ക്രൗഡ്ഫണ്ടിംഗ് തട്ടിപ്പുകൾക്കെതിരെ പോലീസിൻ്റെ  മുന്നറിയിപ്പ്

 

 

ദുരിതത്തിലായവരെ സഹായിക്കാനും അടിയന്തര ആവശ്യങ്ങൾക്ക് പണം കണ്ടെത്താനും ക്രൗഡ്ഫണ്ടിംഗ്  പ്ലാറ്റ്‌ഫോമുകൾ വലിയ സഹായമാകുന്നുണ്ടെങ്കിലും, ഇതിൻ്റെ മറവിൽ നടക്കുന്ന വ്യാജ പ്രചാരണങ്ങൾക്കും സാമ്പത്തിക തട്ടിപ്പുകൾക്കുമെതിരെ കനേഡിയൻ പോലീസ് ജാഗ്രതാ നിർദ്ദേശം നൽകി. ജനങ്ങളുടെ കാരുണ്യവും അനുകമ്പയും മുതലെടുത്ത് വ്യാജ ധനസമാഹരണ പേജുകൾ നിർമ്മിച്ച് ലക്ഷക്കണക്കിന് രൂപ തട്ടിയെടുക്കുന്ന സംഭവങ്ങൾ വർദ്ധിച്ചുവരുന്ന സാഹചര്യത്തിലാണ് പോലീസ് ഈ മുന്നറിയിപ്പുമായി രംഗത്തെത്തിയിരിക്കുന്നത്.

കഴിഞ്ഞ ആഴ്‌ച കാൽഗറി പോലീസ് സർവീസ്  പുറത്തുവിട്ട വിവരമനുസരിച്ച്, കാണാതായ 11 വയസ്സുകാരൻ പാർക്കർ വെൽസിൻ്റെ കുടുംബത്തെ സഹായിക്കാനെന്ന വ്യാജേന 'GoFundMe' എന്ന പ്ലാറ്റ്‌ഫോമിൽ നിർമ്മിച്ച വ്യാജ ക്യാമ്പയിൻ ഇതിനൊരു ഉദാഹരണമാണ്. കാണാതായ കുട്ടിയുടെ കുടുംബവുമായി യാതൊരു ബന്ധവുമില്ലാത്ത വ്യക്തികളാണ് ഈ ക്യാമ്പയിന് പിന്നിലെന്ന് പോലീസ് കണ്ടെത്തി. സമാനമായ രീതിയിൽ അപകടത്തിൽപ്പെട്ടവരുടെയോ രോഗ ബാധിതരുടെയോ പേരിൽ ബന്ധുക്കളുടെ അറിവില്ലാതെ വ്യാജ അക്കൗണ്ടുകൾ നിർമ്മിച്ച് തട്ടിപ്പ് നടത്തുന്ന സംഘങ്ങൾ സജീവമാണെന്ന് അന്വേഷണ ഉദ്യോഗസ്ഥർ വ്യക്തമാക്കി.

ഓൺലൈൻ വഴി സാമ്പത്തിക സഹായം നൽകുന്നതിന് മുൻപ് പൊതുജനങ്ങൾ അതീവ ജാഗ്രത പാലിക്കണമെന്ന് പോലീസ് നിർദ്ദേശിക്കുന്നു. ഏതെങ്കിലും ധനസമാഹരണ ഉദ്യമങ്ങളിലേക്ക് പണം അയക്കുന്നതിന് മുൻപ് അതിന്റെ സുതാര്യതയും, പണം നേരിട്ട് അർഹരായവരിലേക്ക് തന്നെ എത്തുന്നുണ്ടോ എന്നും ഉറപ്പുവരുത്തണം. വ്യാജമെന്ന് സംശയിക്കുന്ന ക്യാമ്പയിനുകളെക്കുറിച്ച് ഉടൻ തന്നെ പോലീസിലോ ബന്ധപ്പെട്ട ആന്റി-ഫ്രോഡ് ഏജൻസികളിലോ വിവരമറിയിക്കണമെന്നും അധികൃതർ അഭ്യർത്ഥിച്ചു.