വ്യാജ വോട്ടർ വിവരങ്ങളുമായി വ്യാജ വെബ്‌സൈറ്റ്: നടപടിക്കൊരുങ്ങി ഇലക്ഷൻസ് ആൽബർട്ട

 

ഇലക്ഷൻസ് ആൽബർട്ടയുടെ ഔദ്യോഗിക വെബ്‌സൈറ്റിന് സമാനമായ രീതിയിൽ വ്യാജ വെബ്‌സൈറ്റ് നിർമ്മിച്ച് തെറ്റായ വിവരങ്ങൾ പ്രചരിപ്പിക്കുന്നതിനെതിരെ അധികൃതർ രംഗത്ത്. ഏജൻസിയുടെ വിശ്വാസ്യത തകർക്കാനുള്ള ബോധപൂർവ്വമായ ശ്രമമാണിതെന്ന് ചീഫ് ഇലക്ടറൽ ഓഫീസർ ഗോർഡൻ മക്ലൂർ പറഞ്ഞു. 'elections.ab.ca' എന്ന ഔദ്യോഗിക യു.ആർ.എല്ലിന് പകരം 'electionsab.ca' എന്ന പേരിലാണ് വ്യാജ സൈറ്റ് നിർമ്മിച്ചിരിക്കുന്നത്. 

അടുത്തിടെ നടന്ന വോട്ടർമാരുടെ വിവര ചോർച്ചയുമായി ബന്ധപ്പെട്ട ആശങ്കകളെ ചൂഷണം ചെയ്യാനാണ് ഈ സൈറ്റ് ശ്രമിക്കുന്നത്. ഇതിൽ നൽകിയിട്ടുള്ള വോട്ടർമാരുടെ പേര്, വിലാസം, ഫോൺ നമ്പർ, വോട്ടർ ഐഡി എന്നിവയെല്ലാം വ്യാജമാണെന്ന് അധികൃതർ വ്യക്തമാക്കി. ആൽബർട്ടയിലെ ഏരിയ കോഡുകളുള്ള ഫോൺ നമ്പറുകളാണ് നൽകിയിട്ടുള്ളതെങ്കിലും ഇവയെല്ലാം 555 ലാണ് ആരംഭിക്കുന്നത്. കൂടാതെ പേരുകൾ ആവർത്തിച്ചു നൽകിയിട്ടുള്ളതായും കണ്ടെത്തിയിട്ടുണ്ട്. ഈ വ്യാജ വെബ്‌സൈറ്റിനെതിരെ അന്വേഷണം നടത്താൻ ഇലക്ഷൻസ് ആൽബർട്ടയ്ക്ക് നിയമപരമായ അധികാരമില്ല. എങ്കിലും, സൈറ്റ് ഇൻ്റർനെറ്റിൽ നിന്ന് നീക്കം ചെയ്യുന്നതിനായി സൈബർ സുരക്ഷാ വിഭാഗത്തെയും മറ്റ് അന്വേഷണ ഏജൻസികളെയും സമീപിച്ചിട്ടുണ്ടെന്ന് ഗോർഡൻ മക്ലൂർ അറിയിച്ചു.

നേരത്തെ, 'സെഞ്ചൂറിയൻ പ്രോജക്റ്റ്' എന്ന സംഘടന വോട്ടർമാരുടെ വിവരങ്ങൾ അടങ്ങിയ ഒരു ആപ്പ് പുറത്തുവിട്ടതിനെ തുടർന്ന് കോടതി ഉത്തരവിലൂടെ അത് മെയ് മാസത്തിൽ നീക്കം ചെയ്തിരുന്നു. ഈ സംഭവത്തിൽ ആർ.സി.എം.പി അന്വേഷണം നടത്തിവരികയാണ്. ഇതിന് പിന്നാലെയാണ് പുതിയ വ്യാജ വെബ്‌സൈറ്റ് പ്രത്യക്ഷപ്പെട്ടിരിക്കുന്നത്. ഇത്തരം വ്യാജ സൈറ്റുകളോ വിവരങ്ങളോ ശ്രദ്ധയിൽപ്പെട്ടാൽ ഉടനടി അറിയിക്കണമെന്ന് ഇലക്ഷൻസ് ആൽബർട്ട പൊതുജനങ്ങളോട് അഭ്യർത്ഥിച്ചു.