കാനഡയിൽ ജീവിക്കാൻ ഏറ്റവും അനുയോജ്യമായ നഗരങ്ങളുടെ പട്ടികയിൽ കാൽഗറി ഒന്നാമത്

 

 

കാനഡയിൽ ജീവിക്കാൻ ഏറ്റവും മികച്ച നഗരങ്ങളുടെ പട്ടികയിൽ കാൽഗറി ഒന്നാം സ്ഥാനം സ്വന്തമാക്കിയതായി റിപ്പോർട്ട്. പ്രമുഖ അന്താരാഷ്ട്ര കൺസൾട്ടൻസി ഏജൻസിയായ 'ഗ്ലോബൽ സിറ്റിസൺ സൊല്യൂഷൻസ്' പുറത്തുവിട്ട ഏറ്റവും പുതിയ പഠന റിപ്പോർട്ടിലാണ് കാൽഗറി ഈ നേട്ടം കൈവരിച്ചത്. മിതമായ ജീവിതച്ചെലവ്, ഉയർന്ന ജീവിതനിലവാരം, വിപുലമായ തൊഴിലവസരങ്ങൾ എന്നിവയാണ് കാൽഗറിയെ രാജ്യത്തെ മറ്റ് പ്രമുഖ മെട്രോപൊളിറ്റൻ നഗരങ്ങളെക്കാൾ മുന്നിലെത്തിച്ചത്. പട്ടികയിൽ കാനഡയുടെ തലസ്ഥാനമായ ഓട്ടവ രണ്ടാം സ്ഥാനവും എഡ്മൻ്റൺ മൂന്നാം സ്ഥാനവും കരസ്ഥമാക്കി.

തൊഴിൽപരമായ വളർച്ചയ്ക്കും മികച്ച വേതന ഘടനയ്ക്കും ഏറ്റവും അനുയോജ്യമായ നഗരമായിട്ടാണ് റിപ്പോർട്ട് കാൽഗറിയെ അടയാളപ്പെടുത്തുന്നത്. ബിസിനസ് സർവീസസ്, അന്താരാഷ്ട്ര വ്യാപാരം, ഹോസ്പിറ്റാലിറ്റി, കൺസ്ട്രക്ഷൻ, പ്രകൃതിവിഭവങ്ങൾ, മാനുഫാക്ചറിങ് തുടങ്ങിയ മേഖലകളിലാണ് നഗരത്തിൽ പ്രധാനമായും തൊഴിലവസരങ്ങൾ കേന്ദ്രീകരിച്ചിരിക്കുന്നത്. നിലവിൽ കാൽഗറിയിലെ ശരാശരി വാർഷിക വേതനം 63,700 കനേഡിയൻ ഡോളറാണ്. വാടക ഒഴികെയുള്ള ഒരു വ്യക്തിയുടെ ശരാശരി പ്രതിമാസ ജീവിതച്ചെലവ് 1,508 ഡോളറാണെന്നതും, ശരാശരി ഭവനവില 665,695 ഡോളറാണെന്നതും നഗരത്തിൻ്റെ സാമ്പത്തിക സുരക്ഷിതത്വത്തിന് അടിവരയിടുന്നു.

സാമ്പത്തിക ഘടകങ്ങൾക്ക് പുറമെ ഉന്നത നിലവാരത്തിലുള്ള ആരോഗ്യപരിപാലന സംവിധാനം, കുറഞ്ഞ കുറ്റകൃത്യ നിരക്ക്, കുറഞ്ഞ നികുതി ഘടന എന്നിവയും കാൽഗറിയുടെ ജനപ്രീതി വർധിപ്പിക്കുന്നതായി വിലയിരുത്തപ്പെടുന്നു. രാജ്യത്തെ ഏറ്റവും മികച്ച വിദ്യാഭ്യാസ സമ്പ്രദായങ്ങളിലൊന്നാണ് ഈ നഗരത്തിലുള്ളത്. ഭൂമിശാസ്ത്രപരമായി റോക്കി പർവതനിരകളോടുള്ള സാമീപ്യവും ഹൈക്കിംഗ്, സ്നോബോർഡിംഗ്, സ്കീയിംഗ് തുടങ്ങിയ ശീതകാല വിനോദങ്ങൾക്കുള്ള എളുപ്പത്തിലുള്ള ലഭ്യതയും നഗരത്തിലെ ജീവിതം കൂടുതൽ ആകർഷകമാക്കുന്നു. വിദേശത്തുനിന്നും എത്തുന്ന കുടിയേറ്റക്കാർക്ക് എളുപ്പത്തിൽ ഇണങ്ങിച്ചേരാൻ സാധിക്കുന്ന സൗഹൃദപരമായ അന്തരീക്ഷമാണ് നഗരത്തിനുള്ളതെന്നും റിപ്പോർട്ട് വ്യക്തമാക്കുന്നു.