ഡാലസ്ഫോര്ട്ട് വര്ത്ത് മാര്ത്തോമാ സഭയുടെ സ്വര്ണ്ണ ജൂബിലി സമാപന പൊതു സമ്മേളനം ശനിയാഴ്ച; അഞ്ച് ഇടവകകള് വിശ്വാസത്തിന്റെ അമ്പത് വര്ഷങ്ങള് ആഘോഷിക്കുന്നു
By: 600002 On: Aug 1, 2026, 7:55 AM
പി. പി. ചെറിയാന്
ഡാളസ്: ഡാലസ്ഫോര്ട്ട് വര്ത്ത് മാര്ത്തോമാ സഭയുടെ സ്വര്ണ്ണ ജൂബിലി ആഘോഷങ്ങളുടെ സമാപന പൊതു സമ്മേളനം മാര്ത്തോമാ ചര്ച്ച് ഓഫ് ഡാളസ് (ഫാര്മേഴ്സ് ബ്രാഞ്ച്) ഇടവകയില് വെച്ച് ഓഗസ്റ്റ് 01 ശനിയാഴ്ച വൈകുന്നേരം 5:30 ന് നടത്തപ്പെടുന്നു. മാര്ത്തോമാ സഭയുടെ പരമാധ്യക്ഷന് മോസ്റ്റ് റവ. ഡോ. തിയോഡോഷ്യസ് മാര്ത്തോമാ മെത്രാപ്പോലീത്ത സമാപന സമ്മേളനങ്ങളില് മുഖ്യാതിഥിയായി പങ്കെടുക്കും.
ടെക്സസ് സംസ്ഥാനത്തെ ഡാലസ്ഫോര്ട്ട് വര്ത്ത് (DFW) മേഖലയിലെ മലങ്കര മാര്ത്തോമാ സഭയുടെ അമ്പത് വര്ഷത്തെ വിശ്വാസയാത്ര സ്വര്ണ്ണ ജൂബിലി ആഘോഷങ്ങളിലൂടെ പുതിയ ചരിത്രം കുറിക്കുകയാണ്. 1973-ല് ഏതാനും കുടുംബങ്ങളുടെ ചെറിയ പ്രാര്ത്ഥനാ കൂട്ടായ്മയായി ആരംഭിച്ച ഈ ആത്മീയ പ്രസ്ഥാനം ഇന്ന് അഞ്ച് സജീവ ഇടവകകളിലൂടെ ആയിരക്കണക്കിന് വിശ്വാസികളുടെ ആത്മീയ ജീവിതത്തിന് നേതൃത്വം നല്കുന്ന ശക്തമായ സഭാസമൂഹമായി വളര്ന്നിരിക്കുന്നു.
വിശുദ്ധ തോമാശ്ലീഹയുടെ പാരമ്പര്യം പിന്തുടരുന്ന മലങ്കര മാര്ത്തോമാ സുറിയാനി സഭ, പത്തൊന്പതാം നൂറ്റാണ്ടിലെ നവീകരണ പ്രസ്ഥാനത്തിലൂടെ ബൈബിളധിഷ്ഠിത വിശ്വാസവും പൗരസ്ത്യ ആരാധനാപാരമ്പര്യവും സമന്വയിപ്പിച്ച സഭയാണ്. കേരളത്തില് ആരംഭിച്ച ഈ ആത്മീയ പൈതൃകം ഇന്ന് ലോകമെമ്പാടുമുള്ള പ്രവാസി സമൂഹങ്ങളിലേക്കും വ്യാപിച്ചിരിക്കുകയാണ്. അതിലെ ഏറ്റവും ശ്രദ്ധേയമായ അധ്യായങ്ങളിലൊന്നാണ് ഡാലസ്ഫോര്ട്ട് വര്ത്ത് മേഖലയിലെ അമ്പത് വര്ഷത്തെ സഭാചരിത്രം.
1973-ല് സെന്റ് ലൂക്ക്സ് മെത്തഡിസ്റ്റ് ചര്ച്ചില് ഏതാനും മാര്ത്തോമാ കുടുംബങ്ങള് ഒരുമിച്ചുകൂടി വിശുദ്ധ കുര്ബാനയും ആരാധനയും ആരംഭിച്ചതോടെയാണ് ഡാലസ് മാര്ത്തോമാ സഭയുടെ ചരിത്രത്തിന് തുടക്കമായത്. പ്രവാസജീവിതത്തിനിടയിലും വിശ്വാസവും പാരമ്പര്യവും കാത്തുസൂക്ഷിക്കണമെന്ന ആഗ്രഹമാണ് ഈ കൂട്ടായ്മയ്ക്ക് അടിത്തറയായത്.
