കാനഡയ്ക്ക് 50 ശതമാനം നികുതി ചുമത്തി ഡോണൾഡ് ട്രംപ്; ഓഗസ്റ്റ് 19 മുതൽ പുതിയ നികുതി പ്രാബല്യത്തിൽ വരും

കാനഡയിൽ നിന്നുള്ള വിവിധ ഉൽപ്പന്നങ്ങൾക്ക് 50 ശതമാനം അധിക ഇറക്കുമതി നികുതി പ്രഖ്യാപിച്ച് യു.എസ്. പ്രസിഡൻ്റ് ഡോണാൾഡ് ട്രംപ്. യു.എസ്. ഉൽപ്പന്നങ്ങളോട് കാനഡ വിവേചനം കാണിക്കുന്നുവെന്ന് ആരോപിച്ചാണ് ഈ നടപടി. ഓഗസ്റ്റ് 19 മുതൽ പുതിയ നികുതി പ്രാബല്യത്തിൽ വരും.

1930-ലെ താരിഫ് ആക്ടിലെ സെക്ഷൻ 338 ഉപയോഗിച്ചാണ് ട്രംപ് ഉത്തരവ് പുറപ്പെടുവിച്ചിരിക്കുന്നത്. അമേരിക്കൻ ഉൽപ്പന്നങ്ങൾക്ക് തുല്യമായ പരിഗണന ലഭിക്കുന്നില്ലെന്ന് ചൂണ്ടിക്കാട്ടിയാണ് നടപടി. പേപ്പർ, സിമൻ്റ്, മര ഉൽപ്പന്നങ്ങൾ, പാൽ ഉൽപ്പന്നങ്ങൾ,  എസൻഷ്യൽ ഓയിലുകൾ,  ചില മദ്യങ്ങൾ തുടങ്ങിയവയാണ് നികുതി ബാധകമാകുന്ന ഉൽപ്പന്നങ്ങൾ:.
ഊർജ്ജ മേഖലയിലെ ഉൽപ്പന്നങ്ങൾ, പൊട്ടാഷ്, മത്സ്യം, നിർണായക ധാതുക്കൾ എന്നിവയെ പുതിയ നികുതിയിൽ നിന്ന് ഒഴിവാക്കിയിട്ടുണ്ട്. അമേരിക്കൻ കാറുകൾക്ക് കാനഡ ഏർപ്പെടുത്തിയ നിയന്ത്രണങ്ങൾ, കനേഡിയൻ പ്രവിശ്യകളിൽ യു.എസ്. മദ്യത്തിന് ഏർപ്പെടുത്തിയ നിരോധനം, പാൽ ഉൽപ്പന്നങ്ങളുടെ ഇറക്കുമതി പരിധി എന്നിവയാണ് ട്രംപ് ഭരണകൂടത്തെ ചൊടിപ്പിച്ചത്.

എന്നാൽ അമേരിക്കയുടെ ഈ ഏകപക്ഷീയമായ തീരുമാനം ഖേദകരമാണെന്ന് കനേഡിയൻ പ്രധാനമന്ത്രി മാർക്ക് കാർണി പ്രതികരിച്ചു. നികുതി പ്രാബല്യത്തിൽ വരാൻ 30 ദിവസത്തെ സമയമുണ്ടെന്നും, ചർച്ചകളിലൂടെ പ്രശ്നം പരിഹരിക്കാൻ തയ്യാറാണെന്നും അദ്ദേഹം വ്യക്തമാക്കി. എന്നാൽ രാജ്യത്തെ തൊഴിലാളികളുടെയും കർഷകരുടെയും താത്പര്യങ്ങൾ സംരക്ഷിക്കാൻ ആവശ്യമായ മുൻകരുതലുകൾ എടുക്കുമെന്നും അദ്ദേഹം കൂട്ടിച്ചേർത്തു.