അബദ്ധത്തിൽ തൻ്റെ ബാങ്ക് അക്കൌണ്ടിലേക്ക് എത്തിയ പണം തിരികെ നൽകിയ യുവാവിൻ്റെ അക്കൗണ്ട് പൂട്ടി കാനഡ റവന്യൂ ഏജൻസി

 

അബദ്ധത്തിൽ തന്റെ ബാങ്ക് അക്കൗണ്ടിലേക്ക് വന്ന ഭീമമായ തുക തിരികെ നൽകിയ കനേഡിയൻ സ്വദേശിക്ക് ഒടുവിൽ കടുത്ത ദുരിതം സമ്മാനിച്ച് കാനഡ റവന്യൂ ഏജൻസി. ഒന്റാറിയോയിലെ തണ്ടർ ബേ നിവാസിയായ അലക്സ് പിലോൺ എന്ന മുപ്പത്തഞ്ചുകാരനാണ് ഈ ദുരനുഭവം ഉണ്ടായത്. കഴിഞ്ഞ വർഷം മാർച്ചിൽ ഇയാളുടെ അക്കൗണ്ടിലേക്ക് 'ടാക്സ് റീഫണ്ട് - കാനഡ' എന്ന പേരിൽ 24,274 കനേഡിയൻ ഡോളർ  അപ്രതീക്ഷിതമായി നിക്ഷേപിക്കപ്പെട്ടു. താൻ നികുതി റിട്ടേൺ സമർപ്പിക്കുന്നതിന് മുൻപ് തന്നെ വന്ന ഈ തുക ഒരു സർക്കാർ പിഴവോ അല്ലെങ്കിൽ തട്ടിപ്പോ ആകാം എന്ന് മനസ്സിലാക്കിയ അലക്സ്, ഉടൻ തന്നെ സി.ആർ.എയുമായി ബന്ധപ്പെട്ട് തുക പൂർണ്ണമായും തിരികെ നൽകി. എന്നാൽ ഈ മാതൃകാപരമായ പ്രവൃത്തിക്ക് തൊട്ടുപിന്നാലെ അധികൃതർ ഇയാളുടെ ഔദ്യോഗിക സി.ആർ.എ അക്കൗണ്ട് ബ്ലോക്ക് ചെയ്യുകയായിരുന്നു.  

അക്കൗണ്ട് പൂട്ടി ഒന്നര വർഷം പിന്നിട്ടിട്ടും തനിക്ക് യഥാർത്ഥത്തിൽ ലഭിക്കേണ്ടിയിരുന്ന നികുതിപ്പണം തിരികെ കിട്ടാൻ അലക്സ് ഇപ്പോഴും ഓഫീസുകൾ കയറിയിറങ്ങുകയാണ്. 2024, 2025 വർഷങ്ങളിലെ നികുതി ഇനത്തിലും ജി.എസ്.ടി ക്രെഡിറ്റിലുമായി 3,300 ഡോളറിലധികം തുക ഇയാൾക്ക് സർക്കാർ നൽകാനുണ്ട്. അടുത്തിടെ ഒരു വീട് വാങ്ങിയതിനാൽ ഈ തുക തനിക്ക് ഏറെ അനിവാര്യമാണെന്നും, എന്നാൽ മണിക്കൂറുകളോളം കസ്റ്റമർ കെയർ വിഭാഗവുമായി ഫോണിൽ സംസാരിച്ചിട്ടും യാതൊരു പ്രയോജനവും ഉണ്ടായിട്ടില്ലെന്നും അദ്ദേഹം വ്യക്തമാക്കുന്നു. വ്യക്തിഗത വിവരങ്ങളുടെ സുരക്ഷ മുൻനിർത്തി അലക്സിന്റെ കേസിനെക്കുറിച്ച് പരസ്യമായി പ്രതികരിക്കാൻ സി.ആർ.എ തയ്യാറായിട്ടില്ലെങ്കിലും, പരാതികളിൽ എത്രയും പെട്ടെന്ന് പരിഹാരം കാണാൻ ശ്രമിക്കുകയാണെന്ന് ഏജൻസി വക്താവ് അറിയിച്ചു. 

കാനഡയിൽ നികുതി റീഫണ്ടുകൾ വൈകുന്നതുമായി ബന്ധപ്പെട്ട് ജനങ്ങൾ നേരിടുന്ന സമാനമായ നിരവധി പരാതികളിൽ ഒടുവിലത്തേത് മാത്രമാണ് അലക്സിന്റേത്. കഴിഞ്ഞ സാമ്പത്തിക വർഷത്തിൽ സി.ആർ.എയ്ക്ക് എതിരെ ലഭിച്ച പരാതികളിൽ 27 ശതമാനത്തിന്റെ വർദ്ധനവുണ്ടായതായി രാജ്യത്തെ ടാക്സ് ഓംബുഡ്സ്മാൻ ഓഫീസ് പുറത്തുവിട്ട റിപ്പോർട്ടിൽ പറയുന്നു. ഫോൺ കോൾ സെന്ററുകളിലെ സേവനം മെച്ചപ്പെടുത്താൻ സർക്കാർ പ്രത്യേക പദ്ധതികൾ പ്രഖ്യാപിച്ചെങ്കിലും, നികുതി റിട്ടേണുകൾ പ്രോസസ്സ് ചെയ്യുന്ന പ്രധാന കേന്ദ്രങ്ങളിൽ ജീവനക്കാരുടെ കടുത്ത ക്ഷാമം നേരിടുന്നതാണ് ഇത്തരം വലിയ താമസം നേരിടാൻ പ്രധാന കാരണമെന്ന് ടാക്സേഷൻ ജീവനക്കാരുടെ യൂണിയൻ വ്യക്തമാക്കുന്നു.