ജോര്ജിയയില് മലമുകളില് മരിച്ച നിലയില് കണ്ടെത്തിയ 19 കാരന്മാരായ ഇരട്ടസഹോദരങ്ങളുടേത് ആത്മഹത്യയെന്ന് സ്ഥിരീകരിച്ചു കുടുംബം
By: 600002 On: Jul 3, 2026, 11:53 AM
പി പി ചെറിയാന്
ജോര്ജിയ: ജോര്ജിയ സ്വദേശികളായ ഖാദിര് ലൂയിസ്, നാസിര് ലൂയിസ് എന്നീ 19 വയസ്സുള്ള ഇരട്ടസഹോദരങ്ങളുടെ മരണം ആത്മഹത്യ തന്നെയെന്ന് കുടുംബം ഒടുവില് സ്ഥിരീകരിച്ചു. 2025 മാര്ച്ചില് ഹിയാവാസിയിലെ ബെല് മൗണ്ടന് മലനിരകളില് വെടിയേറ്റ നിലയിലാണ് ഇവരുടെ മൃതദേഹങ്ങള് കണ്ടെത്തിയിരുന്നത്.
തുടക്കത്തില് ഇതൊരു കൊലപാതകവും പിന്നാലെയുള്ള ആത്മഹത്യയും ആകാം എന്ന് ജോര്ജിയ ബ്യൂറോ ഓഫ് ഇന്വെസ്റ്റിഗേഷന് സംശയിച്ചിരുന്നു. എന്നാല് ഇരുവരുടെയും മുറിവുകള് സ്വയം വരുത്തിവെച്ചതാണെന്ന് (ആത്മഹത്യ) അന്വേഷണ ഏജന്സി പിന്നീട് കണ്ടെത്തി.
ഒരു വര്ഷത്തിലേറെ നീണ്ട അന്വേഷണങ്ങള്ക്കും, ഔദ്യോഗിക ഫയലുകള് പരിശോധിച്ചതിനും, കുടുംബം സ്വന്തം നിലയില് നടത്തിയ സ്വതന്ത്ര പോസ്റ്റ്മോര്ട്ടം അവലോകനങ്ങള്ക്കും ശേഷമാണ് മരണം ആത്മഹത്യ തന്നെയെന്ന് അവര് അംഗീകരിച്ചത്. മാനസികാരോഗ്യത്തെക്കുറിച്ചുള്ള ബോധവല്ക്കരണം നല്കാനും ഇത്തരം പ്രതിസന്ധിയിലുള്ളവരെ സഹായിക്കാനും തങ്ങള് പ്രതിജ്ഞാബദ്ധരാണെന്ന് സഹോദരങ്ങളുടെ കുടുംബാംഗങ്ങള് ഫേസ്ബുക്കില് കുറിച്ചു.