പ്രയറി മേഖലയ്ക്ക് 26 മില്യൺ ഡോളറിൻ്റെ ക്ലീൻ എനർജി ഫണ്ടുമായി കനേഡിയൻ സർക്കാർ

ആൽബർട്ട, സസ്‌കാച്ചെവൻ പ്രവിശ്യകളിലുടനീളമുള്ള 17 ക്ലീൻ എനർജി  പദ്ധതികൾക്കായി  ഫെഡറൽ സർക്കാർ 26 മില്യൺ ഡോളറിൻ്റെ സാമ്പത്തിക സഹായം പ്രഖ്യാപിച്ചു. പ്രദേശത്തെ ഊർജ്ജ സംവിധാനങ്ങളും അടിസ്ഥാന സൗകര്യങ്ങളും ആധുനികവൽക്കരിക്കാനും കാർബൺ പുറന്തള്ളൽ കുറയ്ക്കാനും ലക്ഷ്യമിട്ടാണ് ഈ പദ്ധതി നടപ്പിലാക്കുന്നതെന്ന് ഫെഡറൽ ഊർജ്ജ മന്ത്രി ടിം ഹോഡ്‌സൺ വ്യക്തമാക്കി. സോളാർ-വിൻഡ് പ്രോജക്ടുകൾ, ഗ്രിഡ് സ്റ്റോറേജ് വികസനം, പ്രവിശ്യകൾ തമ്മിലുള്ള വൈദ്യുതി വിതരണ ശൃംഖലയുടെ നവീകരണം, തദ്ദേശീയരുടെ നേതൃത്വത്തിലുള്ള ഹരിത ഊർജ്ജ സംരംഭങ്ങൾ എന്നിവയ്ക്കായിരിക്കും ഈ ഫണ്ടിൻ്റെ പ്രധാന പങ്ക് വിനിയോഗിക്കുക. 2050-ഓടെ രാജ്യത്തെ വൈദ്യുതി ഗ്രിഡിൻ്റെ ശേഷി ഇരട്ടിയാക്കാനുള്ള തന്ത്രപരമായ നീക്കത്തിൻ്റെ ഭാഗമാണിത്.

വ്യാഴാഴ്ച പ്രഖ്യാപിച്ച വൻകിട പൈപ്പ്‌ലൈൻ പദ്ധതിക്ക് തൊട്ടുപിന്നാലെയാണ് ഫെഡറൽ സർക്കാരിൻ്റെ ഈ പുതിയ പ്രഖ്യാപനം വന്നിരിക്കുന്നത്. ആൽബർട്ട സർക്കാരും ഫെഡറൽ ഉടമസ്ഥതയിലുള്ള ട്രാൻസ് മൗണ്ടൻ കോർപ്പറേഷനും കാൽഗറി ആസ്ഥാനമായുള്ള പെമ്പിന പൈപ്പ്‌ലൈനും സംയുക്തമായി "വെസ്റ്റ് കോസ്റ്റ് പൈപ്പ്‌ലൈൻ" നിർമ്മിച്ച് പ്രവർത്തിപ്പിക്കുമെന്ന് ആൽബർട്ട പ്രീമിയർ ഡാനിയേൽ സ്മിത്ത് അറിയിച്ചു. നിലവിലുള്ള ട്രാൻസ് മൗണ്ടൻ പൈപ്പ്‌ലൈനിൻ്റെ പാത പിന്തുടർന്ന് നിർമ്മിക്കുന്ന ഈ പുതിയ പദ്ധതി,  ബ്രൂഡർഹൈമിൽ നിന്ന് ആരംഭിച്ച്  ബ്രിട്ടീഷ് കൊളംബിയയിലെ ഡെൽറ്റാ ടെർമിനൽ വരെ നീളുന്നതായിരിക്കും.

ഒരു വശത്ത് പരമ്പരാഗത ഇന്ധന കയറ്റുമതി ശക്തമാക്കുകയും, മറുവശത്ത് ഹരിത ഊർജ്ജത്തിലേക്ക് ചുവടുവയ്ക്കുകയും ചെയ്യുന്ന കാനഡയുടെ ഇരട്ട തന്ത്രമാണ് ഈ രണ്ട് പ്രഖ്യാപനങ്ങളിലൂടെ വ്യക്തമാകുന്നത്. പുതിയ വെസ്റ്റ് കോസ്റ്റ് പൈപ്പ്‌ലൈൻ വഴി പ്രതിദിനം പത്ത് ലക്ഷത്തിലധികം ബാരൽ അസംസ്‌കൃത എണ്ണ ഏഷ്യൻ വിപണികളിലേക്ക് കയറ്റി അയക്കാൻ സാധിക്കുമെന്നാണ് പ്രതീക്ഷിക്കുന്നത്. ഇത് കാനഡയുടെ സമ്പദ്‌വ്യവസ്ഥയ്ക്ക് വലിയ കരുത്താകും. അതേസമയം, വർദ്ധിച്ചുവരുന്ന ആഭ്യന്തര ഊർജ്ജ ആവശ്യങ്ങൾ പരിഹരിക്കുന്നതിനും, സുസ്ഥിരവും ചെലവുകുറഞ്ഞതുമായ ശുദ്ധമായ ഊർജ്ജം ജനങ്ങൾക്ക് ഉറപ്പാക്കുന്നതിനും പ്രയറി മേഖലയിലെ ഗ്രിഡ് നവീകരണം അത്യന്താപേക്ഷിതമാണെന്ന് മന്ത്രി ടിം ഹോഡ്‌സൺ കൂട്ടിച്ചേർത്തു.