കാനഡയില് മുന് എംപി രാജ് ഗ്രേവാളിനെതിരെ ഗുരുതര സാമ്പത്തിക ആരോപണങ്ങള്; ഓഗസ്റ്റ് 14 ന് നിര്ണായക വാദം
By: 600002 On: Aug 1, 2026, 6:39 PM
പ്രസാദ് തീയാടിക്കല്
ടൊറന്റോ: കാനഡയിലെ മുന് ലിബറല് എംപിയും അഭിഭാഷകനുമായ രാജ് ഗ്രേവാളിനെതിരെ കോടിക്കണക്കിന് ഡോളറിന്റെ സാമ്പത്തിക ക്രമക്കേടുകള് ഉള്പ്പെടെയുള്ള ഗുരുതര ആരോപണങ്ങള് ഉയര്ന്നിരിക്കുകയാണ്. അനുമതിയില്ലാതെ മോര്ട്ട്ഗേജുകള് രജിസ്റ്റര് ചെയ്തതും, ട്രസ്റ്റ് അക്കൗണ്ടിലെ പണം ദുരുപയോഗം ചെയ്തതും, മോര്ട്ട്ഗേജ് തട്ടിപ്പില് പങ്കുണ്ടെന്നുമുള്ള ആരോപണങ്ങളാണ് അദ്ദേഹത്തിനെതിരെ ഉന്നയിച്ചിരിക്കുന്നത്.
കോടതിയില് സമര്പ്പിച്ച രേഖകള് പ്രകാരം, തര്ക്കവിഷയമായ കോടിക്കണക്കിന് ഡോളര് തിരിച്ചുനല്കാമെന്ന് വായ്പ നല്കിയവരോട് രാജ് ഗ്രേവാള് വാഗ്ദാനം ചെയ്തെങ്കിലും, അതിന് പകരമായി തന്നെ Law Society of Ontario-യിലോ പോലീസിലോ പരാതി നല്കാതിരിക്കണമെന്ന നിബന്ധന മുന്നോട്ടുവെച്ചുവെന്നാണ് ആരോപണം.
ഒരു വിഭാഗം സിവില് കേസുകളില് ഏകദേശം 17 മില്യണ് ഡോളറിന്റെ അവകാശവാദങ്ങളാണുള്ളത്. ഇതുമായി ബന്ധപ്പെട്ട മറ്റ് സിവില് കേസുകളും തര്ക്കങ്ങളും ചേര്ത്ത് നോക്കുമ്പോള് തുക 100 മില്യണ് ഡോളര് വരെ എത്തുന്നുവെന്നാണ് റിപ്പോര്ട്ടുകള്.
പൊതുജനങ്ങള്ക്ക് അപകടസാധ്യതയുണ്ടെന്ന് ചൂണ്ടിക്കാട്ടി രാജ് ഗ്രേവാളിന്റെ അഭിഭാഷക ലൈസന്സ് ഇടക്കാലത്തേക്ക് സസ്പെന്ഡ് ചെയ്യണമെന്നാവശ്യപ്പെട്ട് Law Society of Ontario ട്രൈബ്യൂണലിനെ സമീപിച്ചിട്ടുണ്ട്. ഈ ഹര്ജിയില് ഓഗസ്റ്റ് 14-ന് വാദം കേള്ക്കും. ഇതിനിടെ പോലീസ് അന്വേഷണംയും വിവിധ സിവില് കേസുകളും തുടരുകയാണ്.