കാൽഗറിയിൽ കാണാതായ 11 വയസ്സുകാരനായി തെരച്ചിൽ ഊർജ്ജിതം; സഹായം അഭ്യർത്ഥിച്ച് പോലീസ്

 

കാൽഗറിയിൽ വ്യാഴാഴ്ച മുതൽ കാണാതായ പാർക്കർ എന്ന 11 വയസ്സുകാരനായ ഓട്ടിസം ബാധിതനായ കുട്ടിക്കായുള്ള തെരച്ചിൽ നാലാം ദിവസവും ശക്തമായി തുടരുന്നു. നൂറുകണക്കിന് പോലീസുകാരും നൂറിലധികം സന്നദ്ധപ്രവർത്തകരും ആർ.സി.എം.പി (RCMP) ഉദ്യോഗസ്ഥരും ചേർന്നാണ് നഗരത്തിലുടനീളം തെരച്ചിൽ നടത്തുന്നത്. കുട്ടി സ്വന്തം നിലയിൽ എവിടെയെങ്കിലും ഒളിച്ചിരിക്കാനുള്ള സാധ്യത കണക്കിലെടുത്ത് തങ്ങളുടെ പുരയിടങ്ങൾ, ഗാരേജുകൾ, ഷെഡുകൾ, വാഹനങ്ങൾ, പൂളുകൾ എന്നിവ വിശദമായി പരിശോധിക്കാൻ കാൽഗറി പോലീസ് പൊതുജനങ്ങളോട് ആവശ്യപ്പെട്ടിട്ടുണ്ട്.

കുട്ടിക്ക് സംസാരിക്കാൻ കഴിയില്ലെന്നും അപരിചിതർ അടുത്തുചെന്നാൽ പരിഭ്രാന്തനാകാൻ സാധ്യതയുണ്ടെന്നും പോലീസ് അറിയിച്ചു. അതിനാൽ കുട്ടിയെ എവിടെയെങ്കിലും കണ്ടെത്തുകയാണെങ്കിൽ സ്വയം ഇടപഴകാൻ ശ്രമിക്കാതെ ഉടൻ തന്നെ പോലീസിനെ വിവരമറിയിക്കണം. കുട്ടിക്ക് ഡിസ്നി സംഗീതം വളരെ ഇഷ്ടമായതിനാൽ, തെരച്ചിൽ നടത്തുന്ന പ്രദേശങ്ങളിൽ പോലീസ് വാഹനങ്ങളിൽ ഡിസ്നി ഗാനങ്ങൾ കേൾപ്പിച്ചാണ് തെരച്ചിൽ പുരോഗമിക്കുന്നത്. സാധാരണയായി ഇത്തരം കേസുകളിൽ അംബർ അലർട്ട് പുറപ്പെടുവിക്കാറില്ലെങ്കിലും, പ്രത്യേക സാഹചര്യം പരിഗണിച്ച് പ്രവിശ്യാ സർക്കാർ ശനിയാഴ്ച ഉച്ചയ്ക്ക് സംസ്ഥാന വ്യാപകമായി അടിയന്തര ജാഗ്രതാ നിർദ്ദേശം പുറപ്പെടുവിച്ചിരുന്നു.

അവസാനമായി കാണുമ്പോൾ ചാരനിറത്തിലുള്ള ഷോർട്സും കറുത്ത സ്കെച്ചേഴ്സ് ഷൂസും കറുത്ത നോയിസ്-കാൻസലിങ് ഹെഡ്ഫോണുമാണ് കുട്ടി ധരിച്ചിരുന്നത്.  കുട്ടിയുടേതെന്ന് കരുതുന്ന വസ്ത്രങ്ങൾ വ്യാഴാഴ്ച ഉച്ചയ്ക്ക് നോർത്ത്മൗണ്ട് ഡ്രൈവിന് സമീപത്ത് നിന്ന് കണ്ടെത്തിയിട്ടുണ്ട്. കുട്ടിക്ക് 4 അടി 11 ഇഞ്ച് ഉയരവും, ഏകദേശം 40 കിലോഗ്രാം ഭാരവും, തവിട്ടുനിറമുള്ള കണ്ണുകളും മുടിയുമാണുള്ളത്. ഓട്ടിസം ബാധിതനായ കുട്ടിക്ക് മൂന്ന് വയസ്സുകാരൻ്റെ മാനസിക വളർച്ച മാത്രമാണുള്ളത്. വെള്ളം ഇഷ്ടപ്പെടുന്നതിനാൽ ജലാശയങ്ങൾക്ക് സമീപവും പോലീസ് നിരീക്ഷണം ശക്തമാക്കിയിട്ടുണ്ട്. കൂടാതെ പോകുന്ന വഴികളിലെ വാതിലുകൾ പിന്നിൽ നിന്ന് പൂട്ടുന്ന സ്വഭാവം കുട്ടിക്കുള്ളതിനാൽ, പൂട്ടിക്കിടക്കുന്ന മുറികളും പരിശോധിക്കണമെന്ന് പോലീസ് നിർദ്ദേശിച്ചു.

തങ്ങളുടെ മകനെ കാണാതായതു മുതൽ ഒരു മാതാപിതാക്കളുടെ ഏറ്റവും വലിയ ദുരന്തത്തിലൂടെയാണ് തങ്ങൾ കടന്നുപോകുന്നതെന്ന് പാർക്കറുടെ കുടുംബം പ്രസ്താവനയിൽ പറഞ്ഞു. കുട്ടി എവിടെയാണെന്ന് അറിയാതെയുള്ള ഓരോ നിമിഷവും കഠിനമാണെന്നും മകൻ വേഗം തിരിച്ചെത്താൻ എല്ലാവരുടെയും പ്രാർത്ഥനയും സഹായവും വേണമെന്നും കുടുംബം അഭ്യർത്ഥിച്ചു. കുട്ടിയെക്കുറിച്ച് എന്തെങ്കിലും വിവരമോ സിസിടിവി, ഡാഷ്‌ക്യാം ദൃശ്യങ്ങളോ ലഭിക്കുന്നവർ 403-266-1234 എന്ന നമ്പറിൽ പോലീസുമായി ബന്ധപ്പെടേണ്ടതാണ്.