സോഷ്യല് മീഡിയ വിവാദവുമായി ബന്ധപ്പെട്ട മുന് പ്രിന്സിപ്പലിനെ വീണ്ടും നിയമിക്കണമെന്ന ഹര്ജി യു.എസ് കോടതി തള്ളി
By: 600002 On: Jul 30, 2026, 6:25 PM
പി പി ചെറിയാന്
ഫോര്ട്ട് വര്ത്തു( ഡാളസ്): സോഷ്യല് മീഡിയ പോസ്റ്റുകളുമായി ബന്ധപ്പെട്ട വിവാദത്തെത്തുടര്ന്ന് വെസ്റ്റേണ് ഹില്സ് ഹൈസ്കൂള് പ്രിന്സിപ്പല് സ്ഥാനത്തുനിന്ന് മാറ്റിയ ഷൈമ അല്സുബിയെ തിരികെ പ്രിന്സിപ്പലായി നിയമിക്കണമെന്ന ആവശ്യപ്പെടല് യു.എസ് ഫെഡറല് കോടതി തള്ളി. ഇസ്ലാമിക ശരീഅത്ത് നിയമങ്ങളെക്കുറിച്ചും 'ബ്ലാക്ക് ലൈവ്സ് മാറ്റര്' പ്രസ്ഥാനത്തെ പിന്തുണച്ചും ഇവര് മുമ്പ് പങ്കുവെച്ച പോസ്റ്റുകളാണ് വിവാദത്തിനിടയാക്കിയത്.
തന്നെ ഉടന് തന്നെ പഴയ പദവിയില് തിരിച്ചെടുക്കണമെന്ന് ആവശ്യപ്പെട്ട് ഷൈമ സമര്പ്പിച്ച ഹര്ജി നിരസിച്ച ജഡ്ജി മാര്ക്ക് പിറ്റ്മാന്, ഇവരുടെ ഒന്നാം ഭരണഘടനാ ഭേദഗതി അധിഷ്ഠിതമായ വാദങ്ങള്ക്ക് വിജയിക്കാനുള്ള സാധ്യത കുറവാണെന്ന് നിരീക്ഷിച്ചു. ഷൈമയുടെ ജോലി നഷ്ടപ്പെട്ടിട്ടില്ലെന്നും, അവര്ക്ക് ഉയര്ന്ന ശമ്പളമുള്ള മറ്റു ചുമതലകളാണ് നല്കിയിട്ടുള്ളതെന്നും കോടതി ചൂണ്ടിക്കാട്ടി.
സ്കൂളിനും ജീവനക്കാര്ക്കും നേരെ ഭീഷണികള് ഉയര്ന്നതിനാലാണ് സുരക്ഷ മുന്നിര്ത്തി ഇവരെ മാറ്റിയതെന്നാണ് സ്കൂള് ഡിസ്ട്രിക്റ്റിന്റെ വിശദീകരണം. തിരിച്ചെടുക്കണമെന്ന ഹര്ജി തള്ളിയെങ്കിലും, കേസ് ഇപ്പോഴും കോടതിയുടെ പരിഗണനയിലുണ്ട്.