കനത്ത പ്രളയ ഭീതിയിൽ മാനിറ്റോബ; ബ്രാൻഡനിൽ അടിയന്തരാവസ്ഥ

 

കനത്ത മഴയെത്തുടർന്ന് കാനഡയിലെ മാനിറ്റോബയിലുള്ള ബ്രാൻഡൻ നഗരത്തിൽ അടിയന്തരാവസ്ഥ പ്രഖ്യാപിച്ചു. വരും ദിവസങ്ങളിൽ അസിനിബോയിൻ, ഷെൽമൗത്ത് നദികളിലെ ജലനിരപ്പ് ഉയരുമെന്ന പ്രവചനത്തെ തുടർന്നാണ് മുൻകരുതൽ നടപടിയായി മേയർ ജെഫ് ഫോസെറ്റ് അടിയന്തരാവസ്ഥ പ്രഖ്യാപിച്ചത്. 2014-ലെ രൂക്ഷമായ വെള്ളപ്പൊക്കത്തിന് സമാനമായ സാഹചര്യമാണ് പ്രതീക്ഷിക്കപ്പെടുന്നത്.

നിലവിൽ ആളുകളെ ഒഴിപ്പിക്കേണ്ട സാഹചര്യം ഇല്ലെങ്കിലും, ജനങ്ങളുടെ സുരക്ഷ ഉറപ്പാക്കാനും അടിയന്തര ഘട്ടങ്ങളിൽ ആവശ്യമായ സഹായങ്ങൾ വേഗത്തിൽ ലഭ്യമാക്കാനുമാണ് ഈ നടപടിയെന്ന് മേയർ വ്യക്തമാക്കി. സ്ഥിതിഗതികൾ നേരിടാൻ നഗരത്തിലെ എമർജൻസി ഓപ്പറേഷൻസ് സെൻ്റർ പൂർണ്ണ സജ്ജമാണ്. സുരക്ഷയുടെ ഭാഗമായി ചില പ്രധാന റോഡുകളിലെ ഡൈക്കുകൾ താൽക്കാലികമായി അടച്ചിട്ടുണ്ട്. പടിഞ്ഞാറൻ മാനിറ്റോബയിലെ ദുരിതാശ്വാസ പ്രവർത്തനങ്ങൾക്കായി കനേഡിയൻ സായുധ സേനയുടെ സഹായം ലഭ്യമാക്കുമെന്ന് ഫെഡറൽ എമർജൻസി മാനേജ്‌മെൻ്റ് മന്ത്രി എലീനർ ഓൾഷെവ്സ്കി അറിയിച്ചു. ദുരിതാശ്വാസ പ്രവർത്തനങ്ങളുടെ ഏകോപനത്തിനായാണ് സൈന്യത്തെ നിയോഗിക്കുന്നത്. വരും ദിവസങ്ങളിൽ മഴയ്ക്ക് ശമനമുണ്ടാകുമെന്നാണ് കാലാവസ്ഥാ പ്രവചനം.

ബ്രാൻഡൻ നഗരം മുൻകരുതലുകൾ എടുക്കുന്നുണ്ടെങ്കിലും, വടക്കൻ മേഖലകളിലെ സ്ഥിതി കൂടുതൽ വഷളായിട്ടുണ്ട്. ജൂൺ മാസത്തിൽ സാധാരണ ലഭിക്കേണ്ടതിനേക്കാൾ കൂടുതൽ മഴ പെയ്തതോടെ സ്വാൻ റിവറിൽ ജനജീവിതം ദുരിതത്തിലായി. 150-ലധികം താമസക്കാരെ ഇതിനകം സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചു. ജൂൺ ആദ്യം ഉണ്ടായ വെള്ളപ്പൊക്കത്തിൻ്റെ നാശനഷ്ടങ്ങളിൽ നിന്ന് കരകയറും മുൻപാണ് അടുത്ത പ്രളയം എത്തിയിരിക്കുന്നത്. ജലനിരപ്പ് നേരിയ തോതിൽ കുറഞ്ഞിട്ടുണ്ടെങ്കിലും പലയിടത്തും ഇപ്പോഴും വെള്ളപ്പൊക്കമുണ്ട്. ഇവിടുത്തെ തകരാറുകൾ പരിഹരിക്കാൻ മാത്രം ഏകദേശം 10 മില്യൺ ഡോളർ ചെലവ് വരുമെന്നാണ് കണക്കാക്കുന്നത്.