വെബ്‌സൈറ്റ് നിർമ്മാണത്തിന് മൂന്ന് ലക്ഷം ഡോളർ; ഒക്ടോബറിലെ ജനഹിത വോട്ടെടുപ്പിനെച്ചൊല്ലി ആൽബർട്ടയിൽ വിവാദം

ഒക്ടോബറിൽ നടത്താനിരിക്കുന്ന ജനഹിതപരിശോധനയെ  പ്രൊമോട്ട് ചെയ്യുന്നതിനായി ആൽബർട്ട സർക്കാർ നിർമ്മിച്ച വെബ്‌സൈറ്റിന് മൂന്ന് ലക്ഷത്തിലധികം ഡോളർ ചിലവായതായി ഔദ്യോഗിക രേഖകൾ. ആകെ 10 ചോദ്യങ്ങൾ ഉൾപ്പെടുന്ന ഈ വോട്ടെടുപ്പിനായി 'albertareferendum2026.ca' എന്ന വെബ്‌സൈറ്റാണ് സർക്കാർ തയ്യാറാക്കിയിരിക്കുന്നത്. ഈ വർഷം ഫെബ്രുവരിയിൽ പ്രീമിയർ ഡാനിയേൽ സ്മിത്ത് പ്രഖ്യാപിച്ച ഒൻപത് ചോദ്യങ്ങൾക്ക് പുറമെ, കാനഡയിൽ നിന്നുള്ള ആൽബർട്ടയുടെ  വേർപിരിയലുമായി ബന്ധപ്പെട്ട പത്താമത്തെ ചോദ്യം മെയ് മാസത്തിൽ കൂട്ടിച്ചേർത്തതിന് പിന്നാലെയാണ് വെബ്‌സൈറ്റ് പൂർണ്ണരൂപത്തിലായത്.

ഒരു പരസ്യ ഏജൻസിക്ക് വെബ്‌സൈറ്റ് നിർമ്മാണത്തിനായി മാത്രം എക്സിക്യൂട്ടീവ് കൗൺസിൽ $309,300 നൽകിയതായി വിവരാവകാശ രേഖകൾ വഴി പുറത്തുവന്ന റിപ്പോർട്ടുകൾ വ്യക്തമാക്കുന്നു. പൊതുജനങ്ങളിൽ നിന്നും ലഭ്യമായ വിവരങ്ങൾ അനുസരിച്ച്, കാനഡയ്ക്കുള്ളിൽ പരമാധികാരമുള്ള ഒരു ആൽബർട്ടയ്ക്കായി നിലകൊള്ളാൻ പ്രേരിപ്പിക്കുന്ന വീഡിയോകളും വിശദീകരണങ്ങളുമാണ് ഈ ഔദ്യോഗിക സൈറ്റിൽ ഉൾപ്പെടുത്തിയിരിക്കുന്നത്. കൂടാതെ വിവിധ കമ്മ്യൂണിറ്റികളിലേക്ക് വിവരങ്ങൾ എത്തിക്കുന്നതിനായി 14 ഭാഷകളിലുള്ള വിവർത്തനങ്ങൾക്കായി വേറെയും തുക ചിലവഴിച്ചിട്ടുണ്ട്. ടൊറൻ്റോ ആസ്ഥാനമായി പ്രവർത്തിക്കുന്ന 'ക്രിയേറ്റീവ് കറൻസി' എന്ന ഏജൻസിക്കാണ് ഈ കരാർ നൽകിയിരുന്നത്. വെബ്‌സൈറ്റ് സന്ദർശിച്ച 40,000-ത്തിലധികം ആളുകളിൽ 10,000 പേരും ഇതിലെ വീഡിയോകൾ കണ്ടിട്ടുണ്ടെന്നും, കൃത്യമായ സുതാര്യതയോടെയുള്ള മത്സര ലേലത്തിലൂടെയാണ് മികച്ച മൂല്യം ഉറപ്പാക്കി ഏജൻസിയെ തിരഞ്ഞെടുത്തതെന്നും പ്രീമിയറുടെ ഓഫീസ് പ്രസ്താവനയിലൂടെ അറിയിച്ചു.

ഒക്ടോബർ 19-നാണ് അൽബർട്ടയിലെ ജനങ്ങൾ ഈ പത്ത് ചോദ്യങ്ങളിന്മേൽ വോട്ട് രേഖപ്പെടുത്തുക. കാനഡയിൽ നിന്ന് ആൽബർട്ട വേർപിരിയേണ്ടതുണ്ടോ എന്നതുമായി ബന്ധപ്പെട്ട നിർണായക ചോദ്യത്തിന് പുറമെ, കുടിയേറ്റ നയങ്ങളിൽ പ്രവിശ്യയ്ക്ക് കൂടുതൽ അധികാരം വേണമെന്നതുമായി ബന്ധപ്പെട്ട അഞ്ച് ചോദ്യങ്ങളും ഇതിലുണ്ട്. കൂടാതെ ജുഡീഷ്യൽ നിയമനങ്ങൾ, സെനറ്റ് നിർത്തലാക്കൽ, ഫെഡറൽ പ്രോഗ്രാമുകളിൽ നിന്നുള്ള ഒഴിവാകൽ എന്നിവയാണ് മറ്റ് പ്രധാന ചോദ്യങ്ങൾ. കാനഡയിൽ തന്നെ തുടരുന്നതിനാണ് താൻ വോട്ട് ചെയ്യുക എന്ന് പ്രീമിയർ സ്മിത്ത് വ്യക്തമാക്കുമ്പോഴും, ഫെഡറൽ സർക്കാരിൻ്റെ കടന്നുകയറ്റങ്ങൾക്കെതിരെ ആൽബർട്ടയുടെ അവകാശങ്ങൾ സംരക്ഷിക്കാൻ ഈ വോട്ടെടുപ്പ് അനിവാര്യമാണെന്നാണ് ഭരണകൂടത്തിൻ്റെ നിലപാട്.