നല്ലൊരു പിതാവാകാൻ കോടതി അവസരം നൽകി'; ഒടുവിൽ രണ്ട് മക്കളെയും കൊന്ന് ദന്തഡോക്ടറുടെ ആത്മഹത്യ

 

 

ഓട്ടവയിൽ രണ്ട് മക്കളെ കൊലപ്പെടുത്തിയ ശേഷം ഡെൻ്റൽ ക്ലിനിക്കിന് തീയിട്ട് ആത്മഹത്യ ചെയ്ത പിതാവ് മുൻപ് ഭാര്യയെ ഭീഷണിപ്പെടുത്തിയിരുന്നതായും റിപ്പോർട്ട്. 40 കാരനായ മുഹമ്മദ് അൽ-ലാമി എന്ന ദന്തഡോക്ടറാണ് ഏഴും പന്ത്രണ്ടും വയസ്സുള്ള തൻ്റെ രണ്ട് ആൺമക്കളെ വീട്ടിൽ വെച്ച് കൊലപ്പെടുത്തിയത്. തുടർന്ന് സ്വന്തം ക്ലിനിക്ക് ബോംബെറിഞ്ഞ് തകർത്ത ഇയാൾ, വാഹനത്തിന് തീക്കൊളുത്തി ആത്മഹത്യ ചെയ്യുകയായിരുന്നു.

മുൻഭാര്യയെ വധിക്കുമെന്ന് ഭീഷണിപ്പെടുത്തിയ കേസിൽ ഇയാൾ നിലവിൽ പ്രൊബേഷനിലായിരുന്നു (കോടതി നിരീക്ഷണത്തിൽ). 2024 ജനുവരിയിൽ ഭാര്യയ്ക്ക് അയച്ച ഇമെയിലിലാണ് ഇയാൾ ക്രൂരമായ ഭീഷണികൾ മുഴക്കിയിരുന്നത്.  2022-ൽ വിവാഹമോചനം നേടിയ ഇയാൾ കുട്ടികൾക്കുള്ള ചെലവ് നൽകാൻ തയ്യാറായിരുന്നില്ല. ഇതുമായി ബന്ധപ്പെട്ട തർക്കമാണ് ഭീഷണിയിലേക്ക് നയിച്ചത്. ഫെബ്രുവരിയിൽ നടന്ന വിചാരണയിൽ ഇയാൾ തനിക്കെതിരെയുള്ള ആരോപണങ്ങൾക്ക് മറുപടി പറയാൻ വിസമ്മതിച്ചിരുന്നു.

ഇയാൾക്ക് മാനസിക പരിവർത്തനത്തിനുള്ള കൗൺസിലിംഗും കർശന നിരീക്ഷണവും വേണമെന്ന് പ്രോസിക്യൂഷൻ ആവശ്യപ്പെട്ടിരുന്നെങ്കിലും, കോടതി 12 മാസത്തെ ലഘുവായ പ്രൊബേഷൻ മാത്രമാണ് നൽകിയത്. പ്രതിക്ക് ക്രിമിനൽ പശ്ചാത്തലമില്ലാത്തതിനാൽ നല്ലൊരു പിതാവായി ജീവിക്കാൻ കോടതി അവസരം നൽകുകയായിരുന്നു. എന്നാൽ, ഈ കോടതി വിധിക്കു പിന്നാലെയാണ് നാടിനെ നടുക്കിയ ഈ ഇരട്ടക്കൊലപാതകവും ആത്മഹത്യയും നടന്നത്. കുട്ടികളുടെ അമ്മയെ പോലീസ് നിലവിൽ സംരക്ഷണയിൽ പാർപ്പിച്ചിരിക്കുകയാണ്. കേസിൽ വിശദമായ ഫോറൻസിക് അന്വേഷണം പുരോഗമിക്കുകയാണ്.