കാനഡയിൽ ആർട്ടിഫിഷ്യൽ ഇൻ്റലിജൻസ്  ഡാറ്റാ സെൻ്ററുകൾക്കെതിരെ പ്രതിഷേധം ശക്തമാകുന്നു

 

ആർട്ടിഫിഷ്യൽ ഇൻ്റലിജൻസ്  സാങ്കേതികവിദ്യയുടെ വളർച്ചയ്ക്ക് ആവശ്യമായ കൂറ്റൻ ഡാറ്റാ സെൻ്ററുകളുടെ നിർമ്മാണത്തിൽ കാനഡയിലുടനീളം വൻ മുന്നേറ്റം ദൃശ്യമാകുമ്പോൾ, ഇതിനെതിരെ ജനകീയ പ്രതിഷേധവും ശക്തമാകുന്നു. വലിയ തോതിൽ വൈദ്യുതിയും ജലവും ഉപയോഗിക്കുന്ന ഇത്തരം പദ്ധതികൾ തങ്ങളുടെ പ്രാദേശിക വിഭവങ്ങളെയും സമാധാനാന്തരീക്ഷത്തെയും ബാധിക്കുമെന്നാണ് ജനങ്ങളുടെ പ്രധാന ആശങ്ക. കാനഡയിൽ നിലവിലുള്ള ശേഷിയേക്കാൾ ഒട്ടേറെ മടങ്ങ് അധികം വരുന്ന പുതിയ പ്രോജക്ടുകളാണ് ഇപ്പോൾ ആസൂത്രണ ഘട്ടത്തിലുള്ളത്. സാങ്കേതികവിദ്യ തങ്ങളുടെ ജീവിതത്തെ തകിടം മറിക്കുമെന്ന ആശങ്കകൾക്കിടയിൽ, AI സാങ്കേതികവിദ്യയുടെ ഒരു ഭൗതിക രൂപമായാണ് ജനങ്ങൾ ഈ കൂറ്റൻ കോൺക്രീറ്റ് കെട്ടിടങ്ങളെ നോക്കി കാണുന്നത്.

പ്രാദേശിക തലത്തിൽ തുടങ്ങി ഓട്ടവയിലെ ഭരണസിരാകേന്ദ്രങ്ങൾ വരെ ഈ വിഷയം വലിയ ചർച്ചയായി മാറിക്കഴിഞ്ഞു. വാൻകൂവർ, ഹാമിൽട്ടൺ, ഓൾഡ്സ് തുടങ്ങിയ നഗരങ്ങളിൽ ഇതിനകം തന്നെ കടുത്ത പ്രതിഷേധങ്ങൾ അരങ്ങേറി. ആസൂത്രണം ചെയ്യപ്പെട്ടിട്ടുള്ള പുതിയ പ്രോജക്ടുകളിൽ 92 ശതമാനവും ആൽബർട്ട പ്രവിശ്യയിലാണ് കേന്ദ്രീകരിച്ചിരിക്കുന്നത്. പ്രകൃതിവാതകം ഉപയോഗിച്ച് വേഗത്തിൽ ഊർജ്ജം ഉത്പാദിപ്പിക്കാനുള്ള സൗകര്യമാണ് കമ്പനികളെ ഇങ്ങോട്ട് ആകർഷിക്കുന്നത്. എന്നാൽ, വായു-ശബ്ദ മലിനീകരണങ്ങൾ, ശുദ്ധജലക്ഷാമം, AI മൂലം ഉണ്ടായേക്കാവുന്ന തൊഴിൽ നഷ്ടം എന്നിവയെല്ലാം ഭയന്ന് പ്രദേശവാസികൾ ഈ അത്യാധുനിക 'ഹൈപ്പർസ്കെയിൽ' ഡാറ്റാ സെൻ്ററുകളെ ശക്തമായി എതിർക്കുകയാണ്.

കാനഡയെ ഡാറ്റാ സെൻ്റർ രംഗത്ത് ഒരു ആഗോള ഹബ്ബാക്കി മാറ്റാനാണ് ഫെഡറൽ സർക്കാർ ശ്രമിക്കുന്നതെങ്കിലും, പ്രതിപക്ഷ കക്ഷികൾ ഈ ദ്രുതഗതിയിലുള്ള നീക്കങ്ങളിൽ കടുത്ത ആശങ്ക പ്രകടിപ്പിക്കുന്നുണ്ട്. ആവശ്യമായ സുരക്ഷാ മാനദണ്ഡങ്ങളും നിയന്ത്രണങ്ങളും ഉറപ്പാക്കുന്നത് വരെ പുതിയ നിർമ്മാണങ്ങൾക്ക് ദേശീയതലത്തിൽ താൽക്കാലിക വിലക്ക്  ഏർപ്പെടുത്തണമെന്നാണ് പ്രതിപക്ഷ പാർട്ടിയായ എൻഡിപി ആവശ്യപ്പെടുന്നത്. അയൽരാജ്യമായ അമേരിക്കയിലെ ന്യൂയോർക്ക് സംസ്ഥാനം അടുത്തിടെ ഇത്തരം വലിയ ഡാറ്റാ സെൻ്ററുകൾക്ക് താൽക്കാലിക നിരോധനം ഏർപ്പെടുത്തിയത് കാനഡയിലെ പ്രതിഷേധക്കാർക്ക് കൂടുതൽ കരുത്ത് പകരുന്നുണ്ട്. നിലവിൽ പൊതുജനങ്ങൾക്കിടയിൽ ഈ വിഷയത്തിൽ സമ്മിശ്ര പ്രതികരണമാണെങ്കിലും വരും ദിവസങ്ങളിൽ ഇത് രാജ്യത്തെ ഒരു പ്രധാന രാഷ്ട്രീയ ചർച്ചാവിഷയമായി മാറുമെന്നാണ് വിലയിരുത്തൽ.