ചാരവൃത്തി കേസിൽ ബെൽജിയത്തിൽ അറസ്റ്റിലായ നാറ്റോ ഇൻ്റേൺ കനേഡിയൻ വനിത ബിവെയ് ഷാങ് എന്ന് തിരിച്ചറിഞ്ഞു

 

ബെൽജിയത്തിലെ നാറ്റോ  സൈനിക ആസ്ഥാനത്ത് ചാരവൃത്തി നടത്തിയെന്ന സംശയത്തിൽ കഴിഞ്ഞ ആഴ്ച അറസ്റ്റിലായ കനേഡിയൻ യുവതിയെ  തിരിച്ചറിഞ്ഞു. സിസ്റ്റംസ് എൻജിനീയറും സാമ്പത്തിക ശാസ്ത്രജ്ഞയുമായ ബിവെയ് ഷാങ് എന്ന യുവതിയാണ് അറസ്റ്റിലായതെന്ന് റിപ്പോർട്ടുകൾ വ്യക്തമാക്കുന്നു.  പ്രൊഫഷണൽ രംഗത്ത് ക്ലെയർ ഷാങ് എന്ന് അറിയപ്പെടുന്ന ഇവർ മുൻപ് കനേഡിയൻ സ്പേസ് ഏജൻസി, സ്റ്റാറ്റിസ്റ്റിക്സ് കാനഡ തുടങ്ങിയ പ്രമുഖ ഫെഡറൽ സ്ഥാപനങ്ങളിലും ലോക വ്യാപാര സംഘടനയിലും പ്രവർത്തിച്ചിരുന്നതായി സ്ഥിരീകരിച്ചിട്ടുണ്ട്.

ബെൽജിയത്തിലെ മോൺസിലുള്ള നാറ്റോയുടെ സുപ്രീം ഹെഡ്ക്വാർട്ടേഴ്സ് അലൈഡ് പവേഴ്സ് യൂറോപ്പിൻ്റെ ഐടി വിഭാഗത്തിൽ ഇൻ്റേണായി സേവനമനുഷ്ഠിച്ചു വരികയായിരുന്നു ഇവർ. കഴിഞ്ഞ വ്യാഴാഴ്ച ബിവെയ് ഷാങ്ങിൻ്റെ വസതിയിലും ഓഫീസിലും പരിശോധന നടത്തിയ ബെൽജിയൻ സുരക്ഷാ സേന തൊട്ടടുത്ത ദിവസം ഇവരുടെ അറസ്റ്റ് രേഖപ്പെടുത്തുകയായിരുന്നു. ചാരവൃത്തി നടത്തൽ, ക്രിമിനൽ സംഘങ്ങളിൽ പങ്കാളിയാകൽ തുടങ്ങിയ ഗുരുതരമായ കുറ്റങ്ങളാണ് ഇവർക്കെതിരെ ചുമത്തിയിട്ടുള്ളത്. കേസിൽ കൂടുതൽ അന്വേഷണം നടക്കുന്നതിനാൽ പ്രതിയെ ഒരു മാസത്തേക്ക് കൂടി റിമാൻഡ് ചെയ്തിരിക്കുകയാണ്.

കനേഡിയൻ പൗരത്വമുള്ള ചൈനീസ് വംശജയായ ബിവെയ് ഷാങ്ങിൻ്റെ അറസ്റ്റ് കാനഡയുടെ പൗരത്വ-സുരക്ഷാ പരിശോധനാ സംവിധാനങ്ങളെക്കുറിച്ചുള്ള വലിയ ചോദ്യങ്ങൾ ഉയർത്തിയിട്ടുണ്ട്. കാനഡയിലെ അതീവ സുരക്ഷാ പ്രാധാന്യമുള്ള സ്ഥാപനങ്ങളിൽ ഇവർ ജോലി ചെയ്തിരുന്ന സാഹചര്യത്തിൽ, സുരക്ഷാ പരിശോധനകളിൽ വീഴ്ച പറ്റിയിട്ടുണ്ടോ എന്ന് സമഗ്രമായി അന്വേഷിക്കുമെന്ന് കനേഡിയൻ പബ്ലിക് സേഫ്റ്റി മന്ത്രി  വ്യക്തമാക്കി. അന്താരാഷ്ട്ര ഏജൻസികളിലേക്ക് പൗരന്മാരെ നിയമിക്കുന്നതിന് മുൻപുള്ള സുരക്ഷാ പശ്ചാത്തല അന്വേഷണത്തിൽ കടുത്ത വീഴ്ചയുണ്ടായോ എന്ന കാര്യം കനേഡിയൻ ഭരണകൂടം ഗൗരവമായി പരിശോധിച്ചു വരികയാണ്.