക്കൾക്കൊപ്പം കാറിൽ യാത്ര ചെയ്യുമ്പോഴാണ് ആകാശത്ത് വിചിത്രമായ വെളിച്ചങ്ങൾ മിന്നിമറയുന്നത് 17-കാരനായ ലോറിയുടെ ശ്രദ്ധയിൽപ്പെട്ടത്. തുടർന്ന്, ആ അജ്ഞാത വസ്തു കടലിൽ പതിക്കുകയായിരുന്നു. ഉടൻതന്നെ ലോറി പൊലീസിനെ (RCMP) വിവരമറിയിച്ചു. ആദ്യം പൊലീസ് വിശ്വസിച്ചില്ലെങ്കിലും, പിന്നീട് പ്രദേശത്തെ മറ്റ് ആളുകളും സമാനമായ കാഴ്ച്ച കണ്ടതായി റിപ്പോർട്ട് ചെയ്തതോടെ അധികൃതർ തിരച്ചിൽ ആരംഭിക്കുകയായിരുന്നു.

കടലിൽ വീണ വസ്തുവിനായി പ്രദേശവാസികളും പൊലീസും സൈന്യവും ചേർന്ന് വിപുലമായ തിരച്ചിൽ നടത്തിയെങ്കിലും ഒന്നും കണ്ടെത്താനായില്ല. എന്നാൽ, വെള്ളത്തിനു മുകളിൽ ദുർഗന്ധം വമിക്കുന്ന മഞ്ഞനിറത്തിലുള്ള പത ഉയരുന്നത് കാണപ്പെട്ടിരുന്നു. ഈ പ്രദേശം വിമാന അപകടങ്ങൾ ഒന്നും നടക്കാത്ത ഇടമായതിനാൽ, കനേഡിയൻ പ്രതിരോധ മന്ത്രാലയം പോലും ഇതിനെ 'അജ്ഞാത പറക്കും വസ്തു'  എന്ന ഗണത്തിലാണ് ഔദ്യോഗികമായി രേഖപ്പെടുത്തിയത്.

വർഷങ്ങൾക്കിപ്പുറവും ഈ സംഭവത്തിൻ്റെ പ്രധാന സാക്ഷിയായി നിലകൊണ്ടത് ലോറിയായിരുന്നു. പിന്നീട് ഈ സംഭവത്തെ ആസ്പദമാക്കി രൂപീകരിച്ച 'ഷാഗ് ഹാർബർ യു.എഫ്.ഒ സൊസൈറ്റി'യുടെയും മ്യൂസിയത്തിൻ്റെയും മുൻനിരയിൽ അദ്ദേഹം പ്രവർത്തിച്ചു. ലോറിയുടെ നിരന്തരമായ ശ്രമഫലമായി 2019-ൽ കനേഡിയൻ റോയൽ മിൻ്റ്, ഷാഗ് ഹാർബർ സംഭവത്തെ അനുസ്മരിച്ച് പ്രത്യേക നാണയവും പുറത്തിറക്കിയിരുന്നു.
............