പുതിയ സമയക്രമം പ്രഖ്യാപിച്ച് ആൽബെർട്ട; നവംബർ മുതൽ മാറ്റം നിലവിൽ വരും

 

വർഷത്തിൽ രണ്ടുതവണ ക്ലോക്കിലെ സമയം മാറ്റുന്ന രീതി അവസാനിപ്പിച്ചുകൊണ്ട്, പ്രവിശ്യയിലുടനീളം ഇനി മുതൽ ഒരൊറ്റ സമയക്രമം പിന്തുടരുമെന്ന് ആൽബെർട്ട  ഔദ്യോഗികമായി പ്രഖ്യാപിച്ചു. 'ആൽബെർട്ട ടൈം' എന്ന് പേരിട്ടിരിക്കുന്ന ഈ പുതിയ പരിഷ്കാരം വരാനിരിക്കുന്ന നവംബർ മാസം മുതൽ നിലവിൽ വരും. ഇതനുസരിച്ച് പ്രവിശ്യ ഇനി മുതൽ മൗണ്ടൻ സ്റ്റാൻഡേർഡ് സമയത്തിലേക്ക് (MST) മാറില്ല. പകരം, മുൻപ് മൗണ്ടൻ ഡേലൈറ്റ് ടൈം (MDT) എന്ന് അറിയപ്പെട്ടിരുന്ന കോർഡിനേറ്റഡ് യൂണിവേഴ്സൽ ടൈം യുടിസി - 6:00  എന്ന സമയക്രമത്തിലായിരിക്കും ആൽബെർട്ട വർഷം മുഴുവൻ തുടരുക.

വർഷത്തിൽ രണ്ടുതവണ സമയം മാറ്റുന്നത് മൂലമുണ്ടാകുന്ന അസ്വസ്ഥതകളും തടസ്സങ്ങളും ഒഴിവാക്കാൻ പുതിയ പരിഷ്കാരം സഹായിക്കുമെന്ന് പ്രവിശ്യാ ഭരണകൂടം വ്യക്തമാക്കി. കുടുംബങ്ങൾ, ബിസിനസ്സുകൾ, സ്കൂളുകൾ, മറ്റ് സേവനങ്ങൾ എന്നിവയുടെ സുഗമമായ പ്രവർത്തനത്തിന് ഈ മാറ്റം കൂടുതൽ ഗുണം ചെയ്യുമെന്നാണ് വിലയിരുത്തൽ. കൂടാതെ, സീസണൽ സമയമാറ്റം ഇതിനകം തന്നെ ഒഴിവാക്കിയിട്ടുള്ള അയൽപ്രദേശങ്ങളുമായി ഒത്തുപോകാനും, അതിർത്തികൾ കടന്ന് ജോലി ചെയ്യുന്നവർക്കും ബിസിനസ്സ് നടത്തുന്നവർക്കുമുള്ള ആശയക്കുഴപ്പങ്ങൾ കുറയ്ക്കാനും ഇത് ഉപകരിക്കുമെന്നാണ് പ്രതീക്ഷിക്കുന്നത്.

അതേസമയം, പുതിയ സമയക്രമം നടപ്പിലാക്കിയ ശേഷമുള്ള ജനങ്ങളുടെ പ്രതികരണങ്ങളും അനുഭവങ്ങളും സർക്കാർ സൂക്ഷ്മമായി നിരീക്ഷിക്കും. ഈ തീരുമാനത്തിൽ ജനഹിതപരിശോധന നടത്താത്തതിനെക്കുറിച്ച് ഏപ്രിലിൽ നടന്ന വാർത്താ സമ്മേളനത്തിൽ പ്രീമിയർ ഡാനിയേൽ സ്മിത്തിനോട് ചോദ്യമുയർന്നിരുന്നു.  പരിഷ്കാരം നടപ്പിലാക്കി ഒരു വർഷത്തിന് ശേഷം, ജനങ്ങൾക്ക് ഇത് തെറ്റായ തീരുമാനമാണെന്ന് തോന്നുകയാണെങ്കിൽ 2027 ഒക്ടോബറിലെ ജനഹിതപരിശോധനയ്ക്കുള്ള ബാലറ്റിൽ ഇത് സംബന്ധിച്ച ചോദ്യം കൂടി ഉൾപ്പെടുത്തുമെന്നും പ്രീമിയർ കൂട്ടിച്ചേർത്തു.