സുരക്ഷാ ജീവനക്കാരനെ മച്ചെട്ടിയാല് വെട്ടി; ടെക്സസില് യുവാവിന് 50 വര്ഷം തടവ്
By: 600002 On: Jul 15, 2026, 9:40 AM
പ്രസാദ് തീയാടിക്കല്
ടെക്സസ്: ഫ്രിസ്കോയിലെ ഒരു ആരാധനാലയത്തിനുള്ളില് സുരക്ഷാ ജീവനക്കാരനെ മച്ചെട്ടി ഉപയോഗിച്ച് ക്രൂരമായി ആക്രമിച്ച കേസില് ഫ്രിസ്കോ സ്വദേശിയായ മാലിക് ചാള്സ് ആന്തണി ഡേവിസിന് (27) 50 വര്ഷം തടവുശിക്ഷ വിധിച്ചു. കോളിന് കൗണ്ടി ജില്ലാ അറ്റോര്ണി ഗ്രെഗ് വില്ലിസാണ് ശിക്ഷാവിധി സംബന്ധിച്ച വിവരം അറിയിച്ചത്.
2025 ജൂണ് 7-നാണ് ഫ്രിസ്കോയിലെ ഇസ്ലാമിക് സെന്റര് ഓഫ് ഫ്രിസ്കോയില് സംഭവം നടന്നത്. താമസസൗകര്യവും ഭക്ഷണവും ലഭിച്ചിരുന്ന പ്രതി കെട്ടിടത്തിനുള്ളില് ഒളിഞ്ഞിരുന്ന ശേഷം സുരക്ഷാ ചുമതല നിര്വഹിച്ചിരുന്ന ആയുധധാരിയായ ഗാര്ഡിനെ മച്ചെട്ടി ഉപയോഗിച്ച് പിന്നില് നിന്ന് ആക്രമിക്കുകയായിരുന്നുവെന്ന് പ്രോസിക്യൂഷന് കോടതിയെ അറിയിച്ചു.
ആക്രമണത്തിനിടെ സുരക്ഷാ ജീവനക്കാരന്റെ കൈവശമുണ്ടായിരുന്ന തോക്ക് നിലത്തുവീഴുകയും പ്രതി അത് കൈക്കലാക്കി രക്ഷപ്പെടാന് ശ്രമിക്കുകയും ചെയ്തു. തുടര്ന്ന് ഫ്രിസ്കോ പോലീസ് ഇയാളെ സമീപപ്രദേശത്ത് നിന്ന് അറസ്റ്റ് ചെയ്തു.
ജൂറി പ്രതിയെ Aggravated Assault കുറ്റത്തില് കുറ്റക്കാരനായി കണ്ടെത്തുകയും 50 വര്ഷത്തെ തടവുശിക്ഷ വിധിക്കുകയും ചെയ്തു. സുരക്ഷാ ജീവനക്കാരന്റെ തോക്ക് മോഷ്ടിച്ച കേസില് Theft of a Firearm കുറ്റവും തെളിഞ്ഞതിനെ തുടര്ന്ന് 180 ദിവസത്തെ അധിക തടവുശിക്ഷയും കോടതി വിധിച്ചു.
ശിക്ഷ നിര്ണയ വേളയില്, കോളിന് കൗണ്ടി ജയിലില് റിമാന്ഡില് കഴിയുന്നതിനിടെ സ്വന്തം സെല്മേറ്റിനെ കൊല്ലുമെന്ന് പ്രതി ഭീഷണിപ്പെടുത്തിയതടക്കമുള്ള തെളിവുകളും പ്രോസിക്യൂഷന് കോടതിയില് ഹാജരാക്കി.
ഈ കേസിലെ ശിക്ഷാവിധി, ആരാധനാലയങ്ങളിലെ സുരക്ഷാ ജീവനക്കാര്ക്കെതിരായ അതിക്രമങ്ങള് കര്ശനമായി നേരിടുമെന്ന് നിയമസംവിധാനം നല്കുന്ന ശക്തമായ സന്ദേശമാണെന്ന് കോളിന് കൗണ്ടി ജില്ലാ അറ്റോര്ണി ഗ്രെഗ് വില്ലിസ് പ്രതികരിച്ചു.