വിറ്റ്ബിയിലെ കളിസ്ഥലത്ത് കോയോട്ടെയുടെ ആക്രമണം; രണ്ട് വയസ്സുകാരൻ്റെ മുഖത്ത് ഗുരുതര പരിക്ക്

 

കാനഡയിലെ വിറ്റ്ബിയിലുള്ള കളിസ്ഥലത്ത് കോയോട്ടെയുടെ ആക്രമണം. രണ്ട് വയസ്സുകാരനായ ആൺകുട്ടിക്ക് ഗുരുതര പരിക്കേറ്റു. മുഖത്ത് കടിയേറ്റ കുട്ടിയെ ഗുരുതര പരിക്കുകളോടെ ആശുപത്രിയിൽ പ്രവേശിപ്പിച്ചു. ഞായറാഴ്ച രാത്രി 8:30 ഓടെ വാനിയർ പാർക്കിലായിരുന്നു സംഭവം. കുട്ടി കളിസ്ഥലത്ത് നിൽക്കുമ്പോൾ പെട്ടെന്ന് പാഞ്ഞെത്തിയ കോയോട്ടെ കുട്ടിയുടെ മുഖത്ത് കടിക്കുകയായിരുന്നു. കുട്ടിയുടെ കൂടെയുണ്ടായിരുന്നവരും പ്രദേശവാസികളും ചേർന്നാണ് ഒടുവിൽ മൃഗത്തെ ഭയപ്പെടുത്തി ഓടിച്ചത്.

കുട്ടിയുടെ പരിക്ക് ഗുരുതരമാണെങ്കിലും ജീവന് ഭീഷണിയില്ലെന്ന് പോലീസ് അറിയിച്ചു. ഈ സംഭവത്തിന് പിന്നാലെ, രാത്രി 9:20 ഓടെ ഹാരിറ്റ്, ആൻഡ് സ്ട്രീറ്റുകൾക്ക് സമീപം മറ്റൊരു കോയോട്ടെയെ അവശ നിലയിൽ നാട്ടുകാർ കണ്ടെത്തുകയും പോലീസ് ഇതിനെ ഈ പ്രദേശത്ത് നിന്ന് മാറ്റുകയും ചെയ്തു. അടുത്തിടെ വിറ്റ്ബിയിൽ നടക്കുന്ന രണ്ടാമത്തെ കോയോട്ടെ ആക്രമണമാണിത്. ജൂൺ 22-നും സമാനമായ രീതിയിൽ ഒരു കുട്ടിക്ക് കോയോട്ടെയുടെ കടിയേറ്റിരുന്നു. ജി.ടി.എ മേഖലയിൽ കോയോട്ടെകളുടെ ആക്രമണം വർദ്ധിച്ചുവരുന്ന സാഹചര്യത്തിൽ പോലീസ് പൊതുജനങ്ങൾക്കായി ജാഗ്രതാ നിർദ്ദേശം പുറപ്പെടുവിച്ചിട്ടുണ്ട്. കോയോട്ടികൾ അക്രമസ്വഭാവം കാണിച്ചാൽ ഉടൻ തന്നെ 911 എന്ന നമ്പറിൽ പോലീസിനെ വിവരമറിയിക്കാൻ അധികൃതർ നിർദ്ദേശിച്ചു.