ഡാളസിനെ ആവേശക്കടലാക്കി കേരള അസോസിയേഷന്റെ നേതൃത്വത്തില് ഫിഫ ലോകകപ്പ് ഫൈനല് വാച്ച് പാര്ട്ടി സംഘടിപ്പിച്ചു
By: 600002 On: Jul 20, 2026, 8:31 AMപി. പി ചെറിയാന്
ഡാളസ്: ലോകം കാത്തിരുന്ന 2026 ഫിഫ ലോകകപ്പിന്റെ ആവേശകരമായ ഫൈനല് മത്സരം നെഞ്ചിലേറ്റാന് ഡാളസിലെ മലയാളി സമൂഹം ഒന്നടങ്കം ഒഴുകിയെത്തി. കേരള അസോസിയേഷന് ഓഫ് ഡാളസ് (KAD) പ്രത്യേകമായി സംഘടിപ്പിച്ച ഫിഫ ലോകകപ്പ് ഫൈനല് വാച്ച് പാര്ട്ടി കായികപ്രേമികള്ക്ക് ആവേശത്തിന്റെ പുതുപുത്തന് അനുഭവം സമ്മാനിച്ചു. നിരവധി മലയാളി കുടുംബങ്ങളും ഫുട്ബോള് ആരാധകരും പങ്കെടുത്ത ഈ ഒത്തുചേരല് ഡാളസിലെ പ്രവാസി മലയാളി ചരിത്രത്തിലെ സമാനതകളില്ലാത്ത കായിക ഉത്സവമായി മാറി.
കമ്മ്യൂണിറ്റിയിലെ പ്രമുഖ കായിക പരിശീലകരായ കോച്ച് ഓസ്റ്റിന് സെബാസ്റ്റ്യന്, കോച്ച് മാറ്റ് ജേക്കബ് എന്നിവര് ചേര്ന്ന് നയിച്ച പ്രീ-മാച്ച് ടാക്റ്റിക്കല് വിശകലനത്തോടെയാണ് പരിപാടികള്ക്ക് തുടക്കമായത്. വലിയ സ്ക്രീനില് തത്സമയം മത്സരം പ്രദര്ശിപ്പിക്കുന്നതിന് മുന്നോടിയായി, ഇരു ടീമുകളുടെയും കരുത്തും ദൗര്ബല്യങ്ങളും കളി തന്ത്രങ്ങളും വ്യക്തമാക്കുന്നതായിരുന്നു ഇവരുടെ വിശകലനം. ഇത് കാണികളില് മത്സരത്തെക്കുറിച്ചുള്ള കൗതുകവും ആവേശവും ഇരട്ടിയാക്കി. തുടര്ന്ന് മത്സരത്തിന്റെ പുരോഗതിയില് ഓരോ നിമിഷവും കാണികള് ശ്വാസമടക്കിപ്പിടിച്ചാണ് വീക്ഷിച്ചത്.
മത്സരത്തില് ആരാധകര് തങ്ങളുടെ പ്രിയപ്പെട്ട ടീമുകള്ക്കായി ആര്ത്തുവിളിച്ചും പ്രോത്സാഹിപ്പിച്ചും ഗാലറികളിലെ അന്തരീക്ഷം ഡാളസില് പുനഃസൃഷ്ടിച്ചു. ഒടുവില് ഫൈനല് വിസില് മുഴങ്ങിയതോടെ, ലോകകിരീടത്തില് മുത്തമിട്ട സ്പെയിനിന്റെ ആരാധകര് ആഹ്ലാദപ്രകടനങ്ങളുമായി വേദി കീഴടക്കി. കെ.എ.ഡി. പ്രസിഡണ്ട് ഷിജു എബ്രഹാം സെക്രട്ടറി മഞ്ജിത് കൈനിക്കര എന്നിവരുമായി നടത്തിയ പ്രത്യേക അഭിമുഖത്തില്, പ്രവാസി സമൂഹത്തിന്റെ ഈ ഒത്തൊരുമയും ആവേശവും വരുംതലമുറയ്ക്ക് കായികരംഗത്തേക്ക് കടന്നുവരാന് വലിയ പ്രചോദനമാകുമെന്ന് ഇരുവരും അഭിപ്രായപ്പെട്ടു.
തുടര്ന്ന് പരിപാടിയുടെ ഭാഗമായി ഒരുക്കിയ 'പോറ്റ്ലക്ക്' ഭക്ഷണവിരുന്ന് എല്ലാവരുടെയും പങ്കാളിത്തം കൊണ്ട് ശ്രദ്ധേയമായി. കൂടാതെ, ഫുട്ബോള് പ്രേമികള്ക്കായി സംഘടിപ്പിച്ച മത്സരഫല പ്രവചന മത്സരം ഏറെ ജനശ്രദ്ധ ആകര്ഷിച്ചു. കൃത്യമായി ഫലം പ്രവചിച്ച വിജയികള്ക്കും (സിജു വി ജോര്ജ് ,ജോബി ജോസഫ് ) , അസോസിയേഷന് ഭാരവാഹികള് ആകര്ഷകമായ സമ്മാനങ്ങള് വിതരണം ചെയ്തു.
കായികമത്സരങ്ങള് വെറുമൊരു കളി എന്നതിലുപരി സമൂഹത്തെ പരസ്പരം ഒന്നിപ്പിക്കുന്ന മികച്ച വേദികളാണെന്ന് ചടങ്ങില് സംസാരിച്ച ഭാരവാഹികള് ചൂണ്ടിക്കാട്ടി. ഇത്തരം കുടുംബസൗഹൃദപരമായ കായിക പരിപാടികള് വരും നാളുകളിലും സംഘടനയുടെ നേതൃത്വത്തില് തുടര്ന്നും സംഘടിപ്പിക്കുമെന്ന് അവര് ഉറപ്പുനല്കി. വിവിധ പ്രായക്കാരായ മലയാളികള് ഒത്തുചേര്ന്ന് ലോകകപ്പിന്റെ ഫൈനല് ആവേശം പങ്കിട്ട ഈ വാച്ച് പാര്ട്ടി ഡാളസിലെ ഫുട്ബോള് ആരാധകരുടെ മനസ്സില് എന്നും മായാത്ത ഒരു ഓര്മ്മയായി അവശേഷിക്കും.
കേരള അസോസിയേഷന് ഓഫ് ഡാളസ് ഷിജു എബ്രഹാം (പ്രസിഡന്റ്),അനശ്വര് മാമ്പിള്ളി (വൈസ് പ്രസിഡന്റ്),മഞ്ജിത് കൈനിക്കര (സെക്രട്ടറി),സിജു കൈനിക്കര (ട്രഷറര്),വിനോദ് ജോര്ജ്,ദീപക് നായര്,ഷിബു ജോണ്,ടോമി നെല്ലുവേലില്,സിജു വി. ജോര്ജ്,കോച്ച് ഓസ്റ്റിന് സെബാസ്റ്റ്യന്,മാറ്റ് ജേക്കബ്,സെബി മാളിയേക്കല് ,പ്രദീപ് നാഗനൂലില്,സിബി തലക്കുളം,ഫ്രാന്സിസ് പി. ഫ്രാന്സിസ്,സണ്ണി ജോസഫ്,കോശി പണിക്കര്,രാജന് ഐസക് എന്നിവര് പരിപാടികള്ക്ക് നേതൃത്വം നല്കി.