നോസ് ഹിൽ പാർക്കിലെ കളകൾ നീക്കാൻ അറുന്നൂറോളം ആടുകളെ ഇറക്കി കാൽഗറി നഗരസഭ

നോസ് ഹിൽ പാർക്കിലെ കളകൾ നീക്കാൻ അറുന്നൂറോളം ആടുകളെ ഇറക്കി കാൽഗറി നഗരസഭ. പാർക്കിലെ പുൽമേടുകൾ സംരക്ഷിക്കുന്നതിനും ദോഷകരമായ കളകൾ തിന്നുതീർക്കുന്നതിനുമായി അറുന്നൂറോളം ആടുകളെയാണ് വീണ്ടും നോസ് ഹിൽ പാർക്കിൽ എത്തിച്ചത്. ജൂലൈ 14 മുതൽ ജൂലൈ 30 വരെയുള്ള ദിവസങ്ങളിൽ പാർക്കിലെ പ്രത്യേക വേലി കെട്ടിത്തിരിച്ച ഭാഗങ്ങളിലാണ് ആടുകളെ മേയാൻ വിടുന്നത്.

മുൻകാലങ്ങളിൽ ബൈസൺ, എൽക് തുടങ്ങിയ വലിയ മൃഗങ്ങൾ പുല്ലു മേഞ്ഞ് പ്രകൃതിദത്തമായി പുൽമേടുകൾ സംരക്ഷിച്ചിരുന്ന രീതിക്ക് സമാനമായാണ് ഈ പദ്ധതി നടപ്പാക്കുന്നത്. ആടുകൾ കാട്ടുചെടികളും ഉണങ്ങിയ പുല്ലുകളും തിന്നുതീർക്കുന്നതോടെ, പ്രകൃതിദത്തമായ നല്ല പുല്ലുകൾക്ക് വളരാൻ കൂടുതൽ സ്ഥലം ലഭിക്കും. ഇത് കാട്ടുതീ ഉണ്ടാകാനുള്ള സാധ്യത കുറയ്ക്കുമെന്നും നഗരസഭ അധികൃതർ വ്യക്തമാക്കി.

ദീർഘകാല പരിസ്ഥിതി ആരോഗ്യത്തിന് ഇത്തരം പ്രകൃതിദത്തമായ മാർഗ്ഗങ്ങൾ ഏറെ ഫലപ്രദമാണെന്ന് പരിസ്ഥിതി ശാസ്ത്രജ്ഞനായ ആൻഡ്രൂ ഫെൽപ്സ് പറഞ്ഞു. ആടുകൾ മേയുന്ന സ്ഥലങ്ങളിൽ താൽക്കാലിക വേലികളും ഇവയെ നിയന്ത്രിക്കാൻ പ്രത്യേക ആളുകളെയും നായ്ക്കളെയും നിയോഗിച്ചിട്ടുണ്ട്. ഈ ദിവസങ്ങളിൽ പാർക്കിലെ ചില നടപ്പാതകൾ താൽക്കാലികമായി അടച്ചിടുമെന്നും സന്ദർശകർ സഹകരിക്കണമെന്നും അധികൃതർ അറിയിച്ചു.