5,000 ഒഴിവുകൾ, ലഭിച്ചത് 50,000 അപേക്ഷകൾ; ടൊറൻ്റോ സിഎൻഇ ജോബ് ഫെയറിൽ ജോലി തേടി എത്തിയത് ആയിരങ്ങൾ

കനേഡിയൻ നാഷണൽ എക്സിബിഷനിൽ (CNE) ജോലി തേടി ഈ വർഷവും എത്തിയത് ആയിരങ്ങൾ. ഓഗസ്റ്റ് 21 മുതൽ സെപ്റ്റംബർ ഏഴ് വരെ നടക്കാനിരിക്കുന്ന വിപുലമായ മേളയിലെ ഏകദേശം 5,000 ഒഴിവുകളിലേക്ക് 50,000-ത്തിലധികം അപേക്ഷകളാണ് ലഭിച്ചതെന്ന് സിഎൻഇ സിഇഒ മാർക്ക് ഹോളണ്ട് വ്യക്തമാക്കി. കഴിഞ്ഞ ഏപ്രിലിൽ ടൊറന്റോ മേഖലയിലെ യുവാക്കൾക്കിടയിലെ തൊഴിലില്ലായ്മ നിരക്ക് 17 ശതമാനത്തോളം ഉയർന്ന പശ്ചാത്തലത്തിലാണ് ഈ വൻ തിരക്ക്.

ലഭ്യമായ ഒഴിവുകളേക്കാൾ പത്തിരട്ടി അപേക്ഷകരാണ് രംഗത്തുള്ളത്.  കൂടുതൽ തൊഴിലവസരങ്ങൾ നൽകാൻ മറ്റ് സ്ഥാപനങ്ങളെക്കൂടി പങ്കാളികളാക്കിയാണ് ഇത്തവണ ജോബ് ഫെയർ സംഘടിപ്പിക്കുന്നത്. ബയോഡാറ്റ തയ്യാറാക്കാനും അഭിമുഖങ്ങൾക്ക് തയ്യാറെടുക്കാനുമായി പ്രത്യേക സൗകര്യങ്ങളും ഒരുക്കിയിട്ടുണ്ട്. തിരഞ്ഞെടുക്കപ്പെടുന്നവരിൽ 80 ശതമാനവും യുവാക്കളായിരിക്കും. ആദ്യമായി ജോലി നോക്കുന്നവർക്ക് മുൻഗണന നൽകാനാണ് സംഘടന ലക്ഷ്യമിടുന്നത്. കാഷ്യർ, റീട്ടെയിൽ സ്റ്റാഫ്, ഗെയിം അറ്റൻഡന്റ്, ഫുഡ് സർവീസ് വർക്കർ, ഗൈഡ് തുടങ്ങിയ തസ്തികകളിലേക്കാണ് പ്രധാനമായും നിയമനം നടക്കുക.

നേരത്തെ എത്തിയാൽ ജോലി സാധ്യത കൂടുമെന്ന പ്രതീക്ഷയിൽ പുലർച്ചെ 5:30 മുതൽ യുവാക്കൾ വരിയിൽ കാത്തുനിൽക്കുന്നുണ്ടായിരുന്നു. മാസങ്ങളായി പലയിടത്തും അപേക്ഷിച്ച് മടുത്ത അനുഭവമാണ് ഭൂരിഭാഗം പേർക്കും പങ്കുവെക്കാനുള്ളത്. നൂറുകണക്കിന് അപേക്ഷകൾ അയച്ചിട്ടും മറുപടി ലഭിക്കാത്ത സാഹചര്യത്തിൽ, വരാനിരിക്കുന്ന ഈ മേള തങ്ങൾക്ക് പുതിയ പ്രതീക്ഷ നൽകുമെന്ന വിശ്വാസത്തിലാണ് വിദ്യാർത്ഥികൾ ഉൾപ്പെടെയുള്ള ഉദ്യോഗാർത്ഥികൾ.