എഡ്മൻ്റൺ കൊടുങ്കാറ്റ്: ഇൻഷുറൻസ് ക്ലെയിമുകൾ 23 കോടി ഡോളർ കടക്കുമെന്ന് റിപ്പോർട്ട്

 

എഡ്മൻ്റണിലും പരിസര പ്രദേശങ്ങളിലും ഉണ്ടായ രണ്ട് ശക്തമായ കൊടുങ്കാറ്റുകളിൽ ഏകദേശം 23 കോടി ഡോളറിൻ്റെ ഇൻഷുറൻസ് ക്ലെയിമുകൾ റിപ്പോർട്ട് ചെയ്തതായി ഇൻഷുറൻസ് ബ്യൂറോ ഓഫ് കാനഡ അറിയിച്ചു. മേയ് അവസാനവും ജൂൺ ആദ്യ ദിവസങ്ങളിലുമായി ഉണ്ടായ രണ്ട് വലിയ കൊടുങ്കാറ്റുകളാണ് ഈ ഭീമമായ നഷ്ടത്തിന് കാരണമായത്. ലഭിച്ച ക്ലെയിമുകളിൽ ഭൂരിഭാഗവും വീടുകൾക്ക് സംഭവിച്ച നാശനഷ്ടങ്ങളുമായി ബന്ധപ്പെട്ടതാണെന്ന് ഐബിസി വക്താവ് വ്യക്തമാക്കി. കൂടാതെ, വെള്ളപ്പൊക്കം കാരണം നിരവധി വ്യാപാര സ്ഥാപനങ്ങൾക്കും വാഹനങ്ങൾക്കും കേടുപാടുകൾ സംഭവിച്ചിട്ടുണ്ട്.

ജൂലൈ പകുതിയോടെ വീണ്ടും കൊടുങ്കാറ്റുകൾ വീശിയടിച്ചതിനാൽ, നഷ്ടത്തിൻ്റെ ആകെ തുക ഇനിയും ഉയരാനാണ് സാധ്യത. ഇതിൻ്റെ കൃത്യമായ വിവരങ്ങൾ ശേഖരിച്ചുവരികയാണ്.  ഈ സാഹചര്യത്തിൽ, വീടുടമസ്ഥരും വാടകക്കാരും തങ്ങളുടെ ഇൻഷുറൻസ് പോളിസികൾ കൃത്യമായി പരിശോധിച്ച് ഉറപ്പുവരുത്തണമെന്ന് അധികൃതർ ഓർമ്മിപ്പിച്ചു. സാധാരണ ഹോം ഇൻഷുറൻസ് പോളിസികളിൽ വെള്ളപ്പൊക്കം, മലിനജല പൈപ്പുകൾ വഴിയുള്ള നാശനഷ്ടങ്ങൾ എന്നിവയ്ക്കുള്ള പരിരക്ഷ ലഭിക്കാറില്ലെന്നും, ഇതിനായി പ്രത്യേക കവറേജ് എടുക്കേണ്ടതുണ്ടെന്നും ഇൻഷുറൻസ് ബ്യൂറോ വ്യക്തമാക്കി.