ഡോ. രവി തഥാനിയെ സീഡാര്സ്-സിനായ് ഹോസ്പിറ്റലിന്റെ ആദ്യ 'ചീഫ് ഫിസിഷ്യന് എക്സിക്യൂട്ടീവ്' ആയി നിയമിച്ചു
By: 600002 On: Jul 28, 2026, 6:55 AM
പി പി ചെറിയാന്
ലോസ് ആഞ്ചലസ്: പ്രശസ്ത ഇന്ത്യന്-അമേരിക്കന് നെഫ്രോളജിസ്റ്റും ശാസ്ത്രജ്ഞനുമായ ഡോ. രവി തഥാനിയെ സീഡാര്സ്-സിനായ് മെഡിക്കല് സെന്ററിന്റെ ആദ്യ എക്സിക്യൂട്ടീവ് വൈസ് പ്രസിഡന്റ്, ചീഫ് ഫിസിഷ്യന് എക്സിക്യൂട്ടീവ്, ഡീന് ഓഫ് ദ മെഡിക്കല് ഫാക്കല്റ്റി എന്നീ പദവികളിലേക്ക് നിയമിച്ചു. സെപ്റ്റംബര് 1-ന് അദ്ദേഹം ചുമതലയേല്ക്കും.
സ്ഥാപനത്തിന്റെ ക്ലിനിക്കല് പ്രവര്ത്തനങ്ങള്, അക്കാദമിക് പ്രോഗ്രാമുകള്, ഗവേഷണങ്ങള് എന്നിവയുടെ സമ്പൂര്ണ്ണ മേല്നോട്ടം ഡോ. രവി തഥാനിക്കായിരിക്കും.
നിലവില് സീഡാര്സ്-സിനായില് ക്ലിനിക്കല് അഫയേഴ്സ് എക്സിക്യൂട്ടീവ് വൈസ് പ്രസിഡന്റായി സേവനമനുഷ്ഠിക്കുകയാണ് അദ്ദേഹം. ഇമോറി യൂണിവേഴ്സിറ്റി, മസാച്യുസെറ്റ്സ് ജനറല് ഹോസ്പിറ്റല്, ഹാര്വാര്ഡ് മെഡിക്കല് സ്കൂള് എന്നിവിടങ്ങളിലും പ്രമുഖ നേതൃപദവികള് വഹിച്ചിട്ടുണ്ട്.
വൃക്കരോഗങ്ങളെക്കുറിച്ചും ഗര്ഭകാലത്തെ സങ്കീര്ണതകളെക്കുറിച്ചുമുള്ള (പ്രത്യേകിച്ച് 'പ്രീ-എക്ലാംപ്സിയ') അദ്ദേഹത്തിന്റെ ഗവേഷണങ്ങള് അന്താരാഷ്ട്ര തലത്തില് ശ്രദ്ധ നേടിയിട്ടുള്ളതാണ്. പ്രീ-എക്ലാംപ്സിയ തിരിച്ചറിയുന്നതിനായി യു.എസ്. എഫ്.ഡി.എ (FDA) അംഗീകരിച്ച ആദ്യ പരിശോധന വികസിപ്പിച്ചതില് അദ്ദേഹത്തിന്റെ ഗവേഷണം നിര്ണായകമായിരുന്നു.
നാഷണല് അക്കാദമി ഓഫ് മെഡിസിന് (2025), അമേരിക്കന് അസോസിയേഷന് ഫോര് ദി അഡ്വാന്സ്മെന്റ് ഓഫ് സയന്സ് (AAAS) എന്നിവയുടെ ഫെലോ ആയി അദ്ദേഹം തിരഞ്ഞെടുക്കപ്പെട്ടിട്ടുണ്ട്.