പോലീസ് പിന്നിൽ ഉണ്ടെന്നറിയാതെ അഭ്യാസപ്രകടനം:  ബി.സി. ഹൈവേ പട്രോളിന് മുന്നിൽ ബൈക്ക് വീൽ ചെയ്ത യുവാവിന് കടുത്ത പിഴയും ശിക്ഷയും

 

 ബ്രിട്ടീഷ് കൊളംബിയയിൽ  റോഡിൽ അപകടകരമായി വാഹനം ഓടിച്ച യുവാവിനെതിരെ ബി.സി. ഹൈവേ പട്രോൾ  കടുത്ത നടപടികൾ സ്വീകരിച്ചു. ജൂലൈ 18-ന് ഹൈവേ 99-ലെ ഫെറി ക്രീക്കിന് സമീപമാണ് സംഭവം നടന്നത്. മണിക്കൂറിൽ 80 കിലോമീറ്റർ മാത്രം വേഗത അനുവദിച്ചിട്ടുള്ള റോഡിൽ 146 കിലോമീറ്റർ വേഗതയിൽ പാഞ്ഞ സുസൂക്കി ബൈക്കിനെ പോലീസ് ഉദ്യോഗസ്ഥൻ പിന്തുടരുകയായിരുന്നു. എന്നാൽ, വാഹനത്തിന് നിയമപ്രകാരമുള്ള റിയർവ്യൂ മിററുകൾ ഇല്ലാതിരുന്നതിനാൽ തൊട്ടുപിന്നിൽ പോലീസ് വാഹനം നിൽക്കുന്നത് ബൈക്ക് യാത്രികൻ ശ്രദ്ധിച്ചില്ല.
തുടർന്ന്, പോലീസ് കാൺകെ യുവാവ് മുൻചക്രം ഉയർത്തി അപകടകരമായ രീതിയിൽ സാഹസിക പ്രകടനം നടത്തുകയും മറ്റ് വാഹനങ്ങൾക്കിടയിലൂടെ വെട്ടിച്ചു ഓടിക്കുകയും ചെയ്തു.

ബൈക്കിൻ്റെ നമ്പർ പ്ലേറ്റും ബൈക്ക് അശ്രദ്ധമായി ഓടിച്ചതും എല്ലാം  പോലീസിൻ്റെ ബോഡി ക്യാമറയിൽ പൂർണ്ണമായും പതിഞ്ഞിട്ടുണ്ട്. പോലീസ് വാഹനം തടഞ്ഞു നിർത്തിയപ്പോൾ യുവാവ് പൂർണ്ണമായി സഹകരിച്ചുവെന്ന് ഹൈവേ പട്രോൾ സർജൻ്റ് മൈക്കൽ മക്ലാഫ്ലിൻ വ്യക്തമാക്കി. റിച്ച്മണ്ടിൽ നിന്നുള്ള 20 വയസ്സുകാരനെതിരെ  നിയമലംഘനത്തിന് കനത്ത ശിക്ഷാനടപടികളാണ് ചുമത്തിയിരിക്കുന്നത്. യുവാവിന് ലേണേഴ്സ് ലൈസൻസ് ഉണ്ട്. അമിതവേഗതയ്ക്ക് 483 കനേഡിയൻ ഡോളറും റോഡിലെ അഭ്യാസപ്രകടനത്തിന് 368 ഡോളറും പിഴ ചുമത്തി.

കൂടാതെ, വാഹനം ഏഴ് ദിവസത്തേക്ക് പോലീസ് കസ്റ്റഡിയിലെടുക്കുകയും ടോവിംഗ് ചെലവുകളും തുടർന്നുള്ള മൂന്ന് വർഷത്തേക്ക് ഉയർന്ന റിസ്ക് ഡ്രൈവിംഗ് പ്രീമിയവും അടയ്ക്കാൻ നിർദ്ദേശിക്കുകയും ചെയ്തു. യാത്രക്കാരുടെ സുരക്ഷ ഉറപ്പാക്കുന്നതിൻ്റെ ഭാഗമായി ഹൈവേകളിലെ ഇത്തരം അശ്രദ്ധമായ ഡ്രൈവിംഗിനെതിരെ കർശന നിയമനടപടികൾ തുടരുമെന്ന് പോലീസ് അറിയിച്ചു.