വിശ്വാസികളുടെ എണ്ണം വര്ധിച്ചതിനെ തുടര്ന്ന് 1976-ല് മലങ്കര മാര്ത്തോമാ സഭയുടെ എപ്പിസ്കോപ്പല് സിനഡ് ഈ കൂട്ടായ്മയെ ഔദ്യോഗിക ഇടവകയായി അംഗീകരിച്ചു. തുടര്ന്ന് ആരാധനകള് കൊക്രാന് മെത്തഡിസ്റ്റ് ചര്ച്ചിലേക്ക് മാറ്റി, സഭയുടെ പ്രവര്ത്തനങ്ങള് കൂടുതല് ക്രമബദ്ധവും വിപുലവുമാക്കി.
1980-കളില് തൊഴില്, വിദ്യാഭ്യാസം, ആരോഗ്യരംഗം, സാങ്കേതികവിദ്യ എന്നീ മേഖലകളിലെ അവസരങ്ങള് തേടി നിരവധി മലയാളി കുടുംബങ്ങള് ഡാലസ്ഫോര്ട്ട് വര്ത്ത് മേഖലയിലേക്ക് കുടിയേറിയതോടെ സഭയുടെ വളര്ച്ചയ്ക്ക് പുതിയ വേഗം ലഭിച്ചു. 1984 ഡിസംബര് 21-ന് ഗ്രാന്ഡ് പ്രയറിയില് ആദ്യ സ്ഥിരം ആരാധനാലയം സ്ഥാപിക്കപ്പെട്ടത് ഡാലസ് മാര്ത്തോമാ സഭയുടെ ചരിത്രത്തിലെ നിര്ണായക നാഴികക്കല്ലായി മാറി.
വിശ്വാസിസമൂഹം വികസിച്ചതോടെ ഡാലസ്ഫോര്ട്ട് വര്ത്ത് മേഖലയിലെ വിവിധ ഭാഗങ്ങളില് പുതിയ ഇടവകകള് രൂപീകരിക്കപ്പെട്ടു. ഇന്ന് ഈ പ്രദേശത്തെ മാര്ത്തോമാ സഭയുടെ വളര്ച്ചയെ പ്രതിനിധീകരിക്കുന്നത് അഞ്ച് പ്രധാന ഇടവകകളാണ്.
ഡാലസ് മേഖലയിലെ ആദ്യത്തെ പുതിയ ഇടവകയായി 1988-ല് സെന്റ് പോള്സ് മാര്ത്തോമാ ചര്ച്ച് രൂപീകരിക്കപ്പെട്ടു. കിഴക്കന് ഡാലസില് താമസിച്ചിരുന്ന മാര്ത്തോമാ വിശ്വാസികളുടെ ആത്മീയ ആവശ്യങ്ങള് നിറവേറ്റുന്നതിനായി ആരംഭിച്ച ഈ ഇടവക ഇന്ന് ശക്തമായ ആത്മീയ കേന്ദ്രമായി വളര്ന്നിരിക്കുന്നു.
1994-ല് ഫാര്മേഴ്സ് ബ്രാഞ്ചിലെ ലൂണ റോഡില് സ്വന്തമായി ദേവാലയം സ്ഥാപിച്ചതോടെ ഈ ഇടവക ഡാലസ് മേഖലയിലെ പ്രധാന ആരാധനാകേന്ദ്രങ്ങളിലൊന്നായി മാറി. ഡാലസ് നഗരത്തിന്റെ മധ്യഭാഗത്തുള്ള വിശ്വാസികളുടെ ആത്മീയ ജീവിതത്തില് ഈ ഇടവക നിര്ണായക പങ്ക് വഹിച്ചുവരുന്നു.
ഡാലസ്ഫോര്ട്ട് വര്ത്ത് മേഖലയിലെ വിശ്വാസികളുടെ വര്ധനവിനെ തുടര്ന്ന് ആദ്യ ഡാലസ് ഇടവകയുടെ പാരമ്പര്യം തുടര്ന്നുകൊണ്ട് കരോള്ടണില് പുതിയ ഇടവക രൂപംകൊണ്ടു. ഇന്ന് 1400 വെസ്റ്റ് ഫ്രാങ്ക്ഫോര്ഡ് റോഡിലുള്ള സ്വന്തം ദേവാലയത്തില് മലയാളത്തിലും ഇംഗ്ലീഷിലും വിശുദ്ധ കുര്ബാനയും ആരാധനയും, സണ്ഡേ സ്കൂള്, യുവജനസഖ്യം, കുടുംബശുശ്രൂഷ, ഇടവക മിഷന്, സംഗീതശുശ്രൂഷ തുടങ്ങി വിവിധ ആത്മീയ-സാമൂഹിക പ്രവര്ത്തനങ്ങള് സജീവമായി നടക്കുന്നു.
വടക്കുകിഴക്കന് ഡാലസ് മേഖലയിലെ വിശ്വാസികളുടെ ആവശ്യങ്ങള് പരിഗണിച്ച് 2004-ല് റിച്ചാര്ഡ്സണില് സെഹിയോന് മാര്ത്തോമാ ചര്ച്ച് ആരംഭിച്ചു. പിന്നീട് പ്ലാനോയില് സ്വന്തമായി ദേവാലയം നിര്മ്മിക്കുകയും 2009-ല് അത് സമര്പ്പിക്കുകയും ചെയ്തു. ഇന്ന് ഈ ഇടവക പ്രദേശത്തെ പ്രധാന ആത്മീയ കേന്ദ്രങ്ങളിലൊന്നാണ്.
