ഓര്മ്മകളില് എന്നും യൗവനത്തോടെ...ഡോ. ഷൊറണൂര് കാര്ത്തികേയന് മാഷിന് പ്രണാമം
By: 600002 On: Jul 17, 2026, 10:49 AM
എന് ശ്രീകുമാര്
ദീര്ഘകാലത്തെ രോഗാവസ്ഥയ്ക്ക് ശേഷം വിടപറഞ്ഞ ഡോ. ഷൊറണൂര് കാര്ത്തികേയന് മാഷിന്റെ ഓര്മ്മകള്ക്ക് മുന്നില് പ്രണാമം. നേരിട്ട് ക്ലാസ് മുറിയില് ഇരുത്തി പഠിപ്പിച്ചിട്ടില്ലെങ്കിലും, ഹൃദയം കൊണ്ട് എപ്പോഴും അദ്ദേഹം നമുക്കെല്ലാം പ്രിയപ്പെട്ട 'മാഷ്' തന്നെയായിരുന്നു.
പ്രായം 83 കഴിഞ്ഞിരുന്നെങ്കിലും മാഷിന്റെ മുഖത്ത് എപ്പോഴും ഒരു പ്രത്യേക ചെറുപ്പവും പ്രസന്നതയും തുളുമ്പിനിന്നിരുന്നു. വാര്ദ്ധക്യത്തിന്റെ അവശതകള്ക്കിടയിലും ആ മുഖത്തെ പ്രകാശം കെട്ടുപോയിരുന്നില്ല.
ശ്രീ കേരളവര്മ്മ കോളേജിലെ മലയാള വിഭാഗത്തില് ദീര്ഘകാലം സേവനമനുഷ്ഠിച്ച മാഷിന് മാതൃഭാഷയിലുള്ള പാണ്ഡിത്യം അത്ഭുതപ്പെടുത്തുന്നതായിരുന്നു. കേവലം ഒരു അധ്യാപകനപ്പുറം മലയാള ഭാഷയുടെ ആഴമറിഞ്ഞ ഒരു വലിയ ഭാഷാസ്നേഹിയായിരുന്നു അദ്ദേഹം.
എന്തും തുറന്നുപറയുന്നതായിരുന്നു മാഷിന്റെ ശീലം. കപടതകളില്ലാത്ത ആ തുറന്നുപറച്ചിലുകള് തന്നെയാണ് അദ്ദേഹത്തെ വ്യത്യസ്തനാക്കിയതും. പരമ്പരാഗതമായ ഗുരു-ശിഷ്യ അതിര്വരമ്പുകളൊന്നും മാഷിന്റെ അടുത്ത് പ്രസക്തമായിരുന്നില്ല. വരുന്നവരെയെല്ലാം തന്റെ സുഹൃത്തുക്കളായി കണ്ട് നെഞ്ചോട് ചേര്ത്തുപിടിക്കാന് മാഷിന് കഴിഞ്ഞു.
കോളേജിലെ മനോഹരമായ 'ഊട്ടി' എന്ന മരക്കൂട്ടത്തിന് തൊട്ടടുത്തായിരുന്നു മാഷിന്റെ വീട്. അതുകൊണ്ടുതന്നെ, ഔദ്യോഗിക ജീവിതത്തില് നിന്ന് വിരമിച്ച ശേഷവും കേരളവര്മ്മ കോളേജുമായുള്ള ആ ആത്മബന്ധം വീടിന്റെ ജനല്പ്പടികളിലൂടെയും ഉമ്മറത്തിലൂടെയും അദ്ദേഹം എപ്പോഴും കാത്തുസൂക്ഷിച്ചു.
പഴയ കെ.എസ്.യു (KSU) കാലത്തെ വിദ്യാര്ത്ഥി രാഷ്ട്രീയ പ്രവര്ത്തനങ്ങളിലേക്ക് തിരിഞ്ഞുനോക്കുമ്പോള്, മാഷ് നല്കിയ പ്രോത്സാഹനങ്ങള് ഒട്ടും ചെറുതല്ല. പാര്ട്ടി ഭേദമന്യേ വിദ്യാര്ത്ഥികളുടെ നന്മയെയും പ്രവര്ത്തനങ്ങളെയും മനസ്സറിഞ്ഞ് പിന്തുണച്ച ആ വലിയ മനസ്സിന് മുന്നില് നന്ദിയോടെ, ആദരവോടെ കൈകള് കൂപ്പുന്നു.
ഓര്മ്മകളുടെ മരത്തണലില് ആ സ്നേഹരൂപം എന്നും ജീവിക്കും. പ്രിയപ്പെട്ട കാര്ത്തികേയന് മാഷിന് പ്രണാമം!