ആപ്പ് സ്റ്റോറുകളില് പ്രായപരിശോധന നിര്ബന്ധമാക്കുന്ന ടെക്സസ് നിയമത്തിന് സുപ്രീം കോടതിയുടെ അനുമതി
By: 600002 On: Jul 7, 2026, 11:15 AMപി പി ചെറിയാന്
വാഷിംഗ്ടണ്: ആപ്പ് സ്റ്റോറുകള് വഴി ആപ്ലിക്കേഷനുകള് ഡൗണ്ലോഡ് ചെയ്യുന്ന ഉപഭോക്താക്കളുടെ പ്രായപരിശോധന നിര്ബന്ധമാക്കുന്ന ടെക്സസ് സംസ്ഥാന നിയമം തടയണമെന്ന ആവശ്യവുമായി സമര്പ്പിക്കപ്പെട്ട അടിയന്തര ഹര്ജികള് യുഎസ് സുപ്രീം കോടതി തള്ളിക്കളഞ്ഞു. തിങ്കളാഴ്ചയാണ് കോടതി ഈ സുപ്രധാന തീരുമാനം പ്രഖ്യാപിച്ചത്. ഹര്ജികള് നിരസിച്ചതുമായി ബന്ധപ്പെട്ട് കൂടുതല് വിശദീകരണങ്ങളൊന്നും നല്കാന് കോടതി തയ്യാറായില്ല. വിധിയില് ജഡ്ജിമാര് ആരും തന്നെ വിയോജിപ്പ് രേഖപ്പെടുത്തിയിട്ടുമില്ല.
സെനറ്റ് ബില് 2420 പ്രകാരം ആപ്പ് സ്റ്റോറുകളില് പ്രായപരിശോധന നടത്തണമെന്നും പ്രായപൂര്ത്തിയാകാത്തവര് ആപ്പുകള് ഡൗണ്ലോഡ് ചെയ്യുന്നതിന് മാതാപിതാക്കളുടെ അനുമതി വാങ്ങണമെന്നും ടെക്സസ് നിയമം നിര്ബന്ധമാക്കുന്നുണ്ട്. എന്നാല് ഈ നിയമം ഭരണഘടനയുടെ ഒന്നാം ഭേദഗതിയുടെ ലംഘനമാണെന്ന് ചൂണ്ടിക്കാട്ടിയാണ് 'സ്റ്റുഡന്റ്സ് എന്ഗേജ്ഡ് ഇന് അഡ്വാന്സിങ് ടെക്സസ്' എന്ന ആക്ടിവിസ്റ്റ് ഗ്രൂപ്പും, സാങ്കേതിക വ്യവസായ മേഖലയിലെ ലോബിയിങ് സംഘടനയായ 'കമ്പ്യൂട്ടര് ആന്ഡ് കമ്മ്യൂണിക്കേഷന്സ് ഇന്ഡസ്ട്രി അസോസിയേഷനും' കഴിഞ്ഞ മാസം സുപ്രീം കോടതിയെ സമീപിച്ചത്. ഈ ഹര്ജികളാണ് ഇപ്പോള് കോടതി തള്ളിയിരിക്കുന്നത്.