2010-കളുടെ തുടക്കത്തില് വടക്കുപടിഞ്ഞാറന് ഡാലസ് മേഖലയിലെ വളര്ച്ചയെ തുടര്ന്നാണ് ക്രോസ് വേ മാര്ത്തോമാ ചര്ച്ച് രൂപംകൊണ്ടത്. യുവ കുടുംബങ്ങളുടെ സജീവ പങ്കാളിത്തം, ദ്വിഭാഷാ ആരാധന, സണ്ഡേ സ്കൂള്, യുവജനസഖ്യം, കുടുംബശുശ്രൂഷ, സാമൂഹിക സേവന പ്രവര്ത്തനങ്ങള് എന്നിവ ഈ ഇടവകയുടെ പ്രത്യേകതകളാണ്.
ഇന്ന് ഈ അഞ്ച് ഇടവകകളും ആരാധനാലയങ്ങള് മാത്രമല്ല; പ്രവാസി മലയാളി സമൂഹത്തിന്റെ ആത്മീയവും സാമൂഹികവും സാംസ്കാരികവുമായ ജീവിതത്തിന്റെ കേന്ദ്രങ്ങളാണ്. മലയാളത്തിലും ഇംഗ്ലീഷിലും ആരാധനകള് നടത്തുന്നതോടൊപ്പം സണ്ഡേ സ്കൂള്, യുവജനസഖ്യം, സ്ത്രീസമാജം, കുടുംബശുശ്രൂഷ, സംഗീതശുശ്രൂഷ, ജീവകാരുണ്യ പ്രവര്ത്തനങ്ങള് എന്നിവയിലൂടെ എല്ലാ തലമുറകളെയും സഭയുമായി ബന്ധിപ്പിക്കുന്ന പ്രവര്ത്തനങ്ങളാണ് ഇവ നടത്തിവരുന്നത്.
നോര്ത്ത് അമേരിക്കയൂറോപ്പ് ഭദ്രാസനത്തിന്റെ ഭാഗമായി പ്രവര്ത്തിക്കുന്ന ഈ ഇടവകകള് സഭയുടെ ആപ്തവാക്യമായ 'ഘശഴവലേറ ീേ ഘശഴവലേി' ജീവിതത്തില് പ്രാവര്ത്തികമാക്കിക്കൊണ്ട് വിശ്വാസത്തിലും സാക്ഷ്യത്തിലും സേവനത്തിലും മുന്നേറുകയാണ്.
1973-ല് തെളിയിച്ച വിശ്വാസത്തിന്റെ ചെറിയ ദീപം ഇന്ന് അഞ്ച് സജീവ ഇടവകകളിലൂടെ ഡാലസ്ഫോര്ട്ട് വര്ത്ത് മേഖലയിലാകെ പ്രകാശം പരത്തുകയാണ്. കരോള്ടണ് മാര്ത്തോമാ ചര്ച്ച്, സെന്റ് പോള്സ് മാര്ത്തോമാ ചര്ച്ച്, ഫാര്മേഴ്സ് ബ്രാഞ്ച് മാര്ത്തോമാ ചര്ച്ച്, സെഹിയോന് മാര്ത്തോമാ ചര്ച്ച്, ക്രോസ് വേ മാര്ത്തോമാ ചര്ച്ച് എന്നീ അഞ്ച് ഇടവകകളുടെ സംയുക്ത ശുശ്രൂഷയാണ് ഈ അമ്പത് വര്ഷത്തെ വളര്ച്ചയുടെ ഏറ്റവും വലിയ നേട്ടം.
സ്വര്ണ്ണ ജൂബിലി ആഘോഷങ്ങള് ഭൂതകാലത്തെ അനുസ്മരിക്കുന്ന ചടങ്ങ് മാത്രമല്ല; ദൈവത്തിന്റെ വഴിനടത്തലിനുള്ള നന്ദിപ്രകടനവും, സഭയുടെ പൈതൃകം അടുത്ത തലമുറയിലേക്ക് കൈമാറാനുള്ള പുതിയ പ്രതിജ്ഞയുമാണ്. അഞ്ച് പതിറ്റാണ്ടുകളുടെ വിശ്വാസവും സേവനവും സാക്ഷ്യവഹിച്ച ഡാലസ്ഫോര്ട്ട് വര്ത്ത് മാര്ത്തോമാ സമൂഹം വരുംകാലത്തും അതേ ആത്മീയ ഊര്ജത്തോടെ മുന്നേറുമെന്ന പ്രത്യാശയോടെയാണ് ഈ സ്വര്ണ്ണ ജൂബിലി ആഘോഷിക്കുന്നത്.