വധഭീഷണിയും കോടികളുടെ തട്ടിപ്പും: കാനഡയിൽ അധോലോക സാമ്രാജ്യം വ്യാപിപ്പിച്ച് ലോറൻസ് ബിഷ്ണോയി സംഘം

 

കാനഡയിലെ ഇന്ത്യൻ വംശജരെയും സിഖ് സമൂഹത്തെയും ലക്ഷ്യമിട്ട് കുപ്രസിദ്ധ കുറ്റവാളി ലോറൻസ് ബിഷ്ണോയിയുടെ നേതൃത്വത്തിലുള്ള ക്രിമിനൽ സംഘം വലിയ തോതിൽ സ്വാധീനമുറപ്പിക്കുന്നതായി കനേഡിയൻ സുരക്ഷാ ഉദ്യോഗസ്ഥരെ ഉദ്ധരിച്ച് റിപ്പോർട്ടുകൾ പുറത്ത്. ഇന്ത്യയിലെ ജയിലിൽ കഴിയുന്ന ബിഷ്ണോയി, മൊബൈൽ ഫോണുകളും മറ്റ് ആശയവിനിമയ സംവിധാനങ്ങളും ഉപയോഗിച്ചാണ് കാനഡയിലെ തൻ്റെ അധോലോക പ്രവർത്തനങ്ങൾ നിയന്ത്രിക്കുന്നതെന്നാണ് കണ്ടെത്തൽ. കാനഡയിൽ മാത്രം ഈ സംഘത്തിന് ആയിരത്തിലധികം സജീവ അംഗങ്ങളുണ്ടെന്നാണ് കനേഡിയൻ പൊലീസ് വ്യക്തമാക്കുന്നത്. ഭീഷണിപ്പെടുത്തി പണം തട്ടൽ , വാടകക്കൊലപാതകങ്ങൾ , കവർച്ച തുടങ്ങിയ നിരവധി ക്രിമിനൽ പ്രവർത്തനങ്ങളിലാണ് ഇവർ ഏർപ്പെട്ടിരിക്കുന്നത്.

വിദ്യാർത്ഥി വിസയിലും താൽക്കാലിക ജോലി വിസയിലും കാനഡയിലെത്തുന്ന  ഇന്ത്യൻ യുവാക്കളെ ലക്ഷ്യമിട്ടാണ് ബിഷ്ണോയി സംഘം തങ്ങളുടെ ശൃംഖല വളർത്തുന്നത്. കാനഡയിലെത്തിയ ശേഷം ഒറ്റപ്പെട്ടുപോകുന്ന ഇത്തരക്കാരെ കുറഞ്ഞ പണം നൽകിയും മറ്റ് വഴികളിലൂടെ സ്വാധീനമുറപ്പിച്ചും സംഘത്തിലേക്ക് ആകർഷിക്കുകയാണ് ഇവരുടെ രീതി. വൻകിട ബിസിനസ്സുകാരെയും പ്രമുഖ വ്യക്തികളെയും ഫോണിലൂടെയും വാട്സ്ആപ്പിലൂടെയും ഭീഷണിപ്പെടുത്തി ഇവർ കോടിക്കണക്കിന് രൂപ ആവശ്യപ്പെടുന്നു. പണം നൽകാൻ വിസമ്മതിക്കുന്നവരുടെ വീടുകൾക്കും വ്യാപാര സ്ഥാപനങ്ങൾക്കും നേരെ വെടിയുതിർത്ത്  ഭീതി പടർത്തുകയാണ് ഇവരുടെ പ്രധാന രീതി. കാനഡ സർക്കാർ ഈ ഗ്രൂപ്പിനെ അടുത്തിടെ ഒരു ഭീകര സംഘടനയായി പ്രഖ്യാപിച്ചിരുന്നു.

2023-ൽ കാനഡയിൽ വെച്ച് സിഖ് നേതാവ് ഹർദീപ് സിംഗ് നിജ്ജാർ കൊല്ലപ്പെട്ട സംഭവത്തിൽ ലോറൻസ് ബിഷ്ണോയിക്കും വിദേശത്ത് ഒളിവിൽ കഴിയുന്ന സഹപ്രവർത്തകൻ ഗോൾഡി ബ്രാറിനും പങ്കുണ്ടെന്ന കണ്ടെത്തൽ അടുത്തിടെ പുറത്തുവന്ന യു.എസ് കുറ്റപത്രത്തിൽ വ്യക്തമാക്കുന്നുണ്ട്. കാനഡയിലും യു.എസിലും സമാന്തരമായി ഇത്തരം കുറ്റകൃത്യങ്ങളിൽ ഏർപ്പെട്ടിരുന്ന ഈ ശൃംഖലയെ അടിച്ചമർത്താൻ ഇരു രാജ്യങ്ങളിലെയും സുരക്ഷാ ഏജൻസികൾ സംയുക്തമായി ശക്തമായ നടപടികളാണ്  സ്വീകരിച്ചു വരുന്നത്. ഇതിൻ്റെ ഭാഗമായി വിവിധയിടങ്ങളിൽ നിന്നായി പത്തിലധികം പേരെ ഇതിനോടകം അറസ്റ്റ് ചെയ്തിട്ടുമുണ്ട്.