കാനഡയിൽ വീട് വില കൂടുമെന്ന് പ്രവചനം; ടൊറൻ്റോയിലും വാൻകൂവറിലും വില കുറയും

 

കാനഡയിലെ ഭവന വിപണിയിൽ ആവശ്യക്കാർ ഏറിയതോടെ ഈ വർഷം ഭവന വില ഇനിയും ഉയരുമെന്ന് പ്രമുഖ റിയൽ എസ്റ്റേറ്റ് കമ്പനിയായ റോയൽ ലെപേജ് വ്യക്തമാക്കി. 2026-ൻ്റെ അവസാന പകുതിയോടെ കാനഡയിലെ ശരാശരി വീട് വില മുൻവർഷത്തെ അപേക്ഷിച്ച് രണ്ട് ശതമാനം വർധിച്ച് 8,23,344 ഡോളറിലെത്തുമെന്നാണ് പുതിയ റിപ്പോർട്ട് വ്യക്തമാക്കുന്നത്. നേരത്തെ ഒരു ശതമാനം വർധനവാണ് പ്രവചിച്ചിരുന്നത്. 

കാനഡയിലെ പ്രധാന നഗരങ്ങളിലെ വില വ്യതിയാനങ്ങളും ലെപേജ് പ്രവചിച്ചിട്ടുണ്ട്. ഇതനുസരിച്ച് ക്യൂബെക് സിറ്റിയിലാണ് ഏറ്റവും ഉയർന്ന വിലക്കയറ്റത്തിന് സാധ്യത (8 ശതമാനം).    മോൺട്രിയൽ, വിന്നിപെഗ് എന്നിവിടങ്ങളിൽ അഞ്ച് ശതമാനം വർധനവിനും ഹാലിഫാക്സ്, എഡ്മൻ്റൺ, റജീന എന്നിവിടങ്ങളിൽ 4 ശതമാനം വർധനവിനും സാധ്യതയുണ്ട്. എന്നാൽ  കാനഡയിലെ ഏറ്റവും വിലകൂടിയ നഗരങ്ങളായ വാൻകൂവർ, ടൊറൻ്റോ എന്നിവിടങ്ങളിൽ യഥാക്രമം മൂന്നര ശതമാനവും രണ്ട്  ശതമാനവും വില കുറയാൻ സാധ്യതയുണ്ട്.

വർഷത്തിൻ്റെ തുടക്കത്തിൽ ഭവന വിപണിയിൽ മന്ദഗതിയായിരുന്നെങ്കിലും മേയ്, ജൂൺ മാസങ്ങളോടെ വിപണി സജീവമായി. വരും മാസങ്ങളിലും ഈ മുന്നേറ്റം തുടരുമെന്ന് റോയൽ ലെപേജ് സി.ഇ.ഒ ഫിൽ സോപ്പർ പറഞ്ഞു. അതേസമയം, പണപ്പെരുപ്പവും അമേരിക്കയുമായുള്ള വ്യാപാര കരാറിലെ (CUSMA) അനിശ്ചിതത്വങ്ങളും കാരണം വലിയ സാമ്പത്തിക തീരുമാനങ്ങൾ എടുക്കാൻ കാനഡക്കാർ ഇപ്പോഴും മടിക്കുന്നുണ്ടെന്നും റിപ്പോർട്ടിൽ പറയുന്നു. വലിയ നഗരങ്ങളിൽ വില അല്പം കുറയുന്നത് പുതിയ വാങ്ങലുകാർക്ക് സഹായകരമാകുമ്പോൾ, മറ്റ് ചെറുകിട നഗരങ്ങളിൽ വില സ്ഥിരമായി ഉയരുകയാണെന്നും റിപ്പോർട്ട് ചൂണ്ടിക്കാണിക്കുന്നു.