മുൻ ലിബറൽ എം.പി രാജ് ഗ്രെവാളിനെതിരെ സാമ്പത്തിക ക്രമക്കേട് ആരോപണം: അഭിഭാഷക ലൈസൻസ് റദ്ദാക്കാൻ നീക്കം

 

ലോ സൊസൈറ്റി ഓഫ് ഒൻ്റാരിയോയിൽ പരാതി നൽകിയില്ലെങ്കിൽ കടം വാങ്ങിയ തുക തിരികെ നൽകാമെന്ന് മുൻ കാനഡ ലിബറൽ പാർട്ടിയുടെ പാർലമെൻ്റ് അംഗമായിരുന്ന രാജ് ഗ്രെവാൾ വായ്പ നൽകിയവർക്ക് മുന്നിൽ നിബന്ധന വെച്ചതായി ഗുരുതര ആരോപണം. ഗ്രെവാളിൻ്റെ അഭിഭാഷക ലൈസൻസ് റദ്ദാക്കുന്നതിനായി ലോ സൊസൈറ്റി സമർപ്പിച്ച ഔദ്യോഗിക നിയമരേഖകളിലാണ് ഈ വിവരങ്ങൾ വ്യക്തമാക്കുന്നത്. പണം തിരികെ ലഭിക്കുന്നതിനായി ശ്രമിക്കുന്ന നിക്ഷേപകരെയും വായ്പാദാതാക്കളെയും സ്വാധീനിച്ച് തനിക്കെതിരെയുള്ള നിയമനടപടികൾ തടയാനാണ് അദ്ദേഹം ശ്രമിച്ചതെന്ന് കാനഡയിലെ നിയമ നിയന്ത്രണ ഏജൻസി വാദിക്കുന്നു.

റിയൽ എസ്റ്റേറ്റ് ഇടപാടുകളുമായി ബന്ധപ്പെട്ട് ദശലക്ഷക്കണക്കിന് ഡോളറിൻ്റെ തട്ടിപ്പ് നടത്തിയെന്നാരോപിച്ച് ഗ്രെവാളിനും അദ്ദേഹത്തിന്റെ മുൻ നിയമ സ്ഥാപനത്തിനുമെതിരെ നിലവിൽ അന്വേഷണം നടക്കുന്നുണ്ട്. എന്നാൽ, നിയമ നിർവ്വഹണ ഏജൻസികളെയോ ലോ സൊസൈറ്റിയെയോ സമീപിക്കില്ലെന്ന് ഉറപ്പുനൽകിയാൽ മാത്രമേ പണം തിരിച്ചടയ്ക്കൂ എന്ന വ്യവസ്ഥ വെച്ചത് തൊഴിൽപരമായ ധാർമ്മികതയുടെ കടുത്ത ലംഘനമാണെന്ന് കോടതിരേഖകൾ ചൂണ്ടിക്കാണിക്കുന്നു. സാമ്പത്തിക ബാധ്യതകൾ മറികടക്കാൻ അനധികൃത മാർഗ്ഗങ്ങൾ ഉപയോഗിച്ചത് പൊതുജന താല്പര്യങ്ങൾക്ക് കനത്ത ഭീഷണിയാണെന്നും റിപ്പോർട്ടിൽ പറയുന്നു.

ബ്രാംപ്ടൺ ഈസ്റ്റ് മണ്ഡലത്തിൽ നിന്നുള്ള മുൻ ജനപ്രതിനിധിയായ ഗ്രെവാൾ, മുൻപും സാമ്പത്തിക തട്ടിപ്പുകളിലും അന്വേഷണങ്ങളിലും ഉൾപ്പെട്ടിട്ടുള്ള വ്യക്തിയാണ്. നിലവിലെ നിയമവിരുദ്ധമായ ഇടപെടലുകളുടെയും സാമ്പത്തിക ക്രമക്കേടുകളുടെയും പശ്ചാത്തലത്തിൽ, പൊതുജന സുരക്ഷയും നിയമസംവിധാനത്തിന്റെ സുതാര്യതയും മുൻനിർത്തി അദ്ദേഹത്തിന് അഭിഭാഷകനായി തുടരാനുള്ള ലൈസൻസ് അടിയന്തരമായി റദ്ദാക്കണമെന്ന് ലോ സൊസൈറ്റി ട്രൈബ്യൂണൽ എജൻസിയോട് ആവശ്യപ്പെട്ടിട്ടുണ്ട്.