547 മില്യണ് ഡോളര് മെഡികെയര് തട്ടിപ്പ് കേസിലെ പ്രതി ഒടുവില് പിടിയില്
By: 600002 On: Jul 22, 2026, 12:53 PM
പ്രസാദ് തീയാടിക്കല്
വാഷിംഗ്ടണ്: അമേരിക്കന് ഫെഡറല് ബ്യൂറോ ഓഫ് ഇന്വെസ്റ്റിഗേഷന് (FBI)യുടെ 'Most Wanted Fraudsters' പട്ടികയില് ഉള്പ്പെട്ടിരുന്ന പ്രധാന പ്രതികളിലൊരാളായ ഖാലിദ് അഹമ്മദ് സതാരി (Khalid Ahmed Satary)യെ ഏകദേശം മൂന്ന് വര്ഷം നീണ്ട അന്തര്ദേശീയ അന്വേഷണത്തിനൊടുവില് വിദേശത്ത് നിന്ന് അറസ്റ്റ് ചെയ്ത് അമേരിക്കയിലേക്ക് കൊണ്ടുവന്നതായി എഫ്ബിഐ അറിയിച്ചു.
2016 മുതല് 2019 വരെ മെഡികെയര് പദ്ധതിയെ ലക്ഷ്യമിട്ട് 547 മില്യണ് ഡോളര് തട്ടിപ്പ് നടത്തിയ ഗൂഢാലോചനയില് സതാരി പ്രധാന പങ്കുവഹിച്ചെന്നാണ് ആരോപണം. രോഗികള്ക്ക് മെഡിക്കല് ആവശ്യകതയില്ലാത്ത ചെലവേറിയ ജനിതക (Genetic) പരിശോധനകള്ക്ക് വ്യാജമായി മെഡികെയറില് നിന്ന് പണം ഈടാക്കുകയും, തെറ്റായ വിപണനരീതികള്, നിയമവിരുദ്ധ കമ്മീഷനുകള് (Kickbacks), കൈക്കൂലി എന്നിവ ഉപയോഗിച്ച് സര്ക്കാര് ഫണ്ടുകള് തട്ടിയെടുക്കുകയും ചെയ്തുവെന്നാണ് അന്വേഷണ രേഖകള് വ്യക്തമാക്കുന്നത്.
2019-ല് സതാരിക്കെതിരെ കുറ്റപത്രം സമര്പ്പിച്ചിരുന്നെങ്കിലും, 2022-ല് ജാമ്യവ്യവസ്ഥകള് ലംഘിച്ച് ഇയാള് ഒളിവില് പോവുകയായിരുന്നു. തുടര്ന്ന് എഫ്ബിഐ അന്തര്ദേശീയ തലത്തില് നടത്തിയ വ്യാപക അന്വേഷണത്തിനൊടുവിലാണ് വിദേശരാജ്യത്ത് നിന്ന് ഇയാളെ പിടികൂടി അമേരിക്കയിലേക്ക് തിരിച്ചെത്തിച്ചത്.
എഫ്ബിഐ ഡയറക്ടര് കാഷ് പട്ടേല് പറഞ്ഞു, കഴിഞ്ഞ അഞ്ച് ആഴ്ചയ്ക്കിടെ 'Most Wanted Fraudsters' പട്ടികയില് നിന്ന് പിടിയിലാകുന്ന മൂന്നാമത്തെ പ്രതിയാണ് സതാരിയെന്നും, സാമ്പത്തിക കുറ്റകൃത്യങ്ങള്ക്കെതിരായ എഫ്ബിഐയുടെ പുതിയ നടപടികളുടെ ചരിത്രപരമായ വിജയമാണിതെന്നും അദ്ദേഹം വിലയിരുത്തി.
ഇപ്പോള് സതാരി അമേരിക്കയില് ഫെഡറല് കോടതിയില് കുറ്റവിചാരണ നേരിടും. കേസില് ഉള്പ്പെട്ട മറ്റ് പ്രതികള്ക്കെതിരായ അന്വേഷണം തുടരുകയാണെന്ന് എഫ്ബിഐ അറിയിച്ചു.