കാട്ടുതീ പുക രൂക്ഷം: കാൽഗറിയിൽ വായുനിലവാരം അതീവ ഗുരുതര ഘട്ടത്തിലേക്ക്

 

വടക്കൻ സസ്കാച്ചെവാനിലും നോർത്ത് വെസ്റ്റ് ടെറിട്ടറിയിലും പടർന്നുപിടിച്ച കാട്ടുതീയിൽ നിന്നുള്ള പുക ആൽബർട്ടയിലേക്ക് വ്യാപിച്ചതിനെ തുടർന്ന്  കാൽഗറി നഗരത്തിൽ വായുമലിനീകരണം അതീവ ഗുരുതര നിലയിലെത്തി. അന്താരാഷ്ട്ര വായുനിലവാര നിരീക്ഷണ ഏജൻസിയായ ഐ.ക്യു. എയറിൻ്റെ കണക്കുകൾ പ്രകാരം, വടക്കേ അമേരിക്കയിൽ തന്നെ ഏറ്റവും മോശം വായുനിലവാരമുള്ള നഗരങ്ങളിലൊന്നായി കാൽഗറി മാറിയിട്ടുണ്ട്. ജൂലൈ 24-ലെ പ്രതിദിന റിപ്പോർട്ട് അനുസരിച്ച്, സൗത്ത് വെസ്റ്റ് കാൽഗറിയിലെ എവർസ്റ്റോൺ മേഖലയിൽ വായുനിലവാര സൂചിക 206 രേഖപ്പെടുത്തിയപ്പോൾ, നഗരത്തിൻ്റെ മറ്റ് പ്രധാന ഭാഗങ്ങളിൽ സൂചിക 190-ന് മുകളിലാണ് രേഖപ്പെടുത്തിയത്.

നിലവിലെ സാഹചര്യത്തിൽ നഗരത്തിലെ വായുനിലവാരം Very Unhealthy എന്ന വിഭാഗത്തിലാണ് പെടുന്നത്. ഇതിൻ്റെ അടിസ്ഥാനത്തിൽ ആരോഗ്യ മന്ത്രാലയവും വിദഗ്ധരും ജനങ്ങൾക്ക് അടിയന്തര ജാഗ്രതാനിർദ്ദേശം നൽകിയിട്ടുണ്ട്. കുട്ടികൾ, വയോധികർ, ഗർഭിണികൾ, ഹൃദ്രോഗ-ശ്വാസകോശ രോഗികൾ എന്നിവർ വീടുകൾക്കുള്ളിൽ തന്നെ തുടരണമെന്നും  നിർദ്ദേശിക്കുന്നു. കൂടാതെ, തുറസ്സായ സ്ഥലങ്ങളിലെ വ്യായാമങ്ങൾ പൂർണ്ണമായും ഒഴിവാക്കാനും, പുറത്തിറങ്ങേണ്ടുന്ന അടിയന്തര സാഹചര്യങ്ങളിൽ  മാസ്കുകൾ നിർബന്ധമായും ധരിക്കാനും ജനങ്ങളോട് ആവശ്യപ്പെട്ടിട്ടുണ്ട്.

ECCC കാൽഗറിയിലും പരിസര പ്രദേശങ്ങളിലും ഓറഞ്ച് അലർട്ട് പ്രഖ്യാപിച്ചിരിക്കുകയാണ്. പുക മൂലം കാഴ്ചപരിധി ഗണ്യമായി കുറയാനും, ഓരോ മണിക്കൂറിലും അന്തരീക്ഷ സ്ഥിതിയിൽ ദ്രുതഗതിയിലുള്ള മാറ്റങ്ങൾ ഉണ്ടാകാനും സാധ്യതയുണ്ടെന്ന് ഏജൻസി വ്യക്തമാക്കി. എന്നാൽ, വരും മണിക്കൂറുകളിൽ സ്ഥിതിഗതികളിൽ നേരിയ പുരോഗതി ഉണ്ടാകുമെന്നും,  അടുത്ത ആഴ്ചയോടെ  അന്തരീക്ഷ വായുനിലവാരം സാധാരണ നിലയിലേക്ക് തിരിച്ചെത്തുമെന്നുമാണ് കാലാവസ്ഥാ പ്രവചനം.