ബ്രിട്ടീഷ് കൊളംബിയയിൽ കണ്ടെത്തിയ ഫോസിൽ അവശിഷ്ടങ്ങൾ 'ഗോർഗോസോറസ്'  വിഭാഗത്തിൽപ്പെട്ട ദിനോസറുകളുടേതെന്ന് സ്ഥിരീകരിച്ചു.

കാനഡയിലെ ബ്രിട്ടീഷ് കൊളംബിയയിലുള്ള ഒരു ക്യാമ്പ് ഗ്രൗണ്ടിൽ നിന്ന് കണ്ടെത്തിയ അപൂർവ്വ ഫോസിൽ അവശിഷ്ടങ്ങൾ ടി. റെക്സ് (T. rex) വിഭാഗത്തിൽപ്പെട്ട ദിനോസറുകളുടെ  പൂർവ്വികരുടേതാണെന്ന് ശാസ്ത്രജ്ഞർ സ്ഥിരീകരിച്ചു. ആൽബെർട്ട സർവകലാശാലയിലെ ഗവേഷകരാണ് ഈ നിർണായക കണ്ടെത്തലിന് പിന്നിൽ.
 
7.6 കോടി വർഷങ്ങൾക്ക് മുൻപ് ജീവിച്ചിരുന്ന 'ഗോർഗോസോറസ്'  എന്ന വിഭാഗത്തിൽപ്പെട്ട ദിനോസറിൻ്റെ തലയോട്ടിയുടെ ഭാഗങ്ങളാണ് കണ്ടെത്തിയത്. ടി. റെക്സിനേക്കാൾ ഭാരം കുറഞ്ഞതും കൂടുതൽ വേഗതയിൽ ഓടാൻ കഴിയുന്നതുമായിരുന്നു ഇവ. 2017-ൽ ടംബ്ലർ റിഡ്ജിലെ ക്യാമ്പ് ഗ്രൗണ്ടിൽ നടക്കാനിറങ്ങിയ റിക്ക് ലാംബർട്ട് എന്ന വ്യക്തിയാണ് ഒരു മണൽക്കല്ലിൽ ഈ വിചിത്രമായ ഫോസിൽ പാട് കണ്ടത്. തുടർന്ന് മ്യൂസിയം അധികൃതർ നടത്തിയ പരിശോധനയിലാണ് ഇത് ബ്രിട്ടീഷ് കൊളംബിയയിൽ നിന്ന് ലഭിക്കുന്ന ആദ്യത്തെ ടൈറനോസോർ വിഭാഗത്തിലെ തലയോട്ടി ഫോസിലാണെന്ന് തിരിച്ചറിഞ്ഞത്.

കണ്ണുകൾക്ക് മുകളിലായി ത്രികോണാകൃതിയിലുള്ള ചെറിയ കൊമ്പുകളും നീളമുള്ള കാലുകളുമാണ് ഇവയുടെ പ്രത്യേകത. കണ്ടെത്തിയ പല്ലുകളുടെ ഘടന വച്ച് ഇതൊരു പ്രായം കുറഞ്ഞ ദിനോസറായിരുന്നുവെന്നും വേട്ടയാടിയ ഇരകളെ കൃത്യമായി മുറിച്ചെടുക്കാൻ ഇവ ഈ പല്ലുകൾ ഉപയോഗിച്ചിരുന്നുവെന്നും ശാസ്ത്രജ്ഞർ പറയുന്നു. കാനഡയിലെ ദിനോസർ ഗവേഷണ രംഗത്ത് വലിയൊരു നാഴികക്കല്ലായാണ് ഈ പുതിയ കണ്ടെത്തൽ വിലയിരുത്തപ്പെടുന്നത